ការផ្តល់ហិរញ្ញប្បទានបន្ថែមទៀតសម្រាប់អាកាសធាតុ គឺចាំបាច់​ដើម្បីប្តូរពីការប្រើ​វោហាសាស្រ្តទៅកាន់សកម្មភាព

នៅអំឡុងកិច្ចសន្ទនាអន្តរសកម្មភាពដែលរៀបចំឡើង​កាលពីថ្ងៃពុធនៅក្នុងក្របខណ្ឌនៃ សន្និសិទ​អន្តរជាតិលើកទី៤ អំពីរដ្ឋកោះតូចៗ កំពុងអភិវឌ្ឍ ដែលប្រារព្ធឡើងនៅ សប្តាហ៍នេះ នៅលើកោះ ដង់ទីហ្គា អេ បាកប៊ូដា នៅតំបន់សមុទ្រការ៉ាអ៊ីប លោកស៊ូរ៉េនហ្សេល វីប ប្រធានាធិបតីនៃប្រទេសកោះប៉ាឡូ នៅមហាសមុទ្រប៉ាស៊ីហ្វីកខាងលិច បានប្រកាស​ក្តែងៗ​ថា យើងត្រូវតែប្តូរចេញពីការប្រើវោហាសាស្រ្តទៅជាសកម្មភាព​ដាច់ខាត”។

អ្នកតំណាងពីររូបនៃប្រទេសនៅអឺរ៉ុប​ដែលបានសន្យាក្នុងការផ្តល់ហិរញ្ញប្បទាន​នៃការប្រយុទ្ធ​ប្រឆាំងនឹង​ការប្រែប្រួលអាកាសធាតុ បានថ្លែងថា ការប្រកាសថ្មី​ដោយអង្គការកិច្ចសហ​ប្រតិបត្តិការ និងអភិវឌ្ឍសេដ្ឋកិច្ច គឺបានបញ្ជាក់អំពីចំនួនទឹកប្រាក់សរុប គឺ ១១៥,៩ ពាន់លាន​ដុល្លារបានត្រូវប្រមូលផ្តុំនៅឆ្នាំ២០២២ សម្រាប់សកម្មភាពអាកាសធាតុនៅក្នុងប្រទេស​អភិវឌ្ឍ និង​បង្ហាញអំពីការរីកចម្រើនទៅមុខដ៏សម្បើម​ដែលត្រូវតែធ្វើឲ្យសម្រេចបាន។

នៅឆ្នាំ២០០៩ សន្និសីទអន្តរជាតិស្តីអំពីអាកាសធាតុលើកទី១៥ បានដាក់គោលដៅ​ប្រមូលផ្តុំ​ថវិកា ១០០ពាន់លានដុល្លារ​ក្នុងមួយឆ្នាំដើម្បីសកម្មភាពអាកាសធាតុ នៅក្នុងពិភពប្រទេស កំពុង​​អភិវឌ្ឍ។

កិច្ចប្រជុំគឺធ្វើឡើងដើម្បីប្រឹក្សាយោបល់​អំពីការសន្យា​ដែលបានប្រកាន់យកនៅឌូបៃ ដែល​បាន​​អនុញ្ញាតឲ្យបង្កើតមូលនិធិដើម្បីស្តារការបាត់បង់ និងជុសជុលការខូចខាតពីការប្រែប្រួល​អាកាស​ធាតុ ដែលសារៈសំខាន់​បំផុត គឺជួយដល់ប្រទេសរដ្ឋកោះតូចៗ និងប្រទេសដទៃៗ ទៀត ដែលងាយ​រគ្រោះឲ្យអាចទូទាត់សងពីឥទ្ធិពលនៃលក្ខខណ្ឌឧតុនិយម​ខ្លាំងក្លា ការកើន​ឡើង​នូវកម្ពស់ទឹក​សមុទ្រ និងការសំណឹកនៅតាមឆ្នេរ។

ប្រធានាធិបតី វីប បានថ្លែងថា ការគាំទ្រដែលកើនឡើង​សម្រាប់ប្រទេសរដ្ឋកោះតូចៗ មិនមែន​គ្រាន់តែមានសារសំខាន់ជាអាយុជីវិតសម្រាប់ការរស់រានមានជីវិតរបស់រដ្ឋទាំងនេះ ប៉ុន្តែ​វា​ក៏​មាន​សារសំខាន់​សម្រាប់ដោះស្រាយ​ការប្រឈមខាងអាកាសធាតុជាសកល”។ លោកបាន​បន្ថែម​ថា យើងត្រូវការយន្តការអន្តរជាតិដើម្បីផ្តល់ហិរញ្ញប្បទានខាងអាកាសធាតុ ដែលមាន​ភាព​រឹងម៉ាំ និងមានទំនួលខុសត្រូវ និងដែលផ្តល់លទ្ធផលជាក់ស្តែង”។

លោកស្រីជេន នីហ្វើ ម័រហ្គេន បេសកជនពិសេសរបស់អាឡឺម៉ង​សម្រាប់អាកាសធាតុ បាន​ទទួល​ស្គាល់ថា ពិភពលោកត្រូវតែប្រើប្រាស់កិច្ចសន្យាពីសន្និសីទអន្តរជាតិស្តីអំពីអាកាសធាតុ​លើកទី២៨ ដែលរួមមានការផ្លាស់ប្តូរថាមពលឲ្យមានភាពយុត្តិធម៌ និងសមធម៌ ដើម្បី​ចាក​ឲ្យ​ឆ្ងាយ​ពីឥន្ធនៈ​ផូស៊ីល និងផ្តល់ហិរញ្ញប្បទានសម្រាប់ភាពធន់ និងការសម្របខ្លួន។ ​លោកស្រី​ស្វាគម​ការប្រកាសរបស់អង្គការសហប្រតិបត្តិការ និងអភិវឌ្ឍសេដ្ឋកិច្ច ដូចជា​ការ​ចោះ​ទម្លុះ​ភាព​ទាល់ច្រក និងថ្លែងថា ប្រទេសរដ្ឋកោះតូចៗ នឹងអាចនាំមកនូវការចូលរួមយ៉ាង​ពិត​ប្រាកដ​ដាច់ដោយឡែក ដើម្បីសម្រេចការសន្យានៃ​សន្និសីទអន្តរជាតិស្តីអំពីអាកាសធាតុ​លើក​ទី​២៨។

ចំណែកលោកណាអាឌៀ ហាសសាន រដ្ឋមន្រ្តីក្រសួងហិរញ្ញវត្ថុ នៃការរៀបចំផែនការសេដ្ឋកិច្ច និង​ពាណិជ្ជ​កម្ម​នៃប្រជុំកោះ សីស្ហ៉ែល នៅមហាសមុទ្រឥណ្ឌា បា​នវាយតម្លៃថា សន្និសីទ​អន្តរជាតិ​​ស្តី​​អំពី​អាកាសធាតុលើក​ទី២៨ គឺជាជំហានធំទៅមុខសម្រាប់ប្រទេសរដ្ឋកោះតូចៗ ប៉ុន្តែ​លោក​បាន​​បន្ទរបន្តលោកប្រធានាធិបតីវីប ដោយប្រកាសថា វោហារសាស្រ្តនៅតែ​ត្រូវ​ប្រើ​ច្រើង​​ជាង​សកម្មភាព​នៅទីកន្លែងផ្ទាល់។ លោកបានបញ្ជាក់ថា វាគ្មានពេលវេលាដើម្បីបាត់បង់​ទៀត​ទេ និងរៀបរាប់ថា ហេដ្ឋរចនាសម្ព័ន្ធតាមឆ្នេរនៃប្រជុំកោះសីស្ហ៉ែល បានកំពុងធ្លាក់ទៅក្នុង​សមុទ្រ​​បណ្តើរៗ​ហើយ។