គ្រប់លក្ខខណ្ឌប្រមូលផ្តុំដើម្បីឲ្យមានអគ្គីភ័យដ៏អាក្រក់នៅចំរដូវរងានៅទីក្រុងឡូស អេនជឺឡេស
មនុស្សរាប់ម៉ឺននាក់បានភៀសខ្លួន នៅខណៈដែលមានមនុស្សយ៉ាងហោចណាស់ ២៤នាក់ បានបាត់បង់ជីវិតដោយសារអគ្គីភ័យដ៏មហាសាលនៅទីក្រុងឡូ អេនជឺឡេស រដ្ឋកាលីហ្វ័រនី។ ការជជែកវែកញែកយ៉ាងផុសផុលអំពីមូលហេតុ លេចឡើងដោយសារការពង្រីកទីក្រុងដែលជាទីក្រុងទី២ ដែលមានប្រជាជនរស់នៅច្រើនបំផុតនៅសហរដ្ឋអាម៉េរិក និងការគ្រប់គ្រងព្រៃឈើនៅតំបន់ជុំវិញមិនបានល្អ។
គ្រោះរាំងស្ងួត កម្តៅ ខ្យល់ខ្លាំង “លក្ខខណ្ឌទាំងនេះ បានប្រមូលផ្តុំគ្នា នៅរដូវរងា នៅទីក្រុងឡូស អេនជឺឡេស។ លក្ខខណ្ឌទាំងនេះ អាចពន្យល់អំពីអគ្គីភ័យដ៏អាក្រក់ ហើយអ្នកជំនាញក៏មិនបន្ទោសទាំងស្រុងលើការប្រែប្រួលអាកាសធាតុដែរ។ ប្រជាជនរាប់ម៉ឺននាក់ បានភៀសខ្លួន ហើយមនុស្សយ៉ាងហោចណាស់ ២៤នាក់ បានស្លាប់។ ការជជែកវែកញ៉ែកយ៉ាងផុសផុលអំពីអគ្គីភ័យលេចឡើងអំពីមូលហេតុនៃការពង្រីកទីក្រុង និងការគ្រប់គ្រងព្រៃឈើមិនបានល្អ។
លោកស្រីគ្រីស្ទីនណា ដាល់ ដែលជាអនុប្រធាននៃអង្គការសិក្សាស្រាវជ្រាវវិទ្យាសាស្រ្តអង្គការក្លាយម៉េត សេនត្រាល់ (Climate Central) បានធ្វើសេចក្តីសង្ខេបថា ៖ “យើងបានធ្វើជាសាក្សីចំពោះភ្លើងដែលកំពុងរីកសាយភាយ នៅពេលដែលអាកាសធាតុក្តៅ និងស្ងួត ហើយមានខ្យល់បក់ទៀត។ លក្ខខណ្ឌទាំងអស់នេះ បានប្រមូលផ្តុំគ្នាសព្វថ្ងៃនេះ នៅភាគខាងត្បូងរដ្ឋកាលីហ្វ័រនី”។
សម្រាប់រដ្ឋកាលីហ្វ័រនី សញ្ញានៃការប្រែប្រួលអាកាសធាតុលេចឡើងច្បាស់បំផុត។ លក្ខខណ្ឌបី បានប្រមូលផ្តុំគ្នា គឺសីតុណ្ហភាពក្តៅ ស្ងួត ហើយមានខ្យល់។ សីតុណ្ហភាពកើនខ្ពស់នៅដើមរដូវរងានេះ នៅទីក្រុងឡូស អេនជឺឡេស នៅជុំវិញ ២០អង្សារសេ នៅពេលថ្ងៃ។ ពីមុន អគ្គីភ័យធំៗ នៅរដូវរងា គឺកម្រកើតមានណាស់នៅរដ្ឋកាលីហ្វ័រនី។
ទោះបីជាគេធ្វើមិនដឹងមិនឮចំពោះលក្ខខណ្ឌអគ្គីភ័យ ក៏ដោយ លោកប៉ាទ្រីក ហ្កុងហ្សាឡេ ដែលជាអ្នកឯកទេសអាកាសធាតុនៅសកលវិទ្យាល័យកាលីហ្វ័រនី បាននិយាយបំពេញថា ៖ “ការប្រែប្រួលអាកាសធាតុដែលមនុស្សបានចូលរួមបង្កឡើង បានធ្វើឲ្យកម្តៅកើនឡើង។ នេះគឺបង្កជាភ្លើងឆេះព្រៃ និងការកើនសីតុណ្ហភាព ២អង្សារសេចាប់តាំងពីឆ្នាំ១៨៩៥ នៅភាគខាងត្បូងរដ្ឋកាលីហ្វ័រនី”។
ក៏ដូចជានៅក្នុងប្រទេសដទៃជាច្រើនទៀត ឆ្នាំ២០២៤ គួរតែជាឆ្នាំដែលក្តៅបំផុតនៅសហរដ្ឋអាម៉េរិក ហើយអ្នកវិទ្យាសាស្រ្តបានរំឭកថា ការប្រែប្រួលអាកាសធាតុបង្កើនភាពញឹកញាប់នៃព្រឹត្តិការណ៍ឧតុនិយមដែលមានលក្ខណៈធ្ងន់ៗ។
ចំណែកលោកស្រីម៉ារីយ៉ា លូស្យា ហ្វ៉េរ៉េរា បាកបូសា ដែលជាអ្នកវិទ្យាសាស្រ្តពីអង្គការអង់គ្លេស អង្គការសេនត្រាល់ ហ្វ៉ អេកូឡូជី អេន ហាយដ្រូឡូជី (Centre for Ecology & Hydrology) បានផ្តល់គំនិតថា វិសាលភាពនៃភ្លើងឆ្នេះព្រៃប្រែប្រួលពី ១ឆ្នាំ ទៅ ១ឆ្នាំ។ អគ្គីភ័យពេលនេះ នៅទីក្រុងឡូស អេនជឺឡេស គឺជាផ្លែផ្កានៃលក្ខខណ្ឌដែលផ្គុំគ្នាដ៏ល្អឥតខ្ចោះសម្រាប់ឲ្យកើតមានមហន្តរាយបែបនេះ។
នៅឆ្នាំ២០២៤ រដ្ឋកាលីហ្វ័រនី ទទួលរងទាំងបាតុភូតអេល នីណូ ដែលនាំមកនៅភ្លៀងខ្លាំង និងរុក្ខជាតិរីកសាយភាយ ហើយនៅឆមាសទី២ ក៏មានគ្រោះរាំងស្ងួតនៅភាគខាងត្បូង។ ពីថ្ងៃទី១ ខែកក្កដា ឆ្នាំមុន រហូតដល់ថ្ងៃទី៥ ខែមករា ឆ្នាំនេះ គ្រោះរាំងស្ងួតបានកើតមាននៅភាគកណ្តាលទីក្រុងឡូស អេនជឺឡេស និងមានភ្លៀងធ្លាក់តែ ៤មម ដែលតិចជាងច្រើនពីកម្រិតធម្មតាប្រចាំរដូវ។ ដោយមានអត្រាសំណើមដ៏តិចតួចខ្លាំងនេះ រួមផ្សំនឹង មានខ្យល់ខ្លាំង និងស្ងួតផង ផ្ទៃដីក៏ត្រូវបានបោសសម្អាតដោយអគ្គីភ័យតែម្តង។
Daily Program
