អ្នកកណ្តាលនិយមជាប់ឆ្នោតជាប្រធានាធិបតីថ្មីរបស់អ៊ីរ៉ង់​

លោក ម៉ាស៊ូត ប៉េចេស្ខេន (Masoud Pezeshkian ) ដែលគេចាត់ទុកថាជា រដ្ឋបុរស​ម្នាក់​ដែល​និយមកណ្តាល បាន​ឈ្នះ​ការ​បោះឆ្នោត​ប្រធានាធិបតី​អ៊ីរ៉ង់។

លោកជាអតីតរដ្ឋមន្ត្រីសុខាភិបាលអ៊ីរ៉ង់ ហើយបានឈ្នះការបោះឆ្នោតប្រធានាធិបតីរបស់ប្រទេសនេះ ធ្វើឱ្យអ្នកអត្ថាធិប្បាយជាច្រើនភ្ញាក់ផ្អើល និងជំរុញឱ្យអ្នកគាំទ្ររបស់គាត់អបអរពេញមួយយប់។

លទ្ធផល​នេះ​កើត​ឡើង​បន្ទាប់​ពី​ការ​ប្រកួត​ជុំ​ទី​ពីរ​រវាង លោក និងលោក សាអ៊ីត ចាលីលី (Saeed Jalili) អតីត​ប្រធាន​អ្នក​ចរចា​លើ​បញ្ហា​នុយក្លេអ៊ែរអ៊ីរ៉ង់។

លោកប្រធានាធិបតីថ្មី បានទទួលសម្លេងគាំទ្រជាង ១៦ លាននាក់នៃអ្នកដែលមានសិទ្ធិបោះឆ្នោត ៣០,៥ លាននាក់ ស្របពេលដែល អ្នកចូលរួមបោះឆ្នោតមានចំនួនត្រឹមតែជិត​៥០ភាគរយ។

លោកជាមេដឹកនាំថ្មីដែលមានអាយុ​៦៩ ឆ្នាំ ដែលមានអតីតភាពជាគ្រូពេទ្យវះកាត់បេះដូង ។ នៅមុនជាប់ឆ្នោតលោកជាសមាជិកសភា ហើយក៏ធ្លាប់ធ្វើជាអនុប្រធានសភាពអ៊ីរ៉ង់ផងដែរ ។​

លោកបានជាប់ឆ្នោត ក្រោយពេលដែលប្រធានាធិបតីពីមុនបានទទូលមរណៈដោយសារតែឧបត្តិហេតុធ្លាក់ ឧទ្ធម្ភាគចក្រកាលពីថ្ងៃទី ១៩ ខែឧសភា៕