សហភាពពលកម្មជាតិកម្ពុជាតំណាងកម្មករ៧ម៉ឺននាក់ ព្រមានធ្វើកូដកម្មទ្រង់ទ្រាយធំប្រឆាំងអង្គការសង់ត្រាល់
សហភាព ពលកម្មជាតិ កម្ពុជា (NLC) បានស្នើឱ្យស្ថាប័នសមត្ថកិច្ចពាក់ព័ន្ធស្រាវជ្រាវ ចាត់វិធានការតាមផ្លូវច្បាប់ចំពោះអ្នកនៅពីក្រោយខ្នងអង្គការសង់ត្រាល់ និងអង្កេតទៅលើជំនួយផ្សេងៗ ដែលអង្គ ការនេះបានទទួលមកដើម្បីធ្វើសកម្មភាពជាប្រចាំ។
ការស្នើនេះធ្វើឡើងតាមរយៈសេចក្តីថ្លែងការណ៍របស់សហភាពពលកម្មជាតិ កម្ពុជា (NLC) ជូនបណ្តាញអ្នកបញ្ជាទិញ ចំពោះរបាយការណ៍មជ្ឈមណ្ឌលសម្ព័ន្ធភាពការងារ និងសិទ្ធិមនុស្សហៅកាត់ថាសង់ត្រាល់ ដែលចុះហត្ថលេខាដោយលោក សំ សឿន ប្រធានសហភាពពលកម្មជាតិ កម្ពុជា (NLC) ចុះថ្ងៃទី២៤ ខែមិថុនានេះ។
សហភាព ពលកម្មជាតិ កម្ពុជា (NLC) គឺជាអង្គការវិជ្ជាជីវៈ មួយដែលបម្រើផលប្រយោជន៍ និងការពារ សិទ្ធិសេរីភាពជូនកម្មករនិយោជិតទាំងអស់ក្នុងវិស័យវាយនភ័ណ្ឌកាត់ដេរសម្លៀកបំពាក់ផលិតស្បែកជើង កាបូប សណ្ឋាគារ ទេសចរណ៍ សំណង់ស៊ីវិល ផ្សារឯកជន និងកសិកម្ម ព្រមទាំងបងប្អូន ក្រុមសេដ្ឋកិច្ចក្រៅប្រព័ន្ធ ផងដែរ។
លោក សំ សឿន បានលើកឡើងក្នុងសេចក្តីប្រកាសថា ៖ « សហភាព ពលកម្មជាតិ កម្ពុជា (NLC) គឺពិតជាមានការសោកស្តាយយ៉ាងខ្លាំងចំពោះរបាយការណ៍អង្គការ សង់ត្រាល់ ដែលចេញផ្សាយកាលពីថ្ងៃ ទី០៤ ខែមិថុនា ឆ្នាំ២០២៤ដែលមានចំណងជើងថា របាយការណ៍ឧបសគ្គរារាំងភាពជាតំណាង ស្ដីពីសេរីភាព សហជីព ក្នុងប្រទេសកម្ពុជា ដែលមានចំនួន១២ទំព័រ»។
សហភាព ពលកម្មជាតិ កម្ពុជា (NLC) បានសង្កេតឃើញថា បច្ចុប្បន្នការចុះបញ្ជីការ សហភាព សហព័ន្ធ សហជីព សហជីពមូលដ្ឋានណាក៏អាចចុះបញ្ជីបានដែរ ឱ្យតែគោរពតាមលក្ខខ័ណ្ឌដែលបានចែងក្នុងច្បាប់សហ ជីពតម្រូវឱ្យបានត្រឹមត្រូវ។
«ហេតុនេះសូមអង្គការសង់ត្រាល់ពិនិត្យមើលចំណងជើងរបាយការណ៍របស់ខ្លួនឡើងវិញជៀសវាងជះឥទ្ធិពលអាក្រក់ខ្លាំងដល់អារម្មណ៍របស់អ្នកវិនិយោគទុនដែលមានស្រាប់ និងប៉ះពាល់ដល់អារម្មណ៍ អ្នកវិនិយោគទុនមកថ្មីដែលមានបំណងចង់មកវិនិយោគទុននៅប្រទេសកម្ពុជាផងដែរ»។
លោក សំ សឿន ថាអង្គការ សង់ត្រាល់ ធ្វើបែប នេះគឺផ្ទុយ និងគោលនយោបាយរបស់រាជរដ្ឋាភិបាលដែលមាន សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី ដែលបាននិងកំពុងស្វែងរកអ្នកវិនិយោគជាច្រើនដើម្បីនាំមកនូវការងារធ្វើជា ច្រើនជូនបងប្អូនកម្មករនិយោជិត ព្រមទាំងជំនាញផ្សេងៗក្នុងន័យអភិវឌ្ឍន៍ប្រទេសជាតិឱ្យសម្បូរុងរឿង។
ជាមួយគ្នានេះដែរ សហភាពពលកម្មជាតិកម្ពុជាតំណាងកម្មករ៧ម៉ឺននាក់ បានព្រមានធ្វើកូដកម្មទ្រង់ទ្រាយធំប្រឆាំងសកម្មភាពរបស់មណ្ឌលសម្ព័ន្ធភាពការងារ និងសិទ្ធិមនុស្សហៅកាត់ថា «សង់ត្រាល់» និងដាក់សេចក្តីថ្លែងការណ៍ ទៅកាន់ក្រសួងមហាផ្ទៃ ក្រសួងការងារ និងបណ្តុះបណ្តាលវិជ្ជាជីវៈ បណ្តាអ្នកបញ្ជាទិញ ស្ថានទូតនានា និងធ្វើសកម្មភាពផ្សេងៗទៀតមួយចំនួនទៀត។
ការប្រកាសធ្វើកូដកម្មទ្រង់ទ្រាយធំនេះធ្វើឡើងនៅព្រឹកថ្ងៃទី២៤ ខែមិថុនា ឆ្នាំ២០២៤ នាពេលធ្វើសន្និសីទសារព័ត៌នៅស្នាក់ការសហភាពពលកម្មជាតិកម្ពុជា នៅសង្កាត់ចោមចៅ២ ខណ្ឌពោធិ៍សែនជ័យ រាជធានីភ្នំពេញ ស្តីពីការចេញសេចក្តីថ្លែងការណ៍ ជូនអ្នកបញ្ជាទិញកុំឱ្យជឿលើរបាយការណ៍ «សង់ត្រាល់» ដែលផ្សព្វផ្សាយ បំភ្លៃការពិត ជ្រៀតជ្រែក ញុះញង់ បំភិតបំភ័យ បំបែកបំបាក់ លាបពណ៌សហជីពនៅកម្ពុជា។
លោកសំ សឿន ថា មិនមែនទាល់តែទទួលជំនួយពីបរទេសមកជេរ មកបង្អាប់បង្អោនប្រទេសជាតិខ្លួនឯង បំផ្លាញអត្ថប្រយោជន៍ស្របច្បាប់ របស់កម្មករខ្លួនឯងទើបហៅថា សហជីពឯករាជ្យនោះទេ ហើយក៏មិនមែនសហជីពដែលទទួលជំនួយពីសង់ត្រាល់ ទើបហៅថាសហជីពឯករាជ្យនោះដែរ សំខាន់គ្រប់គ្នាត្រូវអនុវត្តតាមច្បាប់។
លោកបញ្ជាក់ថា ៖ «អ៊ីចឹងពាក្យ ដែលសង់ត្រាល់កំពុងប្រើភ្ជាប់ជាមួយសហជីពឯករាជ្យ និងសហជីពពណ៌លឿងនេះ គឺបានធ្វើឱ្យមានការប៉ះពាល់យ៉ាងធ្ងន់ធ្ងរ ដល់ការអនុវត្តសិទ្ធិសេរីភាព របស់សហជីពទាំងអស់ ដែលធ្វើការយ៉ាងសកម្មបម្រើ និងការពារសិទ្ធ និងអត្ថប្រយោជន៍ កម្មករនិយោជិត»។
សហភាពពលកម្មជាតិកម្ពុជា បានស្នើសុំទៅស្ថាប័នសមត្ថកិច្ចពាក់ព័ន្ធស្រាវជ្រាវ ចាត់វិធានការតាម ផ្លូវច្បាប់ចំពោះអ្នកនៅពីក្រោយខ្នងអង្គការ សង់ត្រាល់ និងអង្គេតទៅលើជំនួយផ្សេងៗ ដែលអង្គការ សង់ត្រាល់ បានទទួលមកដើម្បីធ្វើសកម្មភាពជាប្រចាំក្នុងចេតនាបញ្ហា បំប៉ោងការពិត ញុះញុង បំផ្លិចបំផ្លាញសន្តិសុខសណ្តាប់ធ្នាប់ សាធារណៈ ក្នុងគោលបំណងបង្កឱ្យមានអស្ថេរភាព និងនាំអោយខាតប្រយោជន៍ កម្មករនិយោជិត និងសង្គមជាតិទាំងមូល។
សូមរម្លឹកថា មជ្ឈមណ្ឌលសម្ព័ន្ធភាពការងារ និងសិទ្ធិមនុស្សហៅកាត់ «សង់ត្រាល់» បានចេញរបាយការណ៍កាលពីថ្ងៃទី៤ ខែមិថុនា ស្តីពីស្ថានភាពសេរីភាពរបស់សហជីពក្នុងប្រទេសកម្ពុជា ដោយបង្ហាញថា សហជីពឯករាជ្យកម្ពុជានៅតែប្រឈមឧបសគ្គរារាំង។
របាយការណ៍បន្តថា ពួកគេទាមទារឱ្យគ្រប់ភាគីពាក់ព័ន្ធគួរតែពិនិត្យមើលឡើងវិញ ដើម្បីកុំឱ្យមានការរំលោភសិទ្ធិសេរីភាពការងាររបស់កម្មករនិយោជិត និងសហជីព ប៉ុន្តែមន្ត្រីរដ្ឋាភិបាលថា របាយការណ៍នេះធ្វើឡើងដើម្បីដាក់បន្ទុកមកលើរដ្ឋាភិបាលតែប៉ុណ្ណោះ។
យោងតាមការថ្លែងឡើងរបស់លោក ប៉ែន បូណា អ្នកនាំពាក្យរដ្ឋាភិបាល ទៅកាន់វិទ្យុវីអូអេ ថា សហជីពនៅកម្ពុជាមានចំនួនច្រើនណាស់ រហូតដល់ជាង៦ពាន់អង្គភាព ដែលបង្ហាញពីការបើកឱ្យមានសិទ្ធិសេរីភាពរបស់សហជីព។
លោកសហជីពបានចុះបញ្ជីនៅក្រសួងការងាររហូតដល់ជាង ៦.៣០០ សហជីព...គ្រប់បែបយ៉ាងទាំងអស់ជាង ៦ ពាន់ដែលធ្វើសកម្មភាពនៅកម្ពុជា។ ចុះសហជីពច្រើនម្លឹងៗត្រង់ណាដែលនិយាយថា កម្ពុជាអត់មានសិទ្ធិសេរីភាពរបស់សហជីព។
«សព្វថ្ងៃនេះ អ្វីដែលយើងព្រួយបារម្ភខ្លាចក្រែងសហជីពទាំងអស់ហ្នឹងគាត់ដើរជាន់ជើងគ្នា ហើយឈ្លោះគ្នា បែរជាមកដាក់បន្ទុកលើរដ្ឋាភិបាលទៅវិញ។ នេះជាបញ្ហា។ អង្គការសង់ត្រាល់គួរតែពិនិត្យមើលឡើងវិញចំពោះការខិតខំប្រឹងប្រែងរបស់រដ្ឋាភិបាលក្នុងការលើកកម្ពស់សិទ្ធិសេរីភាពរបស់សហជីព»។ នេះបើតាមការបញ្ជាក់បន្ថែមពីលោក ប៉ែន បូណា៕
Daily Program
