ថ្ងៃទី១៩ ខែកញ្ញា ឆ្នាំ២០២៥ អត្ថបទគម្ពីរ (លូកា ៨,១-៣)អត្ថាធិប្បាយគម្ពីរដោយ៖ លោកបូជាចារ្យ ផាន បូរី

អត្ថបទព្រះគម្ពីរដំណឹងល្អថ្ងៃនេះ ព្រះយេស៊ូបានយាងទៅប្រកាសដំណឹងល្អអំពីព្រះរាជ្យ​របស់​ព្រះជា​ម្ចាស់​ដែល​មកដល់ គឺ “ព្រះយេស៊ូគ្រីស្ត”។ ចូលមើលអ្នកជំងឺឲ្យបានជា ចូលលើកទឹកចិត្ត​គ្នាទៅវិញទៅមក។

នៅក្នុងអត្ថបទព្រះគម្ពីរដំណឹងល្អនៅក្នុងថ្ងៃនេះ ព្រះយេស៊ូបានប្រោសមនុស្សដែលខ្មោច​ចូលឲ្យបានជា ព្រះយេស៊ូបានប្រោសស្ត្រីដែលធ្លាក់ឈាមឲ្យបានជា ហើយយើងឃើញស្ត្រីផ្សេងៗ​ទៀតគឺ នាងម៉ារីជា​អ្នក​ស្រុក​​ម៉ាដាឡា ក៏បានមកចូលរួមនៅ​ក្នុងក្រុមជា​មួយ​និងព្រះយេស៊ូ ហើយព្រះអង្គក៏បាន​ប្រោស​គាត់​ឲ្យ​បាន​ជា​ដែរ។

បងប្អូនជាទីស្រឡាញ់! ពេលណាយើងជឿលើព្រះយេស៊ូគ្រីស្ត ពេលនោះយើងនឹងឃើញថាជីវិតរបស់​យើង​​បានផ្លាស់ប្រែ។ ផ្លាស់​ប្រែ​ដោយ​សារព្រះយេស៊ូបានលើកតម្លៃ​យើងឲ្យមានភាពថ្លៃថ្នូរ​ឡើង​វិញ​នៅ​ក្នុង​សង្គម។ ដូចព្រះយេស៊ូបានលើកកិត្តិយសអស់បងប្អូនដែលមានជំងឺធ្លាក់ឈាម អស់បងប្អូន​ដែល​ខ្មោច​ចូល អស់​បង​ប្អូនដែលត្រូវសង្គមមិនរាប់រក អស់បងប្អូនដែលសង្គមគិតថាអត់មានតម្លៃ ព្រះយេស៊ូបា​ន​លើកអ្វីៗ​ទាំង​​អស់នេះឲ្យគេអាចចូលនៅក្នុងសង្គមវិញបាន ហើយគេអាចរួមដំណើរជាមួយនឹង​ព្រះយេស៊ូ​ដើម្បី​​ទៅ​ប្រកាសដំណឹងល្អផងដែរ។

បងប្អូនគ្រីស្តបរិស័ទ បងប្អូនដែលជាអ្នកជឿទាំងឡាយចូលបងប្អូនជឿលើព្រះយេស៊ូគ្រីស្ត! ពេលណាបង​ប្អូនជឿ​លើ​ព្រះយេស៊ូគ្រីស្ត ហើយបងប្អូនប្រតិបត្តិតាមព្រះបន្ទូលរបស់ព្រះអង្គ បងប្អូននឹងរកឃើញថា ពិតមែន! ព្រះបន្ទូលរបស់ព្រះអង្គព្យាបាល ជីវិតរបស់យើង ព្យាបាលស្នាមរបួស​នៃភាពថ្លៃ​ថ្នូរ​របស់​យើង​ឲ្យ​យើង​អា​ចចូលទៅក្នុងសង្គម ឲ្យយើងអាចមានពន្លឺនៃចំណេះ ពន្លឺនៃជំនឿ ពន្លឺនៃការសង្គ្រោះដើម្បី​ឲ្យ​យើង​អា​ចមានទំនាក់ទំនងជាមួយព្រះជាម្ចាស់ឡើងវិញ។

អ្នកជំងឺប្រៀបដូចជាអ្នកបាបដែលត្រូវការការសង្គ្រោះដែលត្រូវការគ្រូពេទ្យ ហើយ​ព្រះយេស៊ូ​គឺជា​គ្រូ​ពេទ្យ​ម្នាក់​ដែលព្យាបាលយើងទាំងរូបកាយទាំងព្រលឹងវិញ្ញាណ។ ​ព្រះយេស៊ូគឺជាព្រះគ្រីស្តដែល​ណែ​នាំ​ឲ្យយើង​មាន​ទំនាក់ទំនងថ្មីរវាងមនុស្ស និងព្រះជាម្ចាស់ ហើយព្រះយេស៊ូក៏ជាស្ពានមេត្រី ដែល​នាំ​យើងឲ្យ​មាន​​ទំ​នាក់ទំនងហៅថា​សម្ពន្ធមេត្រីថ្មីៗ​រវា​ង​ខ្ញុំ និងព្រះជាម្ចាស់។

បងប្អូនពិតជាមានសំណាងណាស់ ដែលបានទទួលអគ្គសញ្ញា​ជ្រមុជ​​ទឹក បាន​កើត​ជា​ថ្មី​ នឹងបានទទួលការ​សង្គ្រោះ​តាមរយៈអគ្គសញ្ញានានា​នៅ​ក្នុងព្រះសហគមន៍របស់យើង។ ហេតុនេះ ចូរ​បងប្អូនគ្រីស្តបរិស័ទ​ដែល​មិនសូវបានទៅព្រះវិហារ ចូរ​បង​ប្អូនខិតខំចាយពេលវេលារបស់​បងប្អូន​សម្រាប់​ព្រះជាម្ចាស់។ ថ្ងៃ​អាទិត្យ​​បងប្អូនត្រូវខំរូតរះធ្វើយ៉ាងណាលៃពេល​វេលាដើម្បីព្រះជាម្ចាស់ ទៅព្រះវិហារ ដើម្បី​ទទួល​ព្រះកាយ​ព្រះ​អង្គ ទទួល​ព្រះបន្ទូល​របស់ព្រះអង្គ នឹងដើម្បីជួបបង​ប្អូន​ឯ​ទៀតៗ ​ឲ្យយើងចេះចែកអំណរសប្បាយ​សម្រាប់​​បងប្អូនគ្រីស្តបរិស័ទក្នុ​​ងអង្គព្រះគ្រីស្តផងដែរ។

ខ្ញុំសូមទូលអង្វរព្រះជាម្ចាស់! សូមព្រះអង្គប្រោសប្រទានឲ្យបងប្អូនដែលជាអ្នកជំងឺ ទាំងនៅតាម​មន្ទីរពេទ្យ ទាំងនៅតាមផ្ទះ ឬនៅតាមកន្លែងផ្សេងៗ សូមឲ្យបងប្អូនបានទទួលការសង្គ្រោះ​ពីព្រះយេស៊ូ​គ្រី​ស្ត សូមឲ្យ​បង​ប្អូនមានសេចក្តីសង្ឃឹមឡើងវិញ សូមព្រះអង្គប្រោសប្រទានឲ្យប្រជាជននៅ​ក្នុងប្រទេស​កម្ពុ​ជា មាន​អំណរ​សប្បាយ នឹងសូមឲ្យសុខសន្តិភាពកើតមានឡើងនៅក្នុងប្រទេសរបស់យើងផងដែរ។ អាមែ​ន​៕