លោកបូជាចារ្យហ្រ្វង់ស័រ៖ សូមបន្តមានចិត្តស្រឡាញ់ កុំរើសអើង កុំ​មានការស្អប់ ព្រោះតែគេមានលក្ខណៈផ្សេងពីយើង

សាលាអប់រំពិសេសនៃការលូតលាស់ បាន​ប្រារព្ធទិវាអូទីសឹមពិភពលោក ២ មេសា លើកទី១១ នា​ថ្ងៃទី២ ខែមេសា ឆ្នាំ២០២៤ ដោយមានការចូលរួមពីលោលបូជាចារ្យ មន្រ្តីក្រសួងសង្គមកិច្ច អតីតយុទ្ធជន និង​យុវនីតិសម្បទា លោកគ្រូអ្នកគ្រូ មន្រ្តីអាជ្ញាធរ អង្គការការីតាស់ អាណាព្យាបាល និង​តំណាង​ស្ថាប័ន ជាច្រើនរូប​​។​​

នាពិធីនោះ លោកស្រី ភោគ ម៉ានី នាយិកា​សាលាអប់រំពិសេសនៃការលូតលាស់ បានថ្លែង​ឱ្យដឹង​ថា មកដល់ឆ្នាំ២០២៤នេះ សាលាមានសិស្សសរុបចំនួន ៣០០ នាក់ ក្នុងនោះមាន​សិស្សស្រីចំនួន៤៨នាក់ និងបុគ្គលិកចំនួន១០០នាក់។

លោកស្រីបានមានប្រសាសន៍ថា ៖ «សាលាយើង​បានយកចិត្តទុកដាក់យ៉ាងខ្លាំងដើម្បីគាំទ្រ លើកស្ទួ​យ និងជួយឱ្យគុណភាពនៃជីវិតរបស់សិស្សដែលមានអូទីសឹមត្រឡប់មកវិញ និងអាចរស់នៅដោ​យខ្លួនឯងបាន ដោយក្នុងនោះបានបង្កើតកម្មវិធីសិក្សាបន្ថែមថ្មី២ទៀត គឺថ្នាក់សិល្បៈរបាំ និងកាហ្វេ​»។

លោកស្រីនាយិកាដដែល​បានបន្តថា ការចូលរួមរបស់អាណាព្យាបាល ក៏ដូចជាអ្នកពាក់ព័ន្ធទាំងអស់​គឺជាការគាំទ្រ លើកទឹកចិត្តដល់ក្មេងៗដែល​មានអូទីសឹម មិនឱ្យ​អស់សង្ឃឹម ប៉ុន្តែទាំងអស់គ្នា​ត្រូវកា​ន់ដៃ និងធ្វើដំណើររួមជាមួយគ្នា។

ការបង្កើតសាលាអប់រំពិសេសនៃការលូតលាស់ នេះពិតជាបានចូលរួមចំណែកយ៉ាងសំខាន់ដើម្បីជួ​យដល់កុមារកុមារី ដើម្បីមានឱកាសចូលរួមក្នុងសង្គមដូចគេឡើងវិញ ដូចកុមារទូទៅផងដែរ។ នេះបើ​តាមការលើកឡើងរបស់លោក សួស សារិន  ចៅសង្កាត់បឹងទំពុនទី១។

លោកបានថ្លែងថា៖ «នៅទីនេះ លោកគ្រូអ្នកគ្រូបានយកចិត្តទុកដាក់​ខ្លាំងក្នុងការបង្ហាត់បង្រៀនដល់កុ​មារដែលមានតម្រូវការពិសេសនេះ ឱ្យមានការលូតលាស់ ទាំងផ្នែកបញ្ញា ស្មារតី ពីខ្សោយមកម​ធ្យម ពីមធ្យមមកល្អ»។

លោក សួស សារិន សង្ឃឹមថាទៅថ្ងៃអនាគត ​ក្មួយៗទាំងអស់នេះ ​មានសំណាង និងមានឱកាសដូចគេ​ផងដែរ។

ឆ្លៀតឱកាសនោះដែរ លោកក៏បានរំលេចពីការបង្កើតសាលាពីដំបូង ដែល​មានសិស្សតែ​ប៉ុន្មាននាក់ប៉ុណ្ណោះ តែរហូតដល់បច្ចុប្បន្ននេះសាលាមានការរីកចម្រើនជាបន្តបន្ទាប់រហូតដល់មានសិស្សរាប់រ​យនាក់។

ចំណែក លោកស្រី កែវ រ៉ាវី អនុប្រធាននាយកដ្ឋាន​សុខមាលភាពជនពិការ នៃក្រសួងសង្គមកិច្ច អ​តីតយុទ្ធជន និងយុវនីតិសម្បទា បានលើកឡើងថា ការយកចិត្តទុកដាក់ និងការថែទាំរបស់ឪពុកម្តាយពិតជាមានសារៈសំខាន់ណាស់ ក្នុងការជួយកូនៗឱ្យមានភាពប្រសើរឡើង ទោះបីបបញ្ហាអូទឹសឹមនេះ​មិនមានថ្នាំព្យាបាលក៏ដោយ។

លោកស្រីបញ្ជាក់ថា ៖ «សូមឪពុកម្តាយដែលមានកូនអូទឹសឹម កុំអស់សង្ឃឹម កុំអន់ចិត្ត ហើយបន្តថែរ​ក្សាពួកគាត់បន្តទៀត ពិភពលោក ក៏ដូចជាប្រទេសកម្ពុជាមិនបោះបង់ពួកគាត់ចោលនោះទេ។ លោ​កស្រីក៏បានលើកទឹកចិត្តឱ្យឪពុកម្តាយ ដែលមានកូន​មានអូទឹសឹម សូមយកកូនទៅចុះឈ្មោះកំណត់អ​ត្តសញ្ញាកម្មនៅតាមភូមិឃុំ»។

លោកបូជាចារ្យហ្រ្វង់ស័រ ជា​បូជាចារ្យទទួលខុសត្រូវព្រះសហគមន៍កាតូលិក ព្រះកុមារយេស៊ូបឹងទំពុន បានថ្លែង​ក្នុង​ពិធីនោះថា ៖ «មាតាបិតា លោកគ្រូអ្នកគ្រូ ពិតជាមានការតស៊ូ និងស្រឡាញ់ជាខ្លាំង​ចំពោះកូនៗ​​។ សូមបន្តមានចិត្តស្រឡាញ់ កុំរើសអើង កុំឱ្យមានការស្អប់ ព្រោះតែគេមានលក្ខណៈផ្សេ​ងពីយើង»។

លោកបូជាចារ្យ បានបន្ថែមទៀតថា ​ពេលមានកូនដែលមានអូទីសឹម ពិតជាមានការពិបាក តែនេះក៏ជា​ឱកាសដើម្បីបង្ហាញសេចក្តីស្រឡាញ់ ធម៌មេត្តាករុណារបស់ព្រះជាម្ចាស់ចំពោះបងប្អូនតូចតាច ដែ​លគ្មានទីពឹងផងដែរ។

លោកលោកបូជាចារ្យហ្រ្វង់ស័រ បានលើកទឹកចិត្តឪពុកម្តាយ ឱ្យមានចិត្តតស៊ូ ចិត្តក្លាហាន មានសេចក្តី​សង្ឃឹមជានិច្ច និងមានចិត្តស្រឡាញ់កូនៗ។

លោកស្រី ចន សុគន្ធាវី តំណាងអាណាព្យាបាលម្នាក់ បានបង្ហាញចំណាប់អារម្មណ៍របស់គាត់ថា ការ​មានកូនដែលមានបញ្ហា​អូទីសឹមពិតជាមានផលពិបាកទាំងក្នុងការថែទាំ ទាំងការរកសាលាឱ្យកូនរៀន ទាំងការចូលរួមក្នុងសង្គម។

លោកស្រីបានបន្តថា ១១ឆ្នាំដែល មានកូនដែលមានអូទីសឹមនេះ លោកស្រីបានទទួលការរើសអើងមួយចំនួននៅក្នុងសង្គមចំពោះកូន តែដោយសារការផ្តល់កម្លាំងចិត្តរបស់អាណាព្យាបាលដូចគ្នា រួមជា​មួយលោកគ្រូអ្នកគ្រូ ជួយជំរុញឱ្យលោកស្រីមានចិត្តក្លាហានក្នុងការនាំកូនចូលទៅក្នុងសង្គម ដើ​ម្បី​ឱ្យគេទទួលស្គាល់ថា កូនអូទីសឹមមិនឯកកោ ហើយគាត់​មានសិទ្ធិចូលរួមក្នុងគ្រប់លក្ខណៈទាំងអ​ស់នៅក្នុងសង្គម។

ក្នុង​ទិវាអូទីសឹមពិភពលោក ២ មេសានោះដែរ​ ក៏មានការសម្តែង​របាំ រាំ ច្រៀង និងសកម្មភាពនានារបស់កុមារ​ដែលមានអូទឹសឹមផងដែរ ដែល​បានធ្វើឱ្យ​​អាណាព្យាបាល និងអ្នកចូលទាំងអស់មានក្តីរំ​ភើបជាខ្លាំង ដោយបានឃើញការសម្តែងរបស់ពួកគេ ដែលនេះបង្ហាញថាពួកគេ​ពិតជាបានរីកចម្រើ​ន​។

សួម​រម្លឹកផងដែរ​ថា ការប្រារព្ធទិវាអូទីសឹមពិភពលោក ២ មេសានេះ​ មិនមែនធ្វើតែក្នុងប្រទេសកម្ពុជានោះទេ តែជាការប្រារព្ធរួមគ្នាក្នុងពិភពលោក ដែលនេះជាឱកាសដើម្បីបង្ហាញ​ឱ្យបាន​កាន់តែទូលំទូលាយពីបញ្ហារបស់កុមារដែលមានតម្រូវការពិសេស ដូចជា កុមារអូទីសឹមផងដែរ។

ទាំងនេះ ក៏​បង្ហាញផងដែរថា កុមារអូទីសឹមមិនមែនជាក្មេងដែលនៅក្រៅសង្គម និងឯកោឡើយ កុ​មា​រអូទីសឹមអាចចូលរួមក្នុងសង្គមមានគ្រប់សកម្មភាព ហើយទិវានេះ​ ក៏​ជាសារមួយដើម្បីលុបបំបាត់កា​ររើសអើងលើកុមារដែលមានអូទឹសឹមផងដែរ៕