រដូវរំហើយមកដល់ឆាប់ៗនេះ ក៏ជាពេលដែលកម្លោះក្រមុំចាប់ផ្តើមគិតគូររឿងរៀបអាពាហ៍ពិពាហ៍។ រយៈពេល២ឆ្នាំនៃជំងឺកូវីដ១៩ បើទោះបីជាមានការរៀបចំសែនព្រេនពិតមែន តែក៏មិនបានធ្វើឱ្យអ្នកដែលបម្រើសេវាកម្មអាពាហ៍ពិពាហ៍មានចំណូលនោះទេ។
ចាប់តាំងពីថ្ងៃទី ១ ខែវិច្ឆិកាក្រោយការប្រកាសបើកអនុញ្ញាត្តឱ្យមានការរៀបអាពាហ៍ពិពាហ៍ឡើងវិញ ក្រោមភ្ញៀវចូលរួមមិនលើសពី២០០នាក់នោះ។ សេវាកម្មអាពាហ៍ពិពាហ៍ ដូចជាតន្ត្រីសម័យ និងបុរាណ សំអាងការ ភេសជ្ជៈ ចុងភៅ និងជាសេវាកម្មច្រើនមុខទៀតដែលបម្រើឱ្យការរៀបចំអាពាហ៍ពិពាហ៍ ត្រូវបានបញ្ជាកក់ និងដំណើរការមួយចំនួនបណ្តើរៗវិញ។
លោកស្រី ជា សម្បូរ ម្ចាស់បោះពុម្ពធៀបការ និងពិធីបុណ្យផ្សេងៗ បានថ្លែងថា ៖«ខ្ញុំចាប់ផ្តើមបោះពុម្ពវិញ ខ្ញុំទទួលបានពេលនេះត្រឹមតែ១០០សន្លឹកទេ គេមិនហ៊ានធ្វើច្រើនទេព្រោះគេខ្លាច គេធ្វើត្រឹមតែ១០តុទេ នេះការនៅតែភ្នំពេញយើងទេ។ គេរៀបចំតូចតាចហ្មឹង។ ពេលនេះយើងត្រូវតែប្រុងប្រយ័ត្នសិនណា យើងមិនអាចធ្វើធំដុំបានវិញភ្លាមៗទេ។ ជាធម្មតាតែមានហេតុភេទអ្វី យើងខាត អ្នកដើមបុណ្យដើមការ គេអត់ហ៊ានធ្វើច្រើនទេ គេធ្វើតែបន្តិចៗទេ»។
អ្នកនាង ជួន សុជាតា ម្ចាស់រោងពុម្ពសុជាតា ឲ្យដឹងថា ៖«ភ្ញៀវរៀបការពេលនេះ អាចត្រឹម១០តុ ឬ៥តុ។ ខ្ញុំសូមសំណូមពរដល់ប្រជាពលរដ្ឋ ទាំងអស់នៅក្នុងការប្រារព្ធពិធីផ្សេងៗមិនថា ការឬបុណ្យ ខួបកំណើត ត្រូវតែរក្សានូវវិធានការសុខាភិបាល ដើម្បីសុខភាពយើងទាំងអស់គ្នា និងប្រទេសជាតិយើងទាំងអស់គ្នា»។
អ្នកនាង ជួន សុជាតា បានថ្លែថា ក្រោយពីការប្រកាសបើកឱ្យមានពិធីមង្គលការ ឬពិធីបុណ្យទានផ្សេងៗនោះ វិស័យបោះពុម្ពចាប់ផ្តើមដំណើរការទៅមុខជាសន្សឹមៗ ប៉ុន្តែនៅក្នុងការប្រារព្ធពិធីនីមួយៗក៏មិនមានលក្ខណៈធំៗដូចកាលពីពេលមុននោះទេ។
លោក សៀង ចន្ថា ម្ចាស់អាជីវកម្មចុងភៅ បានថ្លែងថា ៖«បន្ទាប់ពីគាត់(រដ្ឋាភិបាល)បានប្រកាសបើកឡើងវិញធ្វើឱ្យអាជីវកម្មរបស់ខ្ញុំធ្វើដំណើរទៅសន្សឹមៗ អាចដោះស្រាយជីវភាពប្រចាំថ្ងៃរបស់បុគ្គលិក គាត់មកធ្វើការឡើងវិញ»។
លោក សៀង ចន្ថា បានបន្តថា ចុងភៅទាំងអស់សុទ្ធតែគោរពតាមគោលការណ៍របស់ក្រសួង ដោយរក្សាគម្លាតតុ កាត់បន្ថយចំនួនមនុស្សក្នុងមួយតុ បំពាក់ម៉ាស៊ីនបាញ់សម្លាប់មេរោគ ម៉ាស៊ីនស្កេនQR Code បង្ហាញអត្តសញ្ញាណបណ្ណទាំងអស់ក្នុងពិធី និងឧបករណ៍វាស់កម្តៅ ដើម្បីកាត់បន្ថយមេរោគកូវីដ១៩។
លោកស្រី ឱ វណ្ណឌីន រដ្ឋលេខាធិការក្រសួងសុខាភិបាល និងជាប្រធានគណៈកម្មការចំពោះកិច្ចចាក់វ៉ាក់សាំងបង្ការជំងឺកូវីដ១៩ ក្របខ័ណ្ឌទូទាំងប្រទេស នៅព្រឹកថ្ងៃទី១២ ខែវិច្ឆិកា ឆ្នាំ២០២១នេះ បានក្រើនរំលឹក និងអំពាវនាវដល់ម្ចាស់ដើមការទាំងអស់ ដែលរៀបចំពិធីសម្រាប់កូនចៅត្រូវតែបន្ដយកចិត្តទុកដាក់អនុវត្តនូវវិធានសុខាភិបាល ដើម្បីការពារជំងឺកូវីដ១៩ ស្របពេលរាជរដ្ឋាភិបាលអនុញ្ញាតឡើងវិញ។
ក្នុងពិធីសម្ពោធដាក់ឲ្យប្រើប្រាស់អគារទីស្តីការថ្មីរបស់ក្រសួងរៀបចំដែនដីនគរូបនីយកម្ម និងសំណង់ កាលពីព្រឹកថ្ងៃទី៨ ខែវិច្ឆិកា ឆ្នាំ២០២១ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជាបានប្រកាស អនុញ្ញាតឲ្យរៀបចំពិធីមង្គលការឡើងវិញដោយមិនកំណត់ ទៅតាមទីតាំងដែលអាចរក្សាគម្លាតសុវត្ថិភាពបាន។
ក្រៅពីតម្រូវឲ្យម្ចាស់កម្មវិធី ត្រូវមានទីតាំងឯកជនសមស្រប សម្រាប់រៀបចំពិធីអាពាហ៍ពិពាហ៍ឬពិធីបុណ្យប្រពៃណីផ្សេង ទៀត និងត្រូវដាក់ពាក្យស្នើសុំរៀបចំកម្មវិធី ជូនមករដ្ឋបាលខណ្ឌនៃទីតាំងប្រារព្ធជាមុននោះ រដ្ឋបាលរាជធានីភ្នំពេញ ក៏បានតម្រូវឲ្យម្ចាស់កម្មវិធីត្រូវចុះកិច្ចសន្យាជាមួយរដ្ឋបាលខណ្ឌនៃទីតាំងប្រារព្ធពិធីដើម្បីទទួលខុសត្រូវអនុវត្តនីតិវិធីប្រតិបត្តិស្តង់ដា ស្តីពីការរៀបអាពាហ៍ពិពាហ៍ និងពិធីបុណ្យប្រពៃណីផ្សេងទៀត តាមគន្លងប្រក្រតីភាពថ្មីក្នុងបរិបទនៃជំងឺ កូវីដ១៩ ( SOP ) របស់ក្រសួងវប្បធម៌និងវិចិត្រសិល្បៈនិងក្រសួង-ស្ថាប័នជំនាញពាក់ព័ន្ធជាពិសេសត្រូវអនវុត្តវិធានការ សុវត្ថិភាពផ្នែកសុខាភិបាល ឲ្យបានម៉ឺងម៉ាត់ គឺកាតព្វកិច្ចពាក់ម៉ាស ( លើកលែងពេលទទួលទានអាហារ-ភេសជ្ជៈ) កាតព្វកិច្ចរក្សាគម្លាតសុវត្ថិភាព ការធ្វើអនាម័យ បាញ់ថ្នាំសម្លាប់មេរោគ ការវាស់កម្តៅនិងត្រូវប្រកាន់ខ្ជាប់ជានិច្ចនូវ វិធានការ «៣ការពារ និង ៣កុំ»៕
Daily Program
