តើមន្រ្តីដែលទទួលខុសត្រូវរឿងស្កែមអនឡាញអស់ឫនៅ?

មន្រ្តីនិងអ្នកពាក់ព័ន្ធនឹងឧក្រិដ្ឋកម្មស្កែមអនឡាញចំនួន៤រូបទៀតត្រូវបានបញ្ចូលក្នុងបញ្ជីអ្នកដែលត្រូវគេជឿថាជាអ្នកពាក់ព័ន្ធនឹងឧក្រិដ្ឋកម្មនេះនៅកម្ពុជាបន្ថែមបន្ទាប់ពីព្រះរាជអាជ្ញារង​និងឧកញ៉ាម្នាក់ ដែលត្រូវបានឃាត់ខ្លួនកន្លងមក ។​

អ្នកទាំង៤ដែលមានពីរនាក់ជាមន្រ្តីសមត្ថកិច្ចជាន់ខ្ពស់ពីររូប ត្រូវបានអង្គភាព​ប្រឆាំង​អំពើ​ពុក​រលួយ ​រៀប​ចំ​បញ្ជូន​សំណុំ ទៅ​កាន់​សាលាដំបូង​រាជធានី​ភ្នំពេញហើយ ពាក់ព័ន្ធ​ករណី​ទទួល​សំណូក​ពី​ក្រុមស្កែមអនឡាញ និង​សម្អាត​ប្រាក់ ។

អ្នកទាំង៤នេះត្រូវបានឃាត់ខ្លួននិងកសាងសំណុំរឿងក្រោយពេលដែលអង្គភាពប្រឆាំងអំពីពុករលួយ ​បើក​ប្រតិបត្តិការ​ស៊ើបអង្កេត​រយៈពេល​២០​ថ្ងៃ​ ហើយពួកគេអាចជាក្រុមមនុស្សជាមន្រ្តីជាន់ខ្ពស់ដំបូងចាប់តាំងពីកម្ពុជាមានច្បាប់ប្រឆាំងនឹងឧក្រិដ្ឋកម្មនេះ ដោយក្រោមច្បាប់ជនដែលប្រពឹត្តិនឹងករណីនេះអាច ត្រូវផ្តន្ទាទោសរហូតដល់ទៅអស់មួយជីវិត ។​

តើក្រៅពីពួកគេទាំង៤នាក់នេះ វានៅមានអ្នកដែលពាក់ព័ន្ធផ្សេងទៀតដែរឫទេដែលឈរនៅពីក្រោយឧក្រិដ្ឋកម្មដែលជាប្រភពសេដ្ឋកិច្ចខ្មៅនៅកម្ពុជានោះ ?

តាមពិតទៅស្កែមអនឡាញនេះទំនងជាអាចនៅមានអ្នកដែលពាក់ព័ន្ធច្រើនជាងនេះ ពីព្រោះប្រតិបត្តិការមួយរយៈពេលកន្លងមកនេះគឺឃើញថា មានទំហំធំធេងណាស់ ។

យោងតាមស្ថិតិពីលេខាធិការដ្ឋាននៃគណៈកម្មាធិការជាតិប្រឆាំងការឆបោកបច្ចេកវិទ្យាចន្លោះខែកក្កដា ឆ្នាំ២០២៥ និងពាក់កណ្តាលខែមេសា ឆ្នាំ២០២៦ ដែលចុះផ្សាយដោយសារព័ត៌មាននានាបានបង្ហាញថា ស្ថាប័នអនុវត្តច្បាប់កម្ពុជាបានស៊ើបអង្កេតរហូត២៥០ ករណី នៅ៩១ទីតាំងទូទាំងប្រទេស ហើយវះកាត់បញ្ជូនទៅតុលាការ១១២ករណី នៅក្នុងនោះជនសង្ស័យប្រហែល ១.០៨៩ នាក់ដែលមាន ចិន ថៃ វៀតណាម ជប៉ុន កូរ៉េខាងត្បូង សិង្ហបុរី និងកម្ពុជា។ ដោយឡែកពីគ្នា ចាប់ពីខែមករា ឆ្នាំ២០២៥ ដល់ថ្ងៃទី១៩ ខែមេសា ឆ្នាំ២០២៦ អាជ្ញាធរបាននិរទេសជនបរទេសចំនួន ១៣.០៣៩ នាក់មកពីប្រទេសចំនួន ៣៣ ចេញពីកម្ពុជា ។

នៅក្នុងប្រតិបត្តិការនេះ ភាគច្រើននៃទីតាំងដែលត្រួតពិនិត្យគឺសុទ្ធតែអគារធំៗ ដែលពលរដ្ឋមានថានៈនិងតួនាទីល្មមៗគឺមិនអាចមានសមត្ថភាពទៅពាក់ព័ន្ធនឹងឧក្រិដ្ឋកម្មនេះបានឡើយ ដូច្នេះសង្ឃឹមថា សមត្ថកិច្ចជំនាញ ជាពិសេសគឺអង្គភាពប្រឆាំងនឹងអំពើពុករលួយនឹងបន្តវែកមុខរកអ្នកដែលនៅពីក្រោយឧក្រិដ្ឋកម្មនេះ មកផ្តន្ទាទោសតាមច្បាប់បន្តទៀតដើម្បីលាងសំអាតកេរ្តិ៍ឈ្មោះកម្ពុជា ។