ក្រុមលោកអភិបាលព្រះសហគមន៍អាស៊ីអំពាវនាវជាបន្ទាន់អំពីសន្តិភាព យុត្តិធម៌ និង សីលធម៌

សភាលោកអភិបាលព្រះសហគមន៍កាតូលិកអាស៊ី បានចេញសេចក្តីអំពាវនាវយ៉ាងមុតមាំមួយសម្រាប់សន្តិភាព យុត្តិធម៌ និងការទទួលខុសត្រូវខាងសីលធម៌ ដោយជំរុញឱ្យមានការបញ្ចប់អំពើហិង្សា និងការប្តេជ្ញាចិត្តឡើងវិញចំពោះការសន្ទនា ចំពេលមានភាពតានតឹងទូទាំងពិភពលោកកើនឡើង។

នៅក្នុងសេចក្តីថ្លែងការណ៍មួយចុះថ្ងៃទី ១៥ ខែមេសា ឆ្នាំ ២០២៦ ដែលមានចំណងជើងថា "អ្នកបង្កើតសន្តិភាពគឺជាអ្នកដែលមានពរ" ថ្នាក់ដឹកនាំព្រះសហគមន៍នៅអាស៊ី បានអំពាវនាវឱ្យ "មនុស្សទាំងអស់ដែលមានសុច្ឆន្ទៈ និងអ្នកដែលត្រូវបានប្រគល់ភារកិច្ចក្នុងចំណោមប្រជាជាតិ" សូមធ្វើសកម្មភាពយ៉ាងម៉ឺងម៉ាត់ដើម្បីបញ្ឈប់ជម្លោះដែលកំពុងបន្ត និងលើកកម្ពស់ការផ្សះផ្សា។

ក្រុមលោកអភិបាលអាស៊ីបានព្រមានប្រឆាំងនឹងការធ្វើឱ្យមានលក្ខណៈធម្មតានៃអំពើហិង្សា និងការប្រើប្រាស់ជំនឿខុសដើម្បីបង្ហាញអំពីភាពត្រឹមត្រូវនៃសង្គ្រាម។ ពួកគេបានសង្កត់ធ្ងន់ថា សន្តិភាពត្រូវតែមានឫសគល់នៅក្នុងយុត្តិធម៌ ការសន្ទនា និងការគោរពសេចក្តីថ្លៃថ្នូររបស់មនុស្ស។

សេចក្តីថ្លែងការណ៍នេះបានគូសបញ្ជាក់ថា ការធ្វើជាអ្នកផ្សះផ្សាគឺ "មិនមែនជាឧត្តមគតិដ៏វិសុទ្ធ" ទេ ប៉ុន្តែជាកាតព្វកិច្ចខាងសីលធម៌។

សេចក្តីថ្លែងការណ៍នេះបានព្រមានថា នៅក្នុងសម័យកាលដែលស្ថាប័នសកលកំពុងចុះខ្សោយ និងការពឹងផ្អែកលើកម្លាំង និងការត្រួតត្រាកាន់តែខ្លាំងឡើង ប្រជាជាតិនានាត្រូវតែទប់ទល់នឹងការល្បួងឱ្យបោះបង់ចោលការសន្ទនា។

ក្រុមលោកអភិបាលអាស៊ីបានអំពាវនាវឲ្យ បញ្ចប់អរិភាពដែលកំពុងបន្ត និងបញ្ឈប់វដ្តនៃអំពើហិង្សាដែលទាមទារជីវិតមនុស្សស្លូតត្រង់ ត្រឡប់ទៅរកការចរចាវិញដោយស្មោះត្រង់និងភាពក្លាហាន លើកកម្ពស់ច្បាប់អន្តរជាតិនិងបទដ្ឋានមនុស្សធម៌ និង លើកកម្ពស់ការទូតសីលធម៌ជាដើម៕