ទុក្ខលំបាកដែលមនុស្សជួប ជាការល្បងលពីព្រះជាម្ចាស់ឬ?

បកស្រាយ​ដោយ៖ លោកបូជាចារ្យ រឿង ឆ័ត្រសិរី ពីព្រះសហគមន៍មណ្ឌល​សកម្មភាព​ភ្នំពេញ​ខាង​ជើង​ ក្នុងភូមិភាគភ្នំពេញ។

បូ. រឿង ឆ័ត្រសិរី៖ បងប្អូន! សម្រាប់ជំនឿរបស់យើង ជាគ្រឹះដែលអាចឲ្យយើងប្រឈមគ្រប់កិច្ចការ គ្រប់ការលំបាក ដូច្នេះហើយយើងអាចចោទជាសំណួរថា តើមានចំណុចអ្វីខ្លះដែលបញ្ជាក់យើងថា អ្នកនោះជាគ្រីស្តបរិស័ទដ៏រឹងមាំ? បងប្អូនដឹងហើយថា យើងស្វែងរកព្រះជាម្ចាស់តែមួយ ដោយសារយើងស្រលាញ់ព្រះអង្គ យើងចង់ស្គាល់ព្រះអង្គ ហើយជួនកាលយើងក៏បានទទួលអ្វីៗជាច្រើនពីព្រះអង្គផងដែរ។ ពេលយើងសប្បាយ ពេលយើងរីករាយ វាពិតជាងាយស្រួលនឹកដល់ព្រះជាម្ចាស់ ក៏ប៉ុន្តែ! ជាការពិសោធម្យ៉ាងដើម្បីដឹងថា តើយើងអាចបន្តជំនឿទៅលើព្រះជាម្ចាស់បានឬអត់ ជំនឿយើងរឹងមាំទេ គឺត្រូវមើលនៅពេលយើងមានបញ្ហា ពេលមានឧបសគ្គ ពេលនោះយើងដឹងថាជំនឿយើងរឹងមាំកំរិតណា? មានអ្នកធ្វើគំរូឲ្យយើងដឹងហើយ ឃើញហើយ អ្នកដែលមានជំនឿ​ជឿយ៉ាងពិតប្រាកដ ហើយក៏មិនបោះបង់ជំនឿនោះចោល រហូតដល់មានអ្នកដទៃហ៊ានសម្លាប់ពួកគាត់។

យើងហៅក្រុមនេះថាមរណ​សាក្សីដែលព្រះសហគមន៍យើងគោរពពួកគាត់ណាស់ ដោយសារពួកគាត់ជាសក្ខីភាពនៃជំនឿយ៉ាងជាក់ស្តែង មិនត្រឹមតែជាទ្រឹស្តី ឬចិត្តគំនិតនោះទេ តែវាជាក់ស្តែងមែនទែនដែលធ្វើឲ្យពួកគាត់សុខចិត្តលះបង់ជីវិត ដើម្បីជំនឿហ្នឹង។ ដូច្នេះជំនឿរបស់បងប្អូនរឹងមាំ ឬមិនរឹងមាំមើលកន្លែងដែលយើងកំពុងមានឧបសគ្គ យើងពឹងលើព្រះជាម្ចាស់ ។

 ហេតុនេះហើយបងប្អូនត្រូវពិចារណា ថាតើយើងខ្លាច យើងហ៊ានទេ ពេលជួបបញ្ហា ឬឧបសគ្គអ្វី នៅពេលយើងកំពុងមានជំនឿ! ដោយសារនៅពេលនោះឯងអាចឲ្យយើងបញ្ជាក់ថា តើជំនឿរបស់យើងរឹងមាំឬអត់? បើយើងរឹងមាំមានន័យថាគ្រប់រឿងរ៉ាវ ឬការលំបាក ទុក្ខព្រួយដែលយើងបានជួយប្រទះ គឺយើងអាចតស៊ូបាន និងដល់ទីបំផុតនៃជីវិតរបស់យើងផងដែរ។

ត្រង់នេះបញ្ជាក់ថាជំនឿរបស់យើងម្នាក់ៗ រឹងមាំ ឬយ៉ាងណា​អាស្រ័យលើហេតុផលទាំងនេះ។ ក៏ប៉ុន្តែ ប្រសិនបើជំនឿរបស់យើងទន់ខ្សោយ ពេលមានរឿង មារល្បួងបន្តិចបន្តួច មានរឿងលោកកីយ៍។ល។ វាអាចទាញចិត្តយើងឲ្យទៅធ្វើរឿងផ្សេងដែលខុសឆ្គង ប្រាសចាកពីព្រះហឫទ័យ ឬក៏ពីមាគ៌ាអប់រំរបស់ព្រះជាម្ចាស់ នោះមានន័យថាជំនឿរបស់យើងមិនរឹងមាំទេ។

ដូច្នេះខ្ញុំសង្ឃឹមថា ជំនឿរបស់បងប្អូននឹងរឹងមាំ ទោះជាស្ថិតក្នុងទុក្ខព្រួយ ឬអំណរសប្បាយក្តី គឺនៅតែផ្ញើជីវិតទៅលើព្រះជាម្ចាស់៕

រៀបចំ​ដោយ ឆាក លាំង