ជាយុវជន និងជាអ្នកកំពុងការសិក្សាផ្នែគគេហកិច្ចម្នាក់ លោក ម៉ី សុខរស្មើ និយាយថា គេហកិច្ចក៏ជាជំនាញមួយ ហើយជំនាញនេះក៏ជាប់ទាក់ទងការរៀបចំទីធ្លាសណ្ឋាគារបានស្អាត បន្ទប់ស្នាក់នៅមានផាសុកភាព ដោយភ្ជាប់នឹងសម្ភារៈប្រើប្រាស់មានរបៀបរៀបរយ អាចទាក់ទាញចិត្តអ្នកស្នាក់នៅ ជាផ្នែកមួយនៃអ្នកជំនាញគេហកិច្ចក្នុងវិស័យទេសចរណ៍ផ្នែកសណ្ឋាគារ និងបដិសណ្ឋារកិច្ច។
លោក ម៉ី សុខរស្មី ជាសិស្សកំពុងសិក្សាជំនាញគេហកិច្ច និងកំពុងបម្រើការងារក្នុង សណ្ឋាគារមួយកន្លែងក្នុងទីក្រុងភ្នំពេញ បាននិយាយថា បានប្រាប់ឱ្យដឹងថា ជំនាញគេហកិច្ចនេះ មាន៤ផ្នែកធំៗ ដូចជាការសិក្សាអំពីផ្នែកសម្អាតទីធ្លាសាធារណ ផ្នែករៀបចំបន្ទប់ ផ្នែកទុកដាក់ក្រណាត់ និងផ្នែកបោកគក់។ ផ្នែកទាំងបួននេះ មានមុខងារយ៉ាងសំខាន់ក្នុងនាមជាអ្នកជំនាញគេហកិច្ច នៅក្នុងសណ្ឋាគារ។
លោក ម៉ី សុខរស្មី បានបន្តថា ខ្លួនជ្រើសរើសរៀនជំនាញគេហកិច្ចនេះដែរថា គឺដោយសារតែចំណង់ចំណូលចិត្ត ក្នុងការរៀបចំផ្ទះ ទីធ្លា ឱ្យមានរបៀបរៀបរយ មានសណ្ដាប់ធ្នាប់។ ជាមួយគ្នានេះ សុខរស្មី ក៏មើលឃើញពីតម្រូវការទីផ្សារទេសចរណ៍ សម្រាប់សណ្ឋាគារ ដែលត្រូវការអ្នកជំនាញផ្នែកគេហកិច្ចដើម្បីរៀបចំទីធ្លា សណ្ដាប់ធ្នាប់ និងបន្ទប់ស្នាក់របស់ភ្ញៀវឱ្យបានស្អាត។ ម្យ៉ាងប្រសិនបើមានជំនាញគេហកិច្ចច្បាស់ នោះនឹងអាចជួយឱ្យមានការងារ និងចំណូលច្បាស់លាស់សម្រាប់ខ្លួនឯង និងផ្គត់ផ្គង់គ្រួសារផងដែរ។
សម្រាប់ការសិក្សាជំនាញគេហកិច្ចនេះ បើតាមយុវជនខាងលើ សិក្សាមានថ្នាក់ទ្រឹស្ដី ៤ខែ ដែលរួមមានសកម្មភាពអនុវត្ត និងចុះកម្មសិក្សា៤ខែ។ ជាក់ស្ដែង រយៈ៤ខែ នៃការចុះកម្មសិក្សាកន្លងមក យុវជនរូបនេះ ទទួលបានជំនាញមួយច្បាស់លាស់ ជាពិសេសមានទំនាក់ទំនងល្អ ការរៀបចំខ្លួន រៀបចំកិរិយាសម្បត្តិឱ្យបានសមរម្យ ប្រកបដោយវិជ្ជាជីវៈនៅក្នុងវិស័យបដិសណ្ឋារកិច្ចនេះ។
សិស្សជំនាញគេហកិច្ចរូបនេះបន្តថា នៅក្នុងការសិក្សាជំនាញនេះ មិនមានផលលំបាកនោះទេ ព្រោះខ្លួនស្រលាញ់ជំនាញនេះស្រាប់ គ្រាន់តែបន្ថែមការអត់ធ្មត់ និងខិតខំយកចិត្តទុកដាក់លើការងារដែលត្រូវរៀនប៉ុណ្ណោះ។
ក្រោយរៀនចប់ លោក ម៉ី សុខរស្មី នឹងមានគម្រោងដាក់ពាក្យធ្វើការងារផ្នែកគេហកិច្ចនេះនៅតាមសណ្ឋាគារក្នុងខេត្តសៀមរាប ដើម្បីអាចបញ្ចេញស្នាដៃ និងសេចក្ដីស្រលាញ់ជំនាញនេះឱ្យអស់ពីលទ្ធភាព និងអាចជាចំណែកមួយដែលអាចទាក់ទាញភ្ញៀវទេសចរ និងអាចរកចំណូលសម្រាប់ខ្លួនឯង។
បុគ្គលិកផ្នែកគេហកិច្ចមានទំនួលខុសត្រូវក្នុងការផ្តល់នូវបរិយាកាសស្អាត ផាសុកភាព សុវត្ថិភាព និងសោភ័ណភាពសម្រាប់ភ្ញៀវនៅក្នុងសណ្ឋាគារ ឬកន្លែងស្នាក់នៅដូចជា ការផ្តល់សេវាកម្មរៀបចំបន្ទប់ បោកអ៊ុត សំអាតបន្ទប់ទឹក ទីធ្លាសាធារណៈ កន្លែងទទួលភ្ញៀវ ភោជនីយដ្ឋាន និងទីកន្លែងផ្សេងៗទៀតនៅក្នុងបរិវេណសណ្ឋាគារ។
យោងតាមក្រសួង ការងារ និងបណ្តុះបណ្តាលវិជ្ជាជីវៈ អត្ថប្រយោជន៍ដែលទទួលបានពីការងារផ្នែកគេហកិច្ច គឺ មានឱកាសទទួលបានការងារច្រើន, ប្រាក់បៀវត្សប្រកួតប្រជែង, ចំណេះដឹងជំនាញជាក់លាក់, ឥរិយាបទល្អក្នុងការធ្វើការងារជាក្រុម ព្រមទាំងមានជំនាញដោះស្រាយបញ្ហា និងជំនាញទំនាក់ទំនងយ៉ាងល្អប្រសើរជាមួយភ្ញៀវ៕
Daily Program
