នៅក្នុងជម្លោះរវាងប៉ាគីស្ថាន និងឥណ្ឌា ដែលបង្កឡើងដោយការវាយប្រហារភេរវកម្មនៅតំបន់ កាឈ្មៀរ៍ កាលពីចុងខែមេសា ឧត្តមសេនីយ៍ អាស៊ីម មូនៀ ដើរតួនាទីសំខាន់។ មេបញ្ចាការ យោធាដែលជាបុគ្គលដែលមានសារសំខាន់បំផុតនៅប៉ាគីស្ថាន ហើយក៏ជាអនាគតនៃទំនាក់ទំនងជាមួយឥណ្ឌា មានគំនិតសាសនាដ៏ប្រកាន់ប្រពៃណី។ នេះគឺជាឧត្តមសេនីយ៍ដែលគ្រប់កែវភ្នែកសម្លឹងមើលនៅពេលគេមើលទៅប្រទេសប៉ាគីស្ថាន នៅក្នុងអំឡុងពេលនៃការប្រឈមមុខគ្នាខាងយោធា និងការទូតជាមួយអ្នកជិតខាងឥណ្ឌា ដែលបង្កឡើងដោយការវាយប្រហារភេរវកម្មនៅតំបន់កាឈ្មៀរ៍ប្រទេសឥណ្ឌា កាលពីថ្ងៃទី២២ ខែមេសា។
បុរសនេះ គឺឧត្តមសេនីយ៍ អាស៊ីម មូនៀ ដែលទង្វើ និងកាយវិការរបស់លោក ត្រូវបានគេសង្កេតមើលយ៉ាងយកចិត្តទុកដាក់ពីផ្នែកសងខាងនៃព្រំដែនឥណ្ឌា ប៉ាគីស្ថាន លើសពីនាយករដ្ឋមន្រ្តីប៉ាគីស្ថាន លោកស្ហ៉េបាហ្ស ស្ហ៉ារីហ្វ ទៅទៀត។ ហើយច្បាស់ណាស់ កាលពីថ្ងៃពុធ ទី៦ ខែឧសភា ប្រមុខរដ្ឋាភិបាលប៉ាគីស្ថាន បានអនុញ្ញាតឲ្យកងកម្លាំងទាហាន ប្រកាន់យកសកម្មភាពឆ្លើយតប នឹងការវាយប្រហាររបស់ឥណ្ឌា មកលើប៉ាគីស្ថាន ឧត្តមសេនីយ៍ជាន់ខ្ពស់ ដែលកើតនៅក្នុងឆ្នាំ១៩៦៨ និងមានទម្លាប់មិនបង្ហាញខ្លួននៅមុខសាធារណជន បានចាប់ផ្តើមបង្ហាញលេខមុខជាបន្តបន្ទាប់ជាសាធារណៈ នោះគឺឧត្តមសេនីយ៍អាស៊ីម មូនៀ។
កាលពីថ្ងៃទី១ ខែឧសភា មានការលេចវត្តមានដ៏គួរឲ្យកត់សម្គាល់នៅពីលើរថក្រោះប្រយុទ្ធ និងមានកាន់មីក្រូនៅក្នុងដៃ ឧត្តមសេនីយ៍អាស៊ីម មូនៀបានបញ្ចេញនូវការព្រមានទៅកាន់ប្រទេសឥណ្ឌា និងអះអាងថា រាល់ការផ្សងព្រេងរបស់យោធារបស់ឥណ្ឌា នឹងបង្កការឆ្លើយតបយ៉ាងរហ័ស និងដាច់ខាត។ នេះគឺជាការពន្យល់ច្បាស់ ដែលពេលវេលានៃភាពធូរស្រាលរវាងឥណ្ឌា និងប៉ាគីស្ថាន គឺមិនមានទេ។
សេចក្តីថ្លែងការណ៍របស់ឧត្តមសេនីយ៍ អាស៊ីម មូនៀ គឺមានទម្ងន់ខ្លាំង ហើយនេះនឹងក្លាយទៅជាការពិត។ កាសែត New York Times បានរាយការណ៍នៅកាលពីថ្ងៃ ទី៥ ខែឧសភា ថា ឧត្តមសេនីយ៍អាស៊ីម មូនៀ គឺជាឥស្សរជនដ៏មានអំណាចបំផុតនៃប្រទេសប៉ាគីស្ថាន។ ត្រូវបានគេស្គាល់តិចតួចនៅក្រៅពីព្រំដែនឥណ្ឌា និងប៉ាគីស្ថាន អាស៊ីម មូនៀ បានក្លាយជាប្រមុខអគ្គមេបញ្ជាការកងទ័ពប៉ាគីស្ថាននៅឆ្នាំ២០២២។
លោកវ៉ល់ធើ ឡាដវីហ្គ III ដែលជាអ្នកឯកទេសនៃបញ្ហាសន្តិសុខនៅក្នុងតំបន់ឥណ្ឌូប៉ាស៊ីហ្វីកនៅវិទ្យាស្ថានឃីងនៃរាជធានីឡុងដ្រ៍ ចក្រភពអង់គ្លេស បញ្ជាក់ថា ប្រមុខកងទ័ពប៉ាគីស្ថានជាប្រវត្តិសាស្រ្តគឺជាបុគ្គលគន្លឹះនៃប្រទេស មិនថានរណាកាន់តំណែងនេះទេ។ គេមិនត្រូវភ្លេចថា ក្នុងរយៈពេលច្រើនជាងពាក់កណ្តាលនៃប្រវត្តិសាស្រ្តទំនើប ប៉ាគីស្ថានត្រូវដឹកនាំដោយផ្ទាល់ដោយក្រុមយោធា។
លោកសាមីន អេ ម៉ូស៊ីន អាលី គឺជានយោបាយវិទូឯកទេសអំពីប្រទេសប៉ាគីស្ថាន និងទំនាក់ទំនងអន្តរជាតិនៅក្នុងតំបន់អាស៊ីខាងត្បូងនៅសកលវិទ្យាល័យបៀមីងហេម ចក្រភពអង់គ្លេស។ លោកបញ្ជាក់ថា បើនិយាយអំពីដំណាក់កាលទី៣ នៃរដ្ឋាភិបាលយោធានៅប៉ាគីស្ថាន ពីឆ្នាំ១៩៩៩-២០០៨ ក្រុមយោធាបានរក្សាការគ្រប់គ្រងលើបញ្ហាសន្តិសុខអន្តរជាតិ និងលើគ្រប់អ្វីដែលធ្វើឡើងនៅលើកិច្ចការទំនាក់ទំនងជាមួយឥណ្ឌា និងបូរណភាពដែនដី។
អ្នកសិក្សាស្រាវជ្រាវ បន្ថែមថា នៅរាល់ដងពេលណាដែលនាយករដ្ឋមន្រ្តីព្យាយាមធ្វើឲ្យឮនូវសម្លេងខុសគ្នាពីសម្លេងរបស់យោធាអំពីរឿងនយោបាយការបរទេស។ នាយករដ្ឋមន្រ្តីនឹងត្រូវគេក្បៀសចេញ។ នេះគឺជាអ្វីដែលធ្លាប់កើតឡើងទៅលើលោកអ៊ីមរាន ខាន់ និងលោកណាវ៉ាហ្ស ស្ហ៉ារីហ្វ។
Daily Program
