លោកយូរី ហ្គាហ្គារីន កើតនៅថ្ងៃទី៩ ខែមីនា ឆ្នាំ១៩៣៤ និងទទួលមរណភាពនៅថ្ងៃទី២៧ ខែមីនា ឆ្នាំ១៩៦៨។ លោកគឺជាពីឡុត និងជាអវកាសយានិកសូវៀត។ លោកគឺជាមនុស្ស ដំបូងគេដែលបានធ្វើដំណើរក្នុងទីអវកាសនៅអំឡុងបេសកកម្ម វ៉ូស្តុក ១ កាលពីថ្ងៃទី១២ ខែ មេសា ឆ្នាំ១៩៦១ នៅក្នុងក្របខណ្ឌនៃកម្មវិធីអវកាសរបស់សូវៀត។
បេសកកម្ម វ៉ូស្តុក ១ គឺជាដំណើរទៅទីអវកាសតែមួយរបស់លោក។ លោកបានទទួល មរណភាពនៅអាយុ ៣៤ឆ្នាំ នៅអំឡុងពេលវឹកហាត់ទ័ពអាកាសនៅពេលបញ្ជាយន្តហោះ Mig-15 របស់លោក។
លោកយូរី អាឡិចសីអ៊ីអេវីច ហ្គាហ្គារីន កើតនៅទីក្រុង គ្លូជីណូ នៅក្នុងខេត្តស្ម៉ូឡេន នៅ ភាគខាងលិចប្រទេសរុស្ស៊ី។ ឪពុករបស់លោកយូរី ហ្គាហ្គារីន លោកអាឡិច អ៊ីវ៉ូណូវិច ហ្គាហ្គារីន គឺជាជាងឈើ។ ម្តាយរបស់លោក គឺលោកស្រីអាណា ទីម៉ូហ្វេអេវនា ម៉ាតវ៉េវ៉ា មានប្រភពពីគ្រួសារវិស្វករនៅឡេនីនហ្គ្រាដ សព្វថ្ងៃគឺជាទីក្រុង សាំង ពេតឺស្បួ រដ្ឋធានីវប្បធម៌នៃប្រទេសរុស្ស៊ី។
នៅថ្ងៃទី២២ ខែមិថុនា ឆ្នាំ១៩៥៩ ដំណើរការជ្រើសរើសអវកាសយានិកដំបូងៗនៃកម្មវិធីអវកាសសូវៀត ត្រូវចាប់ផ្តើម។ មន្រ្តីទទួលខុសត្រូវ បានសម្រេចចិត្តជ្រើសរើសបេក្ខភាពពីក្នុងចំណោមពីឡុតបើកយន្តហោះយោធា ដោយសារតែពួកគេមានទម្លាប់ទទួលរងសន្ទុះល្បឿនដ៏ខ្លាំងរួចហើយ ឬអាចនឹងលោតឆត្រ។
ដើម្បីអាចនៅចុះនៅក្នុងបន្ទប់យានអវកាស បេក្ខជនជ្រើសរើសមិនត្រូវមានកម្ពស់លើសពី ១,៧៥មឡើយ និងមានទម្ងន់មិនលើសពី ៧០ គក។ លោកយូរី ហ្គាហ្គារីន ដែលមានកម្ពស់ ១,៥៨ ម គឺឆ្លើយតបនឹងលក្ខខណ្ឌនេះ។ បន្ទាប់ពីជម្រើសនៅលើសំណុំឯកសារដំបូង ដែលផ្អែកលើលក្ខណខណ្ឌរូបរាងនេះ មានការសម្ភាសន៍ជាច្រើន។ ក្នុងចំណោមមនុស្ស ៣០០០នាក់ លោកយូរី ហ្គាហ្គារីន ត្រូវបានគេជ្រើសរើស។
លោកយូរី ហ្គាហ្គារីន មិនត្រូវនិយាយប្រាប់នរណាទេ រួមទាំងភរិយារបស់លោកផង ដែលជាតម្រូវការរបស់កម្មវិធី។
ពីរថ្ងៃមុនការហោះឡើង លោកយូរី ហ្គាហ្គារីន បានសរសេរសំបុត្រមួយទៅកាន់ភរិយារបស់លោកដោយប្រាប់អំពីការបរាជ័យដែលអាចមាននៅពេលហោះហើរ។ នៅជំនាន់នោះ សំណាងនៃការទទួលជោគជ័យ គឺវាយតម្លៃថា មាន ៥០%។ ការហោះឡើងរបស់យាន វ៉ូស្តុក ១ ដែលត្រូវនាំមនុស្សដំបូងទៅកាន់ទីអវិកាស គឺត្រូវហោះចេញពីកន្លែងបង្ហោះយានអវកាស បៃអ៊ីកូណួរ នៅប្រទេសកាហ្សាដ្ឋានសព្វថ្ងៃ ដែលត្រូវបានប្រើប្រាស់តាំងពីការចាប់ផ្តើមនៃយុគសម័យអវកាសរបស់សហភាពសូវៀត។
បន្ទាប់ពីការហោះហើរទៅទីអវកាស វរសេនីយ៍ឯក ហ្គាហ្គារីន ត្រូវតម្លើងសក្តិជាមេបញ្ជាការ។ លោកទទួលបានឋានៈជាវរជននៃសហភាពសូវៀត និងមេដាយថ្នាក់លេនីន ដែលជាគ្រឿងឥស្សរិយសដ៏ខ្ពង់ខ្ពស់បំផុតនៃសហភាពសូវៀត។ លោកក៏ត្រូវបានតែងតាំងជាសមាជិកកិត្តិយសនៃរដ្ឋបណ្ឌិតសភាអន្តរជាតិនៃអវកាសផងដែរនៅឆ្នាំ១៩៦៦។
នៅក្នុងប្រទេសរបស់លោក ឈ្មោះរបស់លោកត្រូវបានផ្តល់កិត្តិយសដាក់នៅកន្លែងជាច្រើន មានទាំងវិទ្យាស្ថាន និងពានរង្វាន់ផងដែរ ដូចជាទីក្រុង ជីចាត ត្រូវប្តូរឈ្មោះទៅជា ហ្គាហ្គារីន នៅឆ្នាំ១៩៦៨។ បូជនីយដ្ឋានរំឭកដល់រូបលោកក៏មាននៅទីលានក្រុងមូស្គូ និងនៅសារមន្ទីរដ៏ធំបំផុតផ្នែកអវកាស និងលំហ របស់រុស្ស៊ី នៅទីក្រុងម៉ូនីណូ។ មាត់ភ្នំភ្លើង ហ្គាហ្គារីន គឺជាមាត់ភ្នំភ្លើងដ៏ធំបំផុតនៅឋានព្រះចន្ទ ដែលមានអង្កត់ផ្ចិត ២៦៥ គីឡូម៉ែត្រ ដែលស្ថិតនៅមុខងងឹត និងអាចម៍ផ្កាយលេខ ១៧៧២ ក៏ដូរទៅជាឈ្មោះលោកដែរ។
Daily Program
