ច្បាប់ស្តីពី ការប្រឆាំងការមិនទទួលស្គាល់ឧក្រិដ្ឋកម្មដែល ប្រព្រឹត្តឡើងក្នុងរយៈកាលនៃកម្ពុជាប្រជាធិបតេយ្យ ត្រូវបានប្រកាសឱ្យប្រើប្រាស់

ព្រះករុណា ព្រះបាទសម្តេច ព្រះបរមនាថ នរោត្តម សីហមុនី ព្រះមហាក្សត្រនៃកម្ពុជា បានចេញព្រះរាជក្រម ប្រកាសឱ្យប្រើ ច្បាប់ស្តីពី ការប្រឆាំងការមិនទទួលស្គាល់ឧក្រិដ្ឋកម្មដែល ប្រព្រឹត្តឡើងក្នុងរយៈកាលនៃកម្ពុជាប្រជាធិបតេយ្យ។

យោងតាមព្រះរាជក្រម ចេញថ្ងៃទី១មីនា ឆ្នាំ២០២៥ បានចែងថា ជនណាមិនទទួលឧក្រិដ្ឋកម្មនេះ នឹងប្រឈមជាប់ពន្ធនាគារពី១ឆ្នាំ ទៅ៥ឆ្នាំ។ ច្បាប់ស្ដីពី ការប្រឆាំងការមិនទទួលស្គាល់ឧក្រិដ្ឋកម្មដែល ប្រព្រឹត្តឡើងក្នុងរយៈកាលនៃកម្ពុជាប្រជាធិបតេយ្យ មានចំនួន៧មាត្រា។ ច្បាប់នេះ នឹងផ្តន្ទាទោសចំពោះជនទាំងឡាយណា មិនទទួលស្គាល់ ឬសម្រាល ឬបដិសេធ ឬជំទាស់អត្ថិភាពនៃឧក្រិដ្ឋកម្ម ឬលើកតម្កើងឧក្រិដ្ឋកម្ម ដែលប្រព្រឹត្តឡើង​ នាសម័យខ្មែរក្រហម។

មាត្រា៣ដដែល បានបញ្ជាក់ពី បទមិនទទួលជាសាធារណៈនូវឧក្រិដ្ឋកម្ម ដែលព្រឹត្តឡើងនាសម័យខ្មែរក្រហមនេះ នឹងផ្តន្ទាទោសលើជនទាំងឡាយណា ដែលបញ្ចេញសម្ដី ឬកាយវិការ នៅទីសាធារណៈ ឬនៅក្នុងសាលប្រជុំ មិនទទួលស្គាល់ ឧក្រិដ្ឋកម្ម នាសម័យខ្មែរក្រហម។ ជនទាំងឡាយ មិនទទួលស្គាល់ឧក្រិដ្ឋកម្មនាសម័យខ្មែរក្រហម តាមលិខិត ឬគំនូរ ដែលផ្សព្វផ្សាយ ក្នុងចំណោមសាធារណជន ឬដាក់តាំង ឱ្យសាធារជនមើល ត្រូវមានទោស។ ចំពោះការផ្សាយ តាមបណ្ដាញសង្គម ឬគ្រប់មធ្យោបាយ ទូរគមនាគមន៍ សោតទស្សន៍ សម្រាប់សាធារណជន ពីការមិនទទួលស្គាល់ឧក្រិដ្ឋកម្មនាសម័យខ្មែរក្រហម ក៏ជាប់ទោសដែរ។ 

យ៉ាងណាក៏ដោយមាត្រា៥ បានសង្កត់ធ្ងន់បែបនេះ៖ «នីតិបុគ្គល អាចត្រូវបានប្រកាសថា ត្រូវទទួលខុសត្រូវ ព្រហ្មទណ្ឌតាមលក្ខខណ្ឌ ដែលមានចែង ក្នុងក្រមព្រហ្មទណ្ឌ ចំពោះបទល្មើស ដែលមានចែងក្នុងមាត្រា៣នៃច្បាប់នេះ។ នីតិបុគ្គល ត្រូវផ្ដន្ទាទោស ពិន័យជាប្រាក់ ៥០ ០០០ ០០០ (ហាសិបលាន)រៀល) ទៅ ៥០០០ ០០០ ០០០ (ប្រាំរយលាន)រៀល ព្រមទាំងទោសបន្ថែមមួយ ឬច្រើនដែលមានចែង ក្នុងមាត្រា១៦៨(ទោសបន្ថែមអនុវត្តចំពោះនីតិបុគ្គល) នៃក្រមព្រហ្មទណ្ឌ»។ 

ច្បាប់ប្រឆាំងការមិនទទួលស្គាល់ ឧក្រិដ្ឋកម្ម ដែលប្រព្រឹត្តឡើងក្នុងរយៈកាល នៃកម្ពុជាប្រជាធិបតេយ្យ ត្រូវបានរៀបចំឡើង ដើម្បីផ្តន្ទាទោសចំពោះបុគ្គល ទាំងឡាយដែលមិនទទួលស្គាល់ ឬសម្រាល ឬបដិសេធ ឬជំទាស់អត្ថិភាពនៃឧក្រិដ្ឋកម្ម ឬលើកតម្កើងឧក្រិដ្ឋកម្ម ដែល​ប្រព្រឹត្តឡើង ក្នុងរយៈកាល នៃកម្ពុជាប្រជាធិបតេយ្យ ឬអំឡុងសម័យខ្មែរក្រហម។ អត្ថិភាពនៃឧក្រិដ្ឋកម្មនាសម័យខ្មែរក្រហម ត្រូវបានទទួលស្គាល់ ដោយសេចក្តីសម្រេចស្ថាពរ ឬនៅក្នុងកិច្ចដំណើរការនីតិវិធីរបស់ អង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក) ដើម្បីកាត់សេចក្តីឧក្រិដ្ឋកម្ម ដែលប្រព្រឹត្តឡើងក្នុងរយៈកាលនៃកម្ពុជាប្រជាធិបតេយ្យ។ ការកាត់ក្ដីនេះ ធ្វើឡើងក្នុងគោលបំណងផ្តល់យុត្តិធម៌ដល់ជនរងគ្រោះ នៅក្នុងរបបខ្មែរក្រហម និងទប់ស្កាត់កុំឱ្យឧក្រិដ្ឋកម្មទាំងនោះ វិលត្រឡប់មកវិញ៕