យោងតាមប្រមុខអង្គការសហប្រជាជាតិ គោលដៅនៃកិច្ចព្រមព្រៀងទីក្រុងប៉ារីស គឺ ត្រូវការផ្តោចអារម្មណ៍បន្ទាន់

យោងតាមរបាយការណ៍ថ្មីនៃអង្គការឧតុនិយមពិភពលោក (OMM) បានឲ្យដឹងថា ឥទ្ធិពល នៃ ការប្រែប្រួលអាកាសធាតុដែលបង្កឡើងដោយសកម្មភាពរបស់មនុស្ស បានឈាន​ដល់កម្រិត ប្រកាសអាសន្ននៅឆ្នាំ២០២៤។

យោងតាមរបាយការណ៍អំពីសភាពនៃអាកាសធាតុពិភពលោកបញ្ជាក់ថា ឆ្នាំ២០២៤ គឺជាឆ្នាំ​ដែល​ក្តៅបំផុតចាប់តាំងពីមានសម្រង់ទិន្នន័យ។ ១៧៥ឆ្នាំ កន្លងទៅ ឆ្នាំ២០២៤ ជាមួយសីតុណ្ហ​ភាព​​​មធ្យមពិភពលោកកើន 1,55 °C លើកម្រិតយុគសម័យមុខឧស្សាហកម្ម វាបានលើស​ហួស​​ជា​លើក​ដំបូងលើកម្រិតកំណត់ដែលមិនឲ្យសីតុណ្ហភាពកើនលើស 1,5 °C ។

សូចករខាងអាកាសធាតុជាច្រើន ក៏បានបង្ហាញនូវឯកតកម្មថ្មី។ ការប្រមូលផ្តុំនៃកាបូនឌី​អុកស៊ីត​​នៅក្នុងបរិយាកាសមិនដែលមានខ្ពស់ដូច្នេះទេ ចាប់តាំងពី ៨០០០០០ឆ្នាំមកហើយ។​សមុទ្រនានាបន្តឡើងកម្តៅក្នុងចង្វាក់មិនធ្លាប់មានពីមុន។ ផ្ទាំងទឹកកក និងទឹកកកនៅ​សមុទ្រ​ រលាយយ៉ាងលឿន ដែលចូលរួមចំណែក​ដល់ការឡើង​កម្រិត​កម្ពស់ទឹក និងគំរាម​កំហែង​ដល់​ប្រព័ន្ធបរិស្ថានឆ្នេរ និងហេដ្ឋារចនាសម្ព័ន្ធនៃ​ពិភពលោក​ទាំងមូល។ ក្រៅពីនេះ ខ្យល់ព្យុះស៊ីក្លូន​ត្រូពិក ទឹកជំនន់ គ្រោះរាំងស្ងួត និងហានិភ័យដទៃៗ ទៀត កាលពី​ឆ្នាំ​មុន បានបង្កការភៀស​ខ្លួន​ថ្មី​ក្នុង​ចំនួនដ៏ច្រើនបំផុត  ដែលរួមចំណែកធ្វើឲ្យមានភាពកាន់តែធ្ងន់ធ្ងរនៃវិបត្តិចំណីអាហារ និងបង្កការ​បាត់បង់​សេដ្ឋកិច្ចដ៏ធំសម្បើម។

ទោះបីមាននិន្នាការប្រកាសអាសន្នទាំងនេះ អគ្គលេខាអង្កការសហប្រជាជាតិ លោក​អន់តូនីញ៉ូ ហ្គូទែរ៉េស បានថ្លែងថា កិច្ចព្រមព្រៀងទីក្រុងប៉ារីសស្តីអំពីអាកាសធាតុ នៅតែ​អាច​សម្រេច​បាន និងអំពាវនាវឲ្យមេដឹកនាំនានានៅក្នុងពិភពលោកពង្រីកកិច្ចខិតខំប្រឹង​ប្រែង​របស់​ពួកគេ​ដើម្បីឆ្លើយតបទៅនឹងវិបត្តិ ដែលកាន់តែធ្ងន់ធ្ងរឡើងៗ។ លោកហ្គូទែរ៉េស បានទទូចថា ៖ “ផែនដីបញ្ចេញសញ្ញាស្រ្តេសកាន់តែច្រើនឡើងៗ ប៉ុន្តែ​របាយការណបង្ហាញ​ថា វានៅតែ​អាច​ទៅរួច នឹងកម្រិតការកើនឡើងនៃសីតុណ្ហភាព​ពិភពលោកមិនឲ្យកើនឡើង​លើស​កម្រិត 1,5 °C។​ មេដឹក​នាំពិភពលោកត្រូវតែប្រកាន់វិធានាការ​ដើម្បីឈានទៅសម្រេច​បានផែនការ ដោយ​ទាញ​គុណ​ប្រយោជន៍​ពីថាមពលកកើតឡើងវិញស្អាត និងមានតម្លៃថោក គឺដើម្បី​ប្រជាជន​ និង​​សេដ្ឋកិច្ច​​របស់ពួកគេ។”

លោកស្រីសេឡេស សូឡូ អគ្គលេខាអង្គការឧតុនិយមពិភពលោក បានវាយ​តម្លៃ​លើ​ការ​សន្និដ្ឋាន​នៃរបាយការណ៍អំពីសញ្ញាប្រកាសអាសន្ន ប្រឈមនឹង​ការកើនឡើងនៃហានិភ័យ​ដែល​ធ្វើឲ្យមរណៈ ដែលធ្លាក់លើជីវិតមនុស្ស សេដ្ឋកិច្ច និងភពផែនដី។ លោកស្រី បានបញ្ជាក់​ថា ៖ “អង្គការឧតុនិយមពិភពលោក និងសហគមន៍អន្តរជាតិ បង្កើនទ្វេនូវកិច្ចខិតខំប្រឹងប្រែង​ដើម្បី​ពង្រឹង​ប្រព័ន្ធ​ប្រកាសអាសន្នបឋម និងសេវាកម្មអាកាសធាតុដើម្បីជួយដល់អ្នកសម្រេច​ចិត្ត និងសង្គមជារួមក្នុងការទប់ទល់ឲ្យ​បានប្រសើរទៅនឹងឧតុនិយម និងអាកាសធាតុធ្ងន់ធ្ងរ​ហួស​ហេតុ។ យើងរីកចម្រើន ប៉ុន្តែយើង​ត្រូវទៅមុខឲ្យបានកាន់តែឆ្ងាយ និងកាន់តែលឿន។”

របាយការណ៍ក៏រៀបរាប់ថា សីតុណ្ហភាពពិភពលោកឯកតកម្មនៅឆ្នាំ២០២៣ និងឆ្នាំ២០២៤ គឺបណ្តាលមកពីជាសំខាន់ពីការកើនឡើងនូវការបំភាយឧស្ម័នផ្ទះកញ្ចក់ ដែលត្រូវធ្វើឲ្យកាន់​តែ​រីកធំដោយសារការផ្ទេរពីបាតុភូត ឡា នីណា ទៅកាន់បាតុភូត អេល នីណូផង។ ​ក្នុង​ចំណោម​កត្តាដទៃៗ ទៀត​ ដែលមានឥទ្ធិពលចូលរួមចំណែក មាន​ដូចជាកា​រប្រែប្រួលនៃវដ្តិ​របស់​ព្រះ​អាទិត្យ សកម្មភាពបំទុះភ្នំភ្លើង និងការប្រែប្រួលនៅក្នុងចរន្តទឹក​សមុទ្រផងដែរ។

អ្នកវិទ្យាសាស្រ្តក៏បញ្ជាក់អំពីភាពបន្ទាន់ដើម្បីប្រតិកម្ម ដោយបង្ហាញនូវការប្រែប្រួលខ្លះដែល​លែង​​អាច​ជួសជុលបាន មានដូចជា ការកើនឡើងនូវកម្ពស់ទឺកសមុទ្រ ដែលបានកើនឡើងពីរ​ដងចាប់តាំងពីមានការចាប់ផ្តើមវាស់វែងតាមផ្កាយរណបមក។