លោកលី កេឈៀងជាមេដឹកនាំចិន​ដែលការពារ ទស្សនទាន​នៃសង្គមសុខ ដុមរមនីយកម្ម

លោកលី កេឈៀង កើតនៅថ្ងៃទី១ ខែកក្កដា ឆ្នាំ១៩៥៥ នៅទីក្រុងហេហ្វ៉េ ខេត្តអានហួយ  ប្រទេស​ចិន។ លោកទទួលមរណភាពនៅថ្ងៃទី២៧ ខែតុលា ឆ្នាំ២០២៣ នៅទីក្រុងសៀហៃ។ លោកគឺជារដ្ឋ បុរស​ចិន។

លោកលី កេឈៀង គឺជានាយករដ្ឋមន្រ្តីនៃសាធារណរដ្ឋប្រជាមានិតចិនពីថ្ងៃទី១៥ ខែមីនា ឆ្នាំ ២០១៣ ដល់ថ្ងៃទី១១ ខែមីនា ឆ្នាំ២០២៣។

នៅខែមីនា ឆ្នាំ១៩៧៤ នៅអំឡុងបដិវត្តវប្បធម៌ លោកលី កេឈៀង ត្រូវបានបញ្ជូនទៅនៅ ជនបទនៅក្នុងក្របខណ្ដនៃចលនាបញ្ជូនយុវជនដោយបង្ខំឲ្យទៅរៀន​សូត្រនៅជនបទ។ លោកត្រូវបានទទួលឲ្យស្នាក់នៅក្នុងភូមិមួយក្បែរកន្លែងកំណើតរបស់ម្តាយលោក និងនៅ​ក្នុង​ស្រុកដែល​ឪពុករបស់លោកបានដឹកនាំនៅក្នុងទសវត្សឆ្នាំ១៩៥០។

នៅសកលវិទ្យាល័យប៉េកាំង លោកចាប់អារម្មណ៍នឹងគំនិតសេរី និងប្រជាធិបតេយ្យ។ លោក​រៀន​សូត្រទទួលបានសញ្ញាបត្រច្បាប់ និងបណ្ឌិតសេដ្ឋកិច្ច។

នៅឆ្នាំ១៩៨០ លោកលី កេឈៀង ត្រូវបានបោះឆ្នោតជាប់ជាអគ្គលេខា​នៃសម្ព័ន្ធយុវជន​កុំមុយនីស្ត​នៃសកលវិទ្យាល័យប៉េកាំង។ នៅឆ្នាំ១៩៨២ លោកចូលទៅក្នុងអគ្គលេខាដ្ឋាននៃ​សម្ព័ន្ធ​​យុវជន​កុំមុយនីស្ត​ដែលលោកដើរ​តាមលោកហ៊ូ ជីនតាវ។

នៅខែមិថុនា ឆ្នាំ១៩៨៨ លោកលី កេឈៀង គឺជាអភិបាលដែលមានវ័យក្មេងបំផុតនៃប្រទេស និង​ជា​អភិបាល​ខេត្តហេណាន។ បន្ទាប់មកលោកត្រូវបានតែងតាំងជាលេខានៃគណៈកម្មាធិការ​នៃបក្ស​កុំមុយនីស្ត​នៃខេត្ត​លៀវនីង។

នៅខែតុលា ឆ្នាំ២០០៧ លោកត្រូវបានបោះឆ្នោតជាប់នៅគណៈកម្មាធិការ​អចិន្រ្តៃយ៍នៃ​ការិយាល័យ​នយោបាយ មុននឹងត្រូវបានបោះឆ្នោតជាប់នៅខែមីនា ឆ្នាំ២០០៨ ជាឧបនាយករដ្ឋ​មន្រ្តី​ដោយ​សភា​ជាតិ​ប្រជាជន​ចិន។ នៅឋានៈនេះ លោកស្នងតំណែងបន្តពីលោកវេន ជៀបាវ ជា​នាយករដ្ឋមន្រ្តីនៅថ្ងៃទី១៥ ខែមីនា ឆ្នាំ២០១៣។

នៅអំឡុងដំណើរទស្សនកិច្ចដ៏កម្រនៅទីបេ នៅឆ្នាំ២០១៨ លោកសុំឲ្យមេដឹកនាំពុទ្ធសាសនា​​ការពារ​ភាពរួបរួមនៃជនជាតិភាគតិច។ នេះគឺជារបៀបនិយាយសម្រាលដើម្បីរំឭកឲ្យមានភាពស្មោះត្រង់ចំពោះគណបក្សកុំមុយនីស្ត​ចិន។

ដោយរាប់បញ្ចូលក្នុងចំណោម​មេដឹកនាំចិនដែលមានសញ្ញាបត្រខ្ពស់បំផុតចាប់តាំងពី​ឆ្នាំ​១៩៤៩  លោក​លី កេឈៀង មានភាពបត់បែនតិចជាងក្នុងការសម្រេចចិត្ត​បើប្រៀបធៀប​ជាមួយ​លោកស៊ី ជីន​ពីង។ អ្នក​ជំនាញអំពីប្រទេសចិន លោកហ្ស៉ង់ ព្យែរ៍ កាបេស្តង់ បានប្រាប់ឲ្យ​ដឹងថា ទោះបីជាលោកលី កេឈៀង គឺជាមនុស្សទី២ជាផ្លូវការនៃរបបនៅចិន អំណាចជា​ច្រើន​ត្រូវ​បានផ្ទេរទៅក្រុម​មេដឹកនាំ​របស់​គណបក្ស​កុំមុយនីស្តចិនដែលដឹកនាំដោយលោកស៊ី ជីនពីង។

នៅមហាសន្និបាទបក្សកុំមុយនីស្តចិនលើកទី២០ នៅខែ តុលា ឆ្នាំ២០២២ លោកលី ឈៀង ដែល​ជាអ្នកសហការណ៍ស្និទ្ធនឹងលោកស៊ី ជីនពីង ត្រូវ​បាន​ប្រកាសឲ្យធ្វើជានាយករដ្ឋមន្រ្តី​បន្តពីលោកលី កេឈៀង។

នៅរសៀល ថ្ងៃទី២៦ ខែតុលា ឆ្នាំ២០២៣ នៅអំឡុងវិស្សមកាលនៅទីក្រុងសៀងហៃ លោកលី កេឈៀង បានគ្រោះថ្នាក់ដោយរោគគាំងបេះដូង នៅអាងហែទឹកសណ្ឋាគារ។ ដោយត្រូវបញ្ជូន​បន្ទាន់​ទៅ​កាន់មន្ទីរពេទ្យ លោកបានស្លាប់នៅថ្ងៃទី២៧ ខែតុលា នៅ​អាយុ ៦៨ឆ្នាំ។

លោកលី កេឈៀង គឺជាមេដឹកនាំម្នាក់ក្នុងចំណោមមេដឹកនាំជាច្រើន​ដែលការពារទស្សនទាន​នៃ​សង្គមសុខដុមរមនីយកម្មដែលត្រូវបានអភិវឌ្ឍដោយអតីតប្រធានាធិបតីមុន គឺលោកហ៊ូ ជីនតាវ។