ថ្ងៃទី២៩ ខែមីនា ឆ្នាំ២០២៦អត្ថបទគម្ពីរម៉ាថាយ ២៦,១៤-២៧,៦៦អត្ថាធិប្បាយគម្ពីរដោយ៖ លោកបូជាចារ្យ គង់ វៀល

សូមជម្រាបសួរ បងប្អូនជាទីស្រឡាញ់រាប់អាន! ក្នុងសប្ដាហ៍នេះ គ្រីស្តបរិស័ទនាំគ្នានឹក រលឹកពីពេល​ព្រះ​យេ​ស៊ូបូជាព្រះជន្ម និង​ទទួល​ព្រះជន្មថ្មីពេញលេញ។ ក្នុងសប្ដាហ៍នេះ មានបួនដំណាក់កាលគឺ៖

១. ថ្ងៃអាទិត្យ (ថ្ងៃនេះ)៖ ថ្ងៃអាទិត្យលើកតម្កើងរងទុក្ខលំបាករបស់ព្រះយេស៊ូ

នៅថ្ងៃអាទិត្យនេះ យើងនាំគ្នាឮ នឹករលឹកព្រះយេស៊ូយាងចូលក្រុងយេរូសាឡឹមក្នុងឋានៈជាព្រះគ្រីស្ត គឺ​ព្រះ​មហាក្សត្រមួយអង្គ ដែលប្រទានសុភមង្គលដ៏ពេញលេញឲ្យមនុស្សលោក តាមព្រះបន្ទូលសន្យារ​បស់​ព្រះជាម្ចាស់។ ដោយយើងអានគម្ពីរស្ដីអំពីព្រះយេស៊ូទុក្ខលំបាក យើងសន្មត់ថាថ្ងៃអាទិត្យនេះ ជាថ្ងៃ​អាទិត្យ​លើកតម្កើងព្រះយេស៊ូរងទុក្ខលំបាក។

២. ថ្ងៃព្រហស្បតិ៍ដ៏ពិសិដ្ឋ៖ ក្នុងពិធីជប់លៀងព្រះយេស៊ូយកនំប៉័ង និងស្រា មកចែកឲ្យសាវ័កបរិភោគ

ទុក​​ជាព្រះកាយ និងព្រះលោហិតរបស់ព្រះយេស៊ូគ្រីស្ត។ ព្រះអង្គម្ចាស់មានព្រះហឫទ័យបូជាព្រះជន្ម ដែល​​គ្មាននរណាម្នាក់បង្ខំ។ ព្រះយេស៊ូមានធម៌មេត្តាករុណា ហួសពីការស្មានរបស់មនុស្សលោក។

៣. ថ្ងៃសុក្រដ៏ពិសិដ្ឋ៖ ព្រះយេស៊ូសោយទិវង្គត

ព្រះអង្គសព្វព្រះហឫទ័យធ្វើតាមព្រះរាជបញ្ជារបស់ព្រះបិតា រហូតដល់បូជាព្រះជន្ម។ ព្រះអង្គ​ប្រៀប​ដូច​ជា​កូនចៀម ដែលជនជាតិអ៊ីស្រាអែលធ្លាប់បូជាថ្វាយព្រះជាម្ចាស់ ក្នុងឱកាសបុណ្យចម្លង។

៤. រាត្រីថ្ងៃសៅរ៍៖ គឺជាបុណ្យចម្លង

ខាងគ្រីស្តសាសនាយើង បុណ្យចម្លងនេះសំខាន់ជាងគេ សំខាន់ជាងបុណ្យឯទៀតៗទាំងអស់។ គឺយើង​អប​អរសាទរព្រះបិតាដែលប្រោសព្រះយេស៊ូឲ្យមានជីវិតថ្មីដ៏ពេញលេញ។ ព្រះអង្គគង់នៅជាមួយយើង​រាល់​ថ្ងៃទ្រង់ប្រទានជីវិតថ្មីដល់អស់អ្នកដែលផ្ញើជីវិតទាំងស្រុងលើព្រះអង្គ។

រីករាយសប្ដាហ៍ដ៏ពិសិដ្ឋបងប្អូន! ខ្ញុំសូមលើកទឹក​ចិត្ត​ឲ្យ​បងប្អូនទៅវិហារ មិនមែនតែថ្ងៃនេះទេ ប៉ុន្តែ! ​ថ្ងៃ​ព្រហស្បតិ៍​ដ៏ពិសិដ្ឋ ថ្ងៃសុក្រដ៏ពិសិដ្ឋ និងថ្ងៃសៅរ៍ដ៏ពិសិដ្ឋ ជាថ្ងៃរាត្រីនៃបុណ្យចម្លង ដើម្បី​ឲ្យ​បង​ប្អូន​ចូល​រួម​អប​អរសាទរព្រះយេស៊ូដែលរងទុក្ខលំបាក សោយទិវង្គត និងមានព្រះជន្មរស់ឡើងវិញ ដើម្បី​ប្រោស​លោកា​។ សូមព្រះជាម្ចាស់ប្រទានពរឲ្យយើង ក្នុងព្រះនាម​ព្រះ​បិតា និងព្រះបុត្រា និងព្រះវិញ្ញាណដ៏វិសុទ្ធ អាម៉ែន៕