ក្រោយពីបញ្ចប់ការតទល់គ្នារវាងប្រធានាធិបតីទាំងពីរ ទីក្រុងគៀវ និងទីក្រុងវ៉ាស៊ីនតុន បានខិតជិតកិច្ចព្រមព្រៀងមួយនៃទាញយកធ្វើអាជីវកម្មភោគទ្រព្យរ៉ែរបស់អ៊ុយក្រែន។
មេដឹកនាំរបស់អ៊ុយក្រែនបានទៅកាន់ទីក្រុងវ៉ាស៊ីនតុន កាលពីថ្ងៃសុក្រ ទី២៨ ខែកុម្ភៈដើម្បីពិភាក្សាលើច្បាប់ជាមួយនឹងលោកត្រាំ និងព្យាយាមដឹងបន្ថែមអំពីការបន្តជំនួយរបស់អាម៉េរិក។
ដំបូងដៃ ប្រធានាធិបតីអាម៉េរិកបានសង្កត់ធ្ងន់ចង់ទាមទារការបង់សងជំនួយដែលមាន ៣ឆ្នាំ ទៅឲ្យអ៊ុយក្រេន។ ប៉ុន្តែយោងតាមវិទ្យាស្ថានគីយ៉េល សម្រាប់សេដ្ឋកិច្ចពិភពលោក (IfW Kiel) បានឲ្យដឹងថា ទីក្រុងវ៉ាស៊ីនតុនគិតអំពីការទាមទារទឹកប្រាក់ ៥០០ពាន់លានដុល្លារ ដែលជាចំនួនច្រើនជាង ៤ដង នៃជំនួយដែលខ្លួនបានផ្តល់ឲ្យទីក្រុងគៀវ រហូតមកដល់ពេលនេះ ដែលមានប្រមាណជា ១២០ពាន់លាន ដុល្លារ។
ប្រធានាធិបតីអ៊ុយក្រែនបានច្រានចោលកិច្ចព្រមព្រៀងនេះ និងបដិសេធហត្ថលេខាលើច្បាប់ ដែលជនជាតិអ៊ុយក្រែន ១០ជំនាន់ នឹងបង់សង។
យោងតាមប្រភពមួយរបស់អ៊ុយក្រែនដែលបញ្ជាក់អំពីអត្ថន័យនៃការសម្រុះសម្រួល បានឲ្យដឹងថា ការទាមទាររបស់អាម៉េរិកខាងហិរញ្ញវត្ថុនេះលែងមានទៀតហើយនៅក្នុងអត្ថបទច្បាប់។ ប៉ុន្តែអត្ថបទច្បាប់ព្រាងថា អាម៉េរិក និងអ៊ុយក្រែន ធ្វើអាជីវកម្មរួមគ្នានៃធនធានរ៉ែ និងថា ចំណូលនឹងដាក់នៅក្នុងមូលនិធិរួមសម្រាប់អ៊ុយក្រែន និងអាម៉េរិក។ សម្រាប់ទីក្រុងគៀវ លក្ខខណ្ឌគន្លឹះក្នុងការផ្តល់ការអាចធ្វើអាជីវកម្មធនធានរបស់ខ្លួនឲ្យសម្ព័ន្ធមិត្ត គឺទទួលបាននូវការធានាសន្តិសុខ។
អ៊ុយក្រែនសន្និដ្ឋានថា ការធានាដ៏ប្រសើរបំផុតគឺការចូលទៅក្នុងអង្គការណាតូ។ នេះគឺជាសេណារីយ៉ូដែលច្រានចោលដោយទីក្រុងវ៉ាស៊ីនតុន ដោយសារតែរឿងនេះនឹងធ្វើឲ្យរាល់បទឈប់បាញ់ និងសន្តិភាព មិនអាចទៅរួច។ ទីក្រុងមូស្គូដាក់បន្ទាត់ក្រហមនៅត្រង់ចំនុចនេះ។
ការស្នើសុំដទៃទៀត របស់អ៊ុយក្រែន គឺត្រូវមាន កងកម្លាំងរក្សាសន្តិភាព ក្នុងករណីមានបទឈប់បាញ់។ ប៉ុន្តែសហរដ្ឋអាម៉េរិក បានច្រានចោលជម្រើសនេះ ប៉ុន្តែអនុគ្រោះដល់ការដាក់ពង្រាយកងទ័ពអឺរ៉ុប។
ប្រទេសអ៊ុយក្រែនប្រមូលផ្តុំ ធនធារ៉ែប្រមាណ ៥% នៃធនធានរ៉ែពិភពលោក ប៉ុន្តែធនធានរ៉ែដែលលោកដូណាល់ ត្រាំ ប៉ងចង់បាន គឺភាគច្រើនមិនទាន់ត្រូវបានធ្វើអាជីវកម្មនោះទេ មានការលំបាកនឹងទាញយក ឬការពិតសព្វថ្ងៃស្ថិតនៅក្រោមការគ្រប់គ្រងរបស់រុស្ស៊ីនៅដែនដីដែលរុស្ស៊ីកាន់កាប់។
យោងតាមទិន្នន័យយករ៉ែពិភពលោក (World Mining Data) បានឲ្យដឹងថា អ៊ុយក្រែនជាប្រទេសផលិតធនធានរ៉ែ ៣ប្រភេទ សំខាន់ៗ ៖ ម៉ងកាណែស ស្ថិតក្នុងលំដាប់លេខ ៨ នៅលើពិភពលោក ទីតាន លំដាប់លេខ១១ និងក្រាហ្វិក លំដាប់លេខ ១៤ នៅលើពិភពលោក ដែលរ៉ែនេះមានសារសំខាន់ចាំបាច់សម្រាប់ធ្វើអាគុយអគ្គីសនី។ រ៉ែក្រាហ្វិកនេះ ប្រមូលផ្តុំនៅអ៊ុយក្រែន ២០% នៃធនធានរ៉ែក្រាហ្វិកនៅលើពិភពលោកដែលគេបានសន្និដ្ឋាន។
យោងតាមប្រភពនេះដែរ អ៊ុយក្រែនក៏ជាប្រទេសសំខាន់មួយក្នុងចំណោមប្រទេសសំខាន់ៗ នៅអឺរ៉ុប ដែលមានរ៉ែដ៏មានសក្តានុពល គឺរ៉ែលីធ្យូម ដែលវាក៏ជាសារធាតុដែលមិនអាចខ្វះបានសម្រាប់ធ្វើអាគុយផងដែរ។
ការទាញធ្វើអាជីវកម្មរ៉ែទាំងនេះទាមទារនូវការវិនិយោគដ៏សម្បើម។ ហើយដែនដីអ៊ុយក្រែនដែលយោធារុស្ស៊ីកំពុងកាន់កាប់ មានរ៉ែ ជាច្រើនដូចជា អាប៉ាទីត តង់តាល់ នីញ៉ូប៊ីយ៉ូម ស្រូនត្យូម រ៉ែកម្រ និងសារធាតុអ៊ុយរ៉ាញ៉ូមជាដើម។
Daily Program
