យុវជនខេត្តព្រៃវែងនឹងទទួលបានការបណ្ដុះបណ្ដាលផ្នែកព័ត៌មានវិទ្យា និងការរចនា (ឌីហ្សាញ)

យុវជន​នៅ​ខេត្ត​ព្រៃវែង​នឹងមានឱកាស​ទទួល​បាន​វគ្គ​បណ្ដុះ​បណ្ដាលស្វ័យ​សិក្សាតាម​រយៈ​បច្ចេ​ក​​វិទ្យា​អន​ឡាញចំនួន​១៤​មុខវិជ្ជា ដែលជា​ជំនួយ​ឧបត្ថម្ភ​របស់​លោក​ ស សុខា រដ្ឋលេខាធិ​ការ​ក្រសួង​អប់​រំ​យុវជននិង​កីឡា និង​លោកស្រី​ ពី​ក្រុមការងារ​អភិវឌ្ឍយុវជន​ខេត្ត​ព្រៃវែង។

ការបណ្តុះបណ្តាល​នេះគឺ ដើម្បី​ចូលរួម​អភិវឌ្ឍន៍ធនធាន​មនុស្ស ក្នុង​យុគសម័យសេដ្ឋកិច្ច​ឌី​​ជី​ថល និង​ឧហ្សាហកម្ម ៤.០។ វគ្គបណ្ដុះ​បណ្ដាល​នេះ​នឹង​សិក្សា​ទៅ​លើ​ផ្នែក​ព័ត៌​មាន​វិទ្យា និង​ការរចនាឬហៅថា ឌីហ្សាញ  រយៈពេល​៣ខែ។​

យោង​តាម​សេចក្ដី​ប្រកាស​​បាន​បញ្ជាក់​ថា វគ្គ​បណ្ដុះ​បណ្ដាល​ស្វ័យ​សិក្សា​អន​ឡាញ​នេះ​​មាន​ចំនួន​៤​មុខវិជ្ជា​ លើ​ជំនាញ​ចំនួន​៣ គឺជំនាញអភិវឌ្ឍកម្ម​វិធី​ទូរស័ព្ទ ដោយ​ផ្ដោតលើ​​(Mobile App) គេហទំព័រ​(Web App) និង​កុំ​ព្យូទ័រ(Desktop App) ជំនាញរចនា​ក្រាហ្វិក​ និង​កាត់ត​វីដេអូ(Graphic Design and Video Editing) និងជំនាញ​កុំ​ព្យូទ័រ​សម្រាប់​ការងារ​រដ្ឋបាល​(​Microsoft Office for Administrator)។

នៅ​ក្នុង​គេហទំព័រ​របស់​លោក​បណ្ឌិត ងិន ​បាណាល់ កាល​ពី​ថ្ងៃទី​២២ ខែមីនា ឆ្នាំ២០២១ បាន​​បញ្ជាក់​ថា ​វគ្គ​បណ្ដុះ​បណ្ដាល​នេះសម្រាប់​តែ​​យុវជន​ខេត្ត​ព្រៃវែង ដែល​​មាន​អាយុ ចាប់​ពី​១៨​ឆ្នាំ ដល់​ ៣៥ឆ្នាំប៉ុណ្ណោះ។

លោកថា ៖ «រាល់​មុខវិជ្ជា​ស្វ័យ​សិក្សា​ដែល​បេក្ខជន​ ឬ​បេក្ខនារី​បាន​ជ្រើស​រើស​រៀន​ក្នុង​កម្ម​វិធី OneSala នឹង​ត្រូវបញ្ចប់​វគ្គ​នីមួយៗ​យ៉ាង​យូរ​រយៈពេល​៣ខែ»។

សម្រាប់​យុវជន​ខេត្ត​ព្រៃ​វែង​ដែល​មាន​ចំណាប់​អារម្មណ៍ អាច​ចូល​ទៅ​កាន់​ទម្រង់​ចុះ​ឈ្មោះ​ (Google Form) តាមរយៈ​តំណភ្ជាប់​​ https://tinyurl.com/5dnrbrvs ដោយ​បំពេញ​ព័ត៌មាន​ពិត​ប្រាកដ ដើម្បី​ក្រុម​ការងារ​ងាយ​ស្រួល​ក្នុង​ការ​ធ្វើ​ការ​វាយ​តម្លៃ​ ឬ​ទំនាក់​ទំនង​ផ្សេងៗ៕