អគ្គីភ័យ កើតមានសឹងតែរាល់ថ្ងៃ សូមប្រុង​ប្រយ័ត្ន

គ្រោះអគ្គីភ័យនៅក្នុងរយៈពេលចុងក្រោយនេះ បានកើតមានឡើងសឹងតែរាល់ថ្ងៃដោយឆេះតាំងពីលំនៅស្ថាន ឃ្លាំង រហូតដល់សាលារៀន ដែលយើងទាំងអស់គ្នាគប្បីយកចិត្តទុកដាក់និង លើកកំពស់ការប្រុងប្រយ័ត្នបន្ថែមទៀតដើម្បីធ្វើយ៉ាងណាអាចជួយកាត់បន្ថយហានិភ័យនេះបានមួយភាគដែរ។

គិតតាំងពីដើមខែមករា រហូតដល់ថ្ងៃទី​១៨ ខែមីនា ឆ្នាំ២០២៦កន្លងទៅស្ថិតិពីនាយកដ្ឋាននគរបាល បង្ការ ពន្លត់អគ្គីភ័យ និងសង្គ្រោះ នៃអគ្គស្នងការដ្ឋាននគរបាលជាតិ ដែលសារព័ត៌មាននានាបានដកស្រង់គឺមាន ២៤៧ ករណី។

នេះគឺជាស្ថិតិមូលដ្ឋានគិតត្រឹមពេលនោះ ប៉ុន្តែបើបូកទាំងករណីដែលកើតមានមកដល់ពេលនេះ គឺវាទំនងជាកាន់តែច្រើន។ នាយកដ្ឋាននគរបាល បង្ការ ពន្លត់អគ្គីភ័យ និងសង្គ្រោះ នៃអគ្គស្នងការដ្ឋាននគរបាលជាតិ បានចែករំលែកថា គ្រោះមហន្តរាយនេះ វាកើតមានសឹងតែរាល់ថ្ងៃ។

ជាក់ស្តែងកាលពីថ្ងៃទី២៤ ខែមេសា ឆ្នាំ២០២៦ មានសេចក្តីរាយការណ៍ថា ឆេះ​សាលា​រៀនមួយ​កន្លែង​ដែល​ស្ថិត​នៅ​ សង្កាត់​ ភ្នំពេញថ្មី​ ខណ្ឌ​ សែនសុខ ក៏ដូចជាឆេះរថយន្ត​ក្នុង​ឃ្លាំង​មួយ​កន្លែង​ដែល​ស្ថិត​នៅ​ សង្កាត់​ ចោមចៅ​ទី២​ ខណ្ឌ​ ពោធិ៍​សែនជ័យ។ ហើយនៅថ្ងៃទី ២៣ ខែដដែល គឺមានសេចក្តីរាយការណ៍ឆេះលំនៅដ្ឋានមួយកន្លែងសង្កាត់​និរោធ ខណ្ឌ​ច្បារអំពៅ ជាដើម។

ជាការពិតរឿងគ្រោះអគ្គីភ័យនេះគ្មានពីណាចង់ជួបនោះទេ ប៉ុន្តែវាកើតមានឡើង​ហើយ មួយផ្នែកនៃគ្រោះថ្នាក់នេះវាកើតពីការធ្វេសប្រហែស ឬ មើលស្រាល លើបញ្ហាផ្សេងៗ។

តាមការកត់ត្រារបស់សមត្ថកិច្ចបានឲ្យដឹងថា មូលហេតុដែលនាំឲ្យមានគ្រោះអគ្គីភ័យនេះកើតមានឡើងមាន២ធំៗ គឺការឆ្លងចរន្តអគ្គិសនី៤២.១៣% ប្រើប្រាស់ភ្លើង៣៩.៥៨% ហើយបញ្ហាដែលមិនដឹងពីមូលហេតុមាន១៨.២៩%។

រាជធានីភ្នំពេញកើតមានករណីគ្រោះថ្នាក់អគ្គីភ័យសរុប៥៣កើន១១លើក ខេត្តកណ្តាល​កើតឡើងចំនួន ២៧និងថយចុះ១១លើក។

សរុបទៅ គ្រោះអគ្គីភ័យដែលកំពុងកើតមានជាបន្តបន្ទាប់នៅពេលនេះ មិនមែនជាបញ្ហាធម្មតាដែលអាចមើលរំលងបានទៀតទេ ប៉ុន្តែវាបានក្លាយជាសញ្ញាព្រមានដ៏ច្បាស់លាស់មួយអំពីភាពខ្វះការប្រុងប្រយ័ត្ន និងការគ្រប់គ្រងសុវត្ថិភាពនៅក្នុងជីវិតប្រចាំថ្ងៃ។ ទិន្នន័យបានបង្ហាញយ៉ាងច្បាស់ថា មូលហេតុភាគច្រើនកើតចេញពីមនុស្ស ជាពិសេសការប្រើប្រាស់អគ្គិសនីដោយគ្មានស្តង់ដារ ឬការមិនយកចិត្តទុកដាក់លើហានិភ័យតូចៗដែលអាចនាំទៅកាន់គ្រោះធំបាន។ ដូច្នេះ ការកាត់បន្ថយគ្រោះអគ្គីភ័យ មិនអាចផ្អែកលើសមត្ថកិច្ចតែប៉ុណ្ណោះទេ ប៉ុន្តែត្រូវការចូលរួមពីគ្រប់ភាគី ចាប់ពីគ្រួសារ សហគមន៍ រហូតដល់ស្ថាប័នពាក់ព័ន្ធ។ ការពង្រឹងការយល់ដឹងសាធារណៈ ការត្រួតពិនិត្យប្រព័ន្ធអគ្គិសនីជាប្រចាំ ការរៀបចំឧបករណ៍ពន្លត់អគ្គីភ័យ និងការអនុវត្តវិធានការសុវត្ថិភាពឲ្យបានតឹងរឹង គឺជាចំណុចសំខាន់ដែលមិនអាចខ្វះបាន៕