នៅប្រទេសជិតខាងដូចជាករណីនៅវៀតណាម ឲ្យតែមានករណីមិនប្រក្រតីអ្នកបង្កមិនដែលរួចខ្លួនឡើយ គឺសមត្ថកិច្ចស្រុកគេតែងតែស្រាវជ្រាវវែកមុខរហូតដល់តែឃើញផ្តល់យុត្តិធម៌ដល់ពលរដ្ឋជាបន្តបន្ទាប់ ប៉ុន្តែនៅកម្ពុជាយើង ឃើញចាប់បានរបស់មិនប្រក្រតីជាបន្តបន្ទាប់ដែរ តែមិនដែលបង្ហាញជនបង្ករទាំងនោះឡើយ។
តាមសារព័ត៌មានវៀតណាម VN Express កាលពីពេលថ្មីៗនេះ សមត្ថកិច្ចវៀតណាមទើបតែបានប្រកាសកាត់ទោសមនុស្សមួយក្រុមតាំងពីប្រធានក្រុមហ៊ុនរហូតដល់អ្នកផ្សំគំនិត ក្រោយពេលដែលគេបានរកឃើញករណីផលិតផលទឹកដោះគោក្លែងក្លាយមួយ ដែលមានទឹកប្រាក់ប្រមានជា ៩១,៣៥លានដុល្លារ ដោយជនបង្កត្រូវផ្តន្ទាទោសមនុស្សជិត២០នាក់ដាក់ពន្ធនាគារ ពី ១៥ខែរហូតដល់៣០ឆ្នាំ។
ក្រៅពីនោះ ករណីយកផលិតផលសាច់ជ្រូកនៅក្នុងស្រុកយកទៅស្តុកក្លែងបន្លំធ្វើសាច់ជ្រូកប្រណិតនាំចូលពីអូស្រ្តាលី ហើយករណីក្រុមជនខិលខូចលួចទៅកាយខ្មោចជ្រូកដែលគេកប់ចោលដោយសារតែជំងឺ យកមកកាប់ចែកចាយលក់ក៏ត្រូវសមត្ថកិច្ចប្រទេសគេវែកមុខយកទៅផ្តន្ទាទោសផងដែរ។
នេះគឺជារឿងនៅវៀតណាមទេ ហើយយើងក៏មិនចង់ប្រៀបធៀបដែរ ប៉ុន្តែយើងក៏ចង់ឃើញស្រុកយើងអ្នកខុសត្រូវមានទោស ហើយអ្នករងគ្រោះទទួលបានយុត្តិធម៌បែបនេះដែរ។នៅក្នុងស្រុកយើងពលរដ្ឋដែលរងគ្រោះព្រោះផលិតផលក្លែងក្លាយឬខូចគុណភាព ឬមានសារធាតុគីមីនេះនេះមានជាបន្តបន្ទាប់ ប៉ុន្តែជាទូទៅយើងដូចជាមិនដែលរកឃើញអ្នកដែលទទួលខុសត្រូវ។
ជាក់ស្តែងតាមសារព័ត៌មាននៅក្នុងស្រុកចុះផ្សាយ កាលពីពេលថ្មីៗនេះ កម្លាំងការិយាល័យនគរបាលប្រឆាំងបទល្មើសសេដ្ឋកិច្ច សហការជាមួយអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ បានធ្វើការបង្ក្រាបសាច់ជ្រូក និងសាច់មាន់បង្កកចំនួន១១.៥តោន ដែលគ្មានគុណភាព និងសុវត្ថិភាពយកទៅដុតបំផ្លាញចោល។
ចំណាត់ការនេះបានកើតសម្រេចឡើងក្រោយពេលដែលមន្ត្រីជំនាញបានតាមដានស្រាវជ្រាវថា វាត្រូវបានលួចនាំចូលដោយ គ្មានលិខិតស្នាម និងខូចគុណភាព តាមច្រកមកពីខេត្តស្វាយរៀង មកចែកចាយនៅរាជធានីភ្នំពេញ។
នៅក្នុងករណីនេះសមត្ថកិច្ចបង្ហាញតែវត្ថុតាងដែលជាសាច់ដែលរឹបអូសនេះ ប៉ុន្តែមិនបានឲ្យដឹងថា វាជារបស់នរណាឡើយ ដូច្នេះមើលទៅករណីទាំងនេះទំនងជាដូចករណីមុនៗទៀតហើយ។
សរុបទៅយើងជាប្រជាពលរដ្ឋដែលអាចជាអ្នកដែលទទួលទានផលិតផលដែលក្រុមនេះធ្លាប់នាំចូលពីមុនមក គឺពិតជារងផលប៉ះពាល់សុខភាពដោយប្រយោល ដូច្នេះយើងពិតជាចង់ដឹងថា នរណាជាអ្នកទទួលខុសត្រូវ ដើម្បីយើងបានយុត្តិធម៌៕
Daily Program
