លោក ម៉ម រិទ្ធី ប្រធានសហព័ន្ធសហជីព កម្មករនិយោជិតវិស័យទេសចរណ៍សេវាកម្មកម្ពុជាដែលតែងតែធ្វើការតវ៉ា ទាមទារសិទ្ធិ និងលក្ខខណ្ឌការងារផ្សេងៗដល់កម្មករ និយោជិត ក្នុងវិស័យទេសចរណ៍ និងសេវាកម្ម ត្រូវបានអាជ្ញាធរចាប់ និងឃុំខ្លួនផងដែរ។
ចៅក្រមជំនុំជម្រះនៃសាលាដំបូងរាជធានីភ្នំពេញ លោក ធន់ ដារិទ្ធ បានចេញដីកាបង្គាប់ឱ្យចាប់ និងឃុំខ្លួន លោក ម៉ម រិទ្ធី អាយុ៣៥ឆ្នាំ កាលពីថ្ងៃទី៧ ខែឧសភា ឆ្នាំ២០២៤ តាមសាលក្រមព្រហ្មទណ្ឌ របស់សាលាដំបូងរាជធានីភ្នំពេញ ដោយបានសម្រេចផ្ដន្ទាទោសឈ្មោះ ម៉ម រិទ្ធី ដាក់ពន្ធនាគារកំណត់ចំនួន ១ ឆ្នាំ ៦ ខែ និងពិន័យជាប្រាក់ចំនួន ២ លាន រៀល។
លោក ធន់ ដារិទ្ធ បានបញ្ជាក់តាមរយៈដីការបង្គាប់ឱ្យចាប់ និងឃុំខ្លួននេះថា ការផ្តន្ទទោសលោក ម៉ម រិទ្ធិនេះ ក្រោមបទចោទប្រកាន់ «ញុះញង់ឱ្យប្រព្រឹត្តបទឧក្រិដ្ឋជាអាទិ៍ និងបទធ្វើឱ្យបាត់ជំនឿលើសេចក្តីសម្រេចរបស់តុលាការ» ដែលប្រព្រឹត្តនៅលើបណ្តាញសង្គមហ្វេសប៊ុក (FACEBOOK) កាលពីថ្ងៃទី២៤ ខែកុម្ភៈ ឆ្នាំ២០២២។
លោកបានបន្តថា ៖ «បទល្មើសព្រហ្មទណ្ឌដែលមានបញ្ញត្តិឲ្យផ្តន្ទាទោសតាមមាត្រា៤៤៤ មាត្រា៤៩៥ និងមាត្រា៥២៣ នៃក្រមព្រហ្មទណ្ឌ និងសម្រេចបង្គាប់ឱ្យចាប់ និងឃុំខ្លួនជននេះ។ ដូច្នេះគប្បីតុលាការចេញដីកាបង្គាប់ឲ្យចាប់ និងឃុំខ្លួនពិរុទ្ធជនឈ្មោះ ម៉ម រិទ្ធី តាមបញ្ញត្តិ នៃមាត្រា ៣៥៣ នៃក្រមនីតិវិធីព្រហ្មទណ្ឌ»។
ទាក់ទងនឹងការចាប់ និងឃុំខ្លួនលោក ម៉ម រិទ្ធីនេះ សហភាពការងារកម្ពុជា (CLC) បានចេញសេចក្តីថ្លែងការណ៍ ដោយសោកស្តាយយ៉ាងខ្លាំង ទៅលើទង្វើរបស់អាជ្ញាធរដែលបានចាប់ខ្លួន លោក ម៉ម រិទ្ធី កាលពីល្ងាចថ្ងៃទី៧ ខែឧសភា ដែលពាក់ព័ន្ធនឹងការបញ្ចេញមតិយោបល់របស់លោក ពីករណីវិវាទការងារនៃសណុំរឿងក្រុមហ៊ុន ជីនប៉ី គ្រុប ឯ.ក. នៅបណ្តាញសង្គមហ្វេសប៊ុក កាលពីថ្ងៃទី២៤ ខែកុម្ភៈ ឆ្នាំ២០២២ កន្លងទៅ។
សេចក្តីថ្លែងការណ៍បានបញ្ជាក់ថា ៖ «ការសម្រេចចិត្តរបស់អាជ្ញាធរ ក្នុងការយកច្បាប់ព្រហ្មទណ្ឌមកធ្វើការចោទប្រកាន់ និងចាប់ខ្លួនមកលើ លោក ម៉ម រិទ្ធី គឺជារឿងដែលមិនសមហេតុផល តាមពិតការបញ្ចេញមតិយោបល់របស់លោក គឺក្នុងគោលដៅ ស្ថាបនា និងកែតម្រូវឱ្យមានការអនុវត្តច្បាប់ឱ្យបានកាន់តែសមស្រប និងមានតម្លាភាពរបស់សមត្ថកិច្ចខេត្តព្រះសីហនុ»។
សហភាពការងារកម្ពុជា យល់ឃើញថា ការសម្រេចចាប់ខ្លួនលោក ម៉ម រិទ្ធី ភ្លាមៗតាមអំណាចសាលក្រម កំបាំងមុខគ្រប់តំណាក់កាលនៃនីតិវិធីព្រហ្មទណ្ឌបែបនេះ ជាសកម្មភាពបំភិតបំភ័យ សម្លុត គម្រាមកំហែង និងយាយីដល់សិទ្ធិរបស់តំណាងកម្មករនិយោជិត, ការបង្កឧបសគ្គដល់ការប្រើប្រាស់សិទ្ធិសហជីព, ការរំខានធ្ងន់ធ្ងរដល់សិទ្ធិសហជីព, ការរំលោភបំពានលើគោលការណ៍សេរីភាពសមាគម, ជាការរំលោភបំពានសេរីភាពសមាគមនិងការវាយប្រហារធ្ងន់ធ្ងរលើសិទ្ធិសហជីព។
សហភាពការងារកម្ពុជា បានស្នើសុំដល់ប្រមុខរាជរដ្ឋាភិបាល និងឧត្តមក្រុមប្រឹក្សានៃអង្គចៅក្រម រួមទាំង ស្ថាប័នពាក់ព័ន្ធឱ្យពិនិត្យមើលករណីនេះឡើងវិញឱ្យបានហ្មត់ចត់ និងតម្លាភាព ដោយសហភាពការងារកម្ពុជា សង្ឃឹម និងជឿជាក់ផងដែរថា ប្រមុខរាជរដ្ឋាភិបាល និងឧត្តមក្រុមប្រឹក្សានៃអង្គចៅក្រម រួមទាំងស្ថាប័នពាក់ព័ន្ធជួយរក យុត្តិធម៌ឱ្យលោក ម៉ម រិទ្ធី ដែលជាជនរងគ្រោះ ជាក់ជាមិនខាន៕
Daily Program
