មនុស្ស ៣៥០០០០នាក់ ត្រូវការជំនួយ​មនុស្សធម៌សម្រាប់ទឹកជំនន់នៅប្រទេស​កុងហ្គោ

ការប្រែប្រួលអាកាសធាតុបានធ្វើឲ្យពិភពលោកលោកទាំងមូលជួបគ្រោះថ្នាក់ធម្មជាតិ មិន​ឈប់​​មិនឈប់ មានខ្យល់ព្យុះ ទឹកជំនន់ និងគ្រោះរាំងស្ងួតជាដើម។

ពេលនេះ សាធារណរដ្ឋកុងហ្គោ នៅទ្វីបអាហ្រ្វិក កំពុងទទួលរងផលប៉ះពាល់ពីទឹកជំនន់​ដែល​មិន​ធ្លាប់មាន រយៈពេល ៦​ទសវត្ស បន្ទាប់ពីមានភ្លៀងធ្លាក់ដ៏ខ្លាំងក្លាចាប់តាំងពីខែតុលា ឆ្នាំមុន ដែល​ធ្វើឲ្យទឹកទន្លេ អ៊ូបានហ្គី ឡើងលិចហៀរច្រាំង។ នេះគឺជាទន្លេដែលជួបប្រសព្ទនឹង​ទន្លេ​កុងហ្គោ។

នៅអំឡុងការធ្វើបទសម្ភាសន៍នៅទីស្នាក់ការអង្គការសហប្រជាជាតិនៅទីក្រុងហ្ស៉ឺណេវ លោក ជេន ឡាអើកេ បាននិយាយថា រយៈពេលបីសប្តាហ៍មក បីភាគបួន​នៃខេត្តទាំង ១២ របស់ ប្រទេស​​កុងហ្គោ ជានិច្ចកាលស្ថិតនៅក្រោមទឹក ដែលធ្វើឲ្យប្រជាជន១,៨លាននាក់ រងគ្រោះ​ពី​ទឹក​​ជំនន់​ ហើយនៅក្នុងនោះ មានមនុស្សប្រមាណ ៣៥០០០០នាក់ ត្រូវការជំនួយមនុស្សធម៌។

លោកជេន ឡាអើកេ បានថ្លែងទៀតថា គ្រោះទឹកជំនន់ បានបណ្តាលឲ្យប្រជាជនក្នុង​សហគមន៍​ជាច្រើន​ក្នុង​​តំបន់​បាត់បង់ទីជម្រក និងមិនអាចទទួលបានសេវាសុខភាពបឋម។

ចំណែកអង្គការសុខភាពពិភពលោក បានបញ្ជាក់កាលពីសប្តាហ៍មុនថា ទឹកជំនន់បានបំផ្លាញ និង​ធ្វើឲ្យខូចខាត មណ្ឌលសុខភាពចំនួន ៣៤ សាលារៀនចំនួន ១២០ និងគេហដ្ឋាន ៦៤០០០ខ្នង ​នៅក្នុងតំបន់រងផលប៉ះពាល់។ នៅក្នុងតំបន់ខ្លះ ការប្រើប្រាស់ទឹកស្អាត និង​ការ​តម្លើង​​មណ្ឌលសុខភាព ត្រូវ​បានកម្រិត  និងកន្លែងខ្លះមិនអាចធ្វើ​បានទេ។ មានកុមារប្រមាណ ២៧០០០០ នាក់ ដែលមិនបានចូលរៀន។

សម្រាប់ស្ថានភាពនេះ ក៏មានបន្ថែមនូវការគំរាមកំហែងលើសុខភាពប្រជាជន មានជាអាទិ៍​ហានិភ័យ​នៃរោគឆ្លងនៃជំងឺដែលឆ្លងតាមទឹក ដូចជាជំងឺរាគរូស ជំងឺដែលឆ្លងតាមភ្នាក់ងារ​ចម្លង​​​ដូចជា​ជំងឺរបេង និងគ្រុនឈាម និងជំងឺដែលអាចជៀសបានដោយប្រើប្រាស់វ៉ាក់សាំង​ដូចជា ជំងឺ​​កញ្ជ្រិល។ អង្គការសុខភាពពិភពលោក ព្រួយបារម្ភថា សុខភាពចំណីអាហាររបស់​អ្នក​​ម្តាយ និង​កុមារ ក៏ត្រូវទទួលការគំរាមកំហែងដែរ នៅខណៈ​ដែលអំពើហិង្សាផ្លូវភេទ​ក៏អាច​កើត​​ឡើង​​ផង​ដែរ។

ការចូលទៅកាន់កន្លែងរងមហន្តរាយគឺលំបាកណាស់ដោយសារតែទឹកជំនន់ និងភូមិជាច្រើន​មិនអាចទៅដល់ ដែលគេអាចទៅបានតាមរយៈតែទូកកាណូ និងកាណូត។

ទីភ្នាក់ងារអង្គការសហប្រជាជាតិបានស្ថាបនាផែនការ​ឆ្លើយតបជាមួយនឹងរដ្ឋាភិបាលកុងហ្គោ ជាមួយនឹងថវិកាប្រមាណ ២៦លានដុល្លារ ដោយផ្តល់អាទិភាពទៅលើការស្ថាបនាជម្រក សន្តិសុខស្បៀង សារជាតិចិញ្ចឹម សុខភាព និងទឹក ការសម្អាត និងការធ្វើអនាម័យ។

លោកជេន ឡាអើកេ  បានព្រមានថា វាមិនគ្រាន់តែជាវិធានការ​ដំបូងៗដើម្បីប្រឈមមុខ​នឹង​ស្ថានភាព​បន្ទាន់នោះទេ។ ទឹកជំនន់​ក៏អាចបង្កឲ្យមានវិបាកក្នុងរយៈពេលយូរផងដែរ។

ផ្ទៃដីកសិកម្ម ២៣០០ ហិចតា ត្រូវបានជន់លិច។ នេះទុកឲ្យមានការភ័យខ្លាចថា មធ្យោបាយ​ផលិតកម្មចំណីអាហារ ជាឧទាហរណ៍ដើមឈើហូបផ្លែ ទូកនេសាទ ត្រូវបានបំផ្លាញ ហើយ​សត្វពាហនៈ​បានស្លាប់អស់ជាច្រើន។

ការប្រមូលបានថវិកា ៣,៦លានដុល្លារ ពីមូលនិធិកណ្តាល​នៃការធ្វើអន្តរាគមន៍បន្ទាន់ គឺ​សម្រាប់​​ឆ្លើយតប​នឹងតម្រូវការដែលបន្ទាន់បំផុតរបស់មនុស្ស ២៧០០០០នាក់។ លោក ជេន ឡាអើកេ បានទទូចថា ដើម្បីដាក់ឲ្យដំណើរការនូវសំណុំនៃការឆ្លើយតបទាំងស្រុង ការផ្តល់​ហិរញ្ញវត្ថុ​​ជា​លក្ខណៈអន្តរ​ជាតិ ដែលកាន់តែមានសារៈសំខាន់ គឺជាការចាំបាច់។