រដ្ឋកោះនានានៃមហាសមុទ្រប៉ាស៊ីហ្វីក បង្ហាញផ្លូវដើម្បីការពារភពផែនដីពីការបំផ្លាញនៃការប្រែប្រួលអាកាសធាតុ
នៅពីមុខមេដឹកនាំនានា លោកអន់តូនីញ៉ូ ហ្គូទែររ៉េស បាននិយាយថា សមុទ្រប៉ាស៊ីហ្វីក គឺជាពន្លឺនៃសាមគ្គីភាព ថាមពល ការគ្រប់គ្រងបរិស្ថាន និងសន្តិភាព នៅខណៈដែលមួយផ្នែកធំនៃពិភពលោកក្លាយជាចំណីនៃជម្លោះ អយុត្តិធម៌ និងវិបត្តិសង្គមសេដ្ឋកិច្ច។
សន្និសីទលើកទី៥៣ នេះ រួមមាន ១៨រដ្ឋជាសមាជិក ពីអូស្រ្តាលី រហូតដល់ វ៉ានូអាទូ ដែលត្រូវបានដឹកនាំដោយទស្សនវិស័យរយៈពេលវែង និងយុត្តិសាស្រ្តសម្រាប់ឆ្នាំ២០៥០ ដែលសំដៅធានាសុខភាព និងការរស់នៅប្រសើរសម្រាប់គ្រប់ៗគ្នា ដោយធ្វើការរួមគ្នា ដើម្បីប្រើប្រាស់ថាមពលរួម និងស្ថាបនាអនាគតឲ្យកាន់តែប្រសើរ។
នៅអំឡុងពេលការប្រជុំប្រចាំឆ្នាំនៅកោះតុងហ្គា នៅសមុទ្រប៉ាស៊ីហ្វីក អគ្គលេខាអង្គការ សហប្រជាជាតិ លោកអន់តូនីញ៉ូ ហ្គូទែររ៉េស បានចង្អុលបង្ហាញថា កម្មវិធីពិភពលោក ២០៣០ គឺដើម្បីការអភិវឌ្ឍ ដោយចីរភាព ដែលត្រូវបានបង្ហាញយ៉ាងច្បាស់នៅជុំវិញគោលដៅទាំង ១៧។ លោកបន្តថា សមុទ្រមានរឿងច្រើនដើម្បីបង្រៀនយើង។ គេក៏ត្រូវគៀងគរគ្នាដើម្បីគាំទ្រ។ លោកបន្ថែមថា តំបន់របស់រដ្ឋតូចៗ មានអ្នកដើរសមុទ្រដ៏ក្លាហាន អ្នកនេសាទដ៏ជំនាញ និងមានចំណេះដឹងពីបុព្វបុរសដ៏ស៊ីជម្រៅ ប៉ុន្តែសមុទ្រជាទូទៅបែរជាកន្លែងដែលគេចោលកាកសំណល់ដោយមនុស្សជាតិទាំងមូលទៅវិញ។ លោកអន់តូនីញ៉ូ ហ្គូទែររ៉េស និយាយទៀតថា ៖ ”ការបំពុលដោយសារធាតុប្លាស្ទីកបានធ្វើឲ្យពពួកសត្វ និងរុក្ខជាតិសមុទ្រថប់ដង្ហើម។ ឧស្ម័នផ្ទះកញ្ចក់បង្កឲ្យមានការកើនកម្តៅទឹកសមុទ្រ ការឡើងជាតិអាស៊ីត និងការកើនកម្ពស់ទឹកសមុទ្រ។ ប៉ុន្តែកោះនានានៅមហាសមុទ្រប៉ាស៊ីហ្វីក បង្ហាញនូវផ្លូវដើម្បីដើរតាមដើម្បីការពារអាកាសធាតុរបស់យើង ផែនដីរបស់យើង និងសមុទ្ររបស់យើង។”
លោកអន់តូនីញ៉ូ ហ្គូទែររ៉េស បានរំឭកអំពីសេចក្តីថ្លែងការណ៍នានានៃតំបន់នេះអំពីការកើនឡើងនៃកម្រិតទឹកសមុទ្រ និងការតាំងចិត្តដើម្បីប្រតិបត្តិនៅក្នុងពេលវេលាចម្លងទៅកាន់ថាមពលស្អាតដែលយុត្តិធម៌ដើម្បីឆ្ពោះទៅរកមហាសមុទ្រប៉ាស៊ីហ្វីកមួយដែលគ្មានឥន្ធនៈផូស៊ីល។
អគ្គលេខានៃអង្គការសហប្រជាជាតិ បានថ្លែងទៀតថា នៅខណៈដែលតំបន់ប៉ាស៊ីហ្វីកអាចធ្វើអ្វីដែលតំបន់នេះអាច ប្រជាជាតិនានាដែលមានឧស្សាហកម្មជឿនលឿននៃ G20 ដែលជាអ្នកបំភាយឧស្ម័នកាបូនិកដ៏ធំបំផុត ត្រូវតែដើរឈានមុខដោយបញ្ឈប់ផលិតកម្ម និងការប្រើប្រាស់ឥន្ធនៈផូស៊ីលឲ្យបានខ្លាំងក្លា និងបញ្ឈប់ភ្លាមនូវការពង្រីកខ្លួន។
លោកលោកអន់តូនីញ៉ូ ហ្គូទែររ៉េស គូសបញ្ជាក់ថា តំបន់ប៉ាស៊ីហ្វីកត្រូវការជាបន្ទាន់នូវការគាំទ្រខាងហិរញ្ញវត្ថុ សមត្ថភាព និងបច្ចេកវិទ្យាបន្ថែមដើម្បីបង្កើនល្បឿនចម្លងឆ្ពោះទៅកាន់ថាមពលស្អាត និងដើម្បីឲ្យរដ្ឋកោះនានាអាចវិនិយោគនៅក្នុងការសម្របខ្លួន និងភាពធន់។
ប្រមុខនៃអង្គការសហប្រជាជាតិក៏បានបន្ថែមថា ៖ “នេះគឺជាហេតុផលដែលយើងអំពាវនាវឲ្យមានកំណែទម្រង់នៃរចនាសម្ព័ន្ធហិរញ្ញវត្ថុអន្តរជាតិ ឲ្យមានការបង្កើនឲ្យបានខ្លាំងក្លានូវសមត្ថភាពការឲ្យកំចីពីធនាការពហុភាគីនៃការអភិវឌ្ឍ ឲ្យមានកម្មវិធីសម្រាលបំណុល ដែលដំណើរការ និងឲ្យមានការបែងចែកឲ្យកាន់តែប្រសើរនៃសិទ្ធទាញហិរញ្ញប្បទានពិសេសជាគុណប្រយោជន៍សម្រាប់ប្រទេសកំពុងអភិវឌ្ឍន៍។”
លោកអន់តូនីញ៉ូ ហ្គូទែររ៉េស ថ្លែងទៀតថា សេចក្តីសម្រេចដែលមេដឹកនាំពិភពលោកប្រកាន់យកនៅក្នុងឆ្នាំដែលនឹងមកដល់អំពីវិបត្តិអាកាសធាតុ និងការអភិវឌ្ឍដោយចីរភាព នឹងកំណត់ជោគវាសនាយើងទាំងអស់គ្នា។ និយាយម្យ៉ាងទៀត ប្រសិនបើយើងសង្រ្គោះតំបន់ប៉ាស៊ីហ្វីក យើងនឹងសង្រ្គោះពិភពលោក។ រដ្ឋកោះតូចៗនៃមហាសមុទ្រប៉ាស៊ីហ្វីកមានសីលធម៌ និងការប្រតិបត្តិដើម្បីនាំមកនូវភាពជាអ្នកដឹកនាំរបស់ពួកគេ នៅលើឆាកអន្តរជាតិ”។
Daily Program
