កូនឈើចម្រុះជាង មួយម៉ឺន ដើមត្រូវបានដាំដើម្បីអបអរសាទរពិធីបុណ្យ រុក្ខទិវា នាព្រៃសង្ឃរុក្ខវ័ន

អង្គការជេស្វីតសឺវីសកម្ពុជា​ និង​គ្រីស្តបរិស័ទ​កាតូលិក​ប្រមាណ​៣០នាក់ បាន​ចូលរួម​កម្មវិធី​ដាំ​កូន​ឈើ​ ចម្រុះជាងមួយម៉ឺន ដើម្បីអបអរសាទរពិធីបុណ្យ រុក្ខទិវា នាថ្ងៃទី១៣ ខែកក្កដា នាបរិវេណព្រៃសហគមន៍សង្ឃរុក្ខវ័ន ក្នុង​​ខេត្តឧត្តរមានជ័យ ក្រោមអធិបតីភាព លោក ម៉េត មាសភក្តី អភិបាលរងខេត្តឧត្តរមានជ័យ មន្ត្រីរាជការ ព្រះសង្ឃ តំណាងអង្គការក្រៅរដ្ឋាភិបាល ប្រជាពលរដ្ឋ សិស្សានុសិស្ស និងយុវជនប្រមាណជាង ៥០០អង្គនិងនាក់។

កម្មវិធីនេះ ធ្វើ​ឡើងក្រោមប្រធានបទ រួមគ្នាដាំកូនឈើ ដើម្បីជីវិត​និងភពផែនដី ​ដើម្បី​ស្តារគម្របព្រៃឈើឡើងវិញ ដើម្បីរួមចំណែកកាត់បន្ថយកម្តៅលើភពផែនដីនិងការប្រែប្រួលអាកាសធាតុ និង​ដើម្បី​បញ្ជ្រាប​ការយល់ដឹង​និងបណ្តុះស្មារតីដល់សហគមន៍ និង​ពលរដ្ឋ​គ្រប់រូប ឱ្យស្រឡាញ់ធនធានធម្មជាតិ។

កញ្ញា បាញ់ ចិន្តា មន្ត្រី​អង្គការ ជេស្វីត សឺវីសកម្ពុជា (JSC) ក្នុងគម្រោងផ្នែកបរិស្ថាន បានឱ្យដឹងថា អង្គការ JSC បានយកចិត្តទុកដាក់ក្នុងការចូលរួមជាមួយព្រឹត្តការណ៍នេះ ដោយបានឧបត្ថម្ភ កូនឈើប្រណិតចម្រុះ ៤០០០ កូន ដូចជាក្រញូង បេង ឈើទាល គគីរ កកោះ ជាដើម។

កញ្ញាបានបន្តទៀតថា ការចូលរួមរបស់យើងនៅថ្ងៃនេះ បង្ហាញថា យើងជាផ្នែកមួយដែលរស់នៅក្នុងភពផែនដីនេះ ដែលបានទទួលអ្វីៗជាច្រើន ដែលព្រះជាម្ចាស់បានបង្កើត សម្រាប់យើងទាំងអស់គ្នា ហើយក្នុងស្ថានភាពដែលភពផែនដីកំពុងមានរបួស យើងទាំងអស់គ្នា មានតួនាទីថែរក្សា តាមរយៈសកម្មភាពផ្សេងៗដែលអាចធ្វើបាន។

ស្ត្រីជា​គ្រីស្តបរិស័ទ​រូបនេះ​បន្តថា សកម្មភាព​របស់​មនុស្ស​សព្វ​ថ្ងៃគឺ​ជះឥទ្ធិពល​ដល់​បរិស្ថាន ដូច្នេះ យើង​ត្រូវ​រស់នៅ​ដោយស្រឡាញ់ធនធានធម្មជាតិ ដោយមិនប្រើប្រាស់ប្លាស្ទីក ដាំកូនឈើឡើងវិញ រៀននិងឈ្វេងយល់ពីបញ្ហាបរិស្ថានក្នុងតំបន់ផ្សេងៗ កាត់បន្ថយការញ៉ាំសាច់ ប្រើប្រាស់សម្ភារណាដែលមានអាយុកាលវែង កាត់បន្ថយការប្រើប្រាស់យាន្តជំនិះ និងការប្រើប្រាស់ខ្ជះខ្ជាយ ការសន្សំសំចៃទឹក ភ្លើង  មិនតែប៉ុណ្ណោះចូលរួមផ្សព្វផ្សាយដល់អ្នកនៅក្នុងសហគមន៍ និងសង្គមយើងទាំងអស់ឱ្យយល់ដឹង និងចូលរួមផងដែរ។

កញ្ញា រឿន សាវឌី ជាសិស្សថ្នាក់ទី១១ នៃវិទ្យាល័យ ហ៊ុនសែន ត្រពាំងតាវ ខេត្តឧត្តរមានជ័យ បានលើកឡើងថា ការចូលរួមនៅថ្ងៃនេះ មានសារៈសំខាន់ណាស់ ដើម្បីដាំដើមឈើឡើងវិញ ជួយបង្កើតបន្ថែមនូវអុកស៊ីសែន ដែលជាឧស្ម័នបរិសុទ្ធ ជួយដល់ការដកដង្ហើមរបស់យើងទាំងថ្ងៃនេះ ក៏ដូចជាអនាគត​សម្រាប់នាង​ក៏ដូចជាអ្នកជំនាន់ក្រោយ។

សាវឌី​ បានប្តេជ្ញាចិត្តយ៉ាងមុតមាំក្នុងការបន្តដាំកូនឈើឡើងវិញ ថែរក្សា និងការពារ ដោយរារាំង រាយការណ៍ ទៅអាជ្ញាធរដែលពាក់ព័ន្ធ ពីជនដែលមានបំណងកាប់ រឺដុតបំផ្លាញព្រៃឈើ។

អ្នកស្រី ខុង ផន វ័យ៧៤​ឆ្នាំ​ដែលបានមកចូលរួមលើកទី១​ជាមួយកូនចៅ និងពលរដ្ឋក្នុងភូមិចុងកាល់ ឃុំជើងទៀន ស្រុកចុងកាល់ ខេត្តឧត្តរមានជ័យ សង្ឃឹមថា ដើមឈើដែលបានដាំនៅថ្ងៃនេះ នឹងរស់បានល្អ រីកចម្រើន  ដើម្បីជួយឱ្យបរិស្ថានល្អ  សម្រាប់កូនចៅជំនាន់ក្រោយ។ ​

កញ្ញា ធុង ឈីងជាវ ជាសមាជិកសមាគមបណ្តាញយុវជនកម្ពុជា (CYN) នេះជាលើកទី២ ហើយដែលកញ្ញាបានចូលរួម។ នាង​ប្រាប់ថា ប្រសិនវិនាសកម្មព្រៃឈើ គឺស្មើនិងវិនាសកម្មនៃជីវិតមនុស្ស ព្រោះបើកាលណាបាត់បង់ព្រៃឈើ មិនសត្វ រឺមនុស្ស មិនថាអ្នកបំផ្លាញ រឺអ្នកថែរក្សាទេ នឹងនាំឱ្យមានបញ្ហាជៀសមិនផុត។

ដែនជម្រកសត្វ​ព្រៃសង្ឃ​រុក្ខាវ័ន ស្ថិតក្នុងភូមិសាស្ត្រស្រុកអន្លង់វែង ស្រុកចុងកាល និងក្រុងសំរោង ខេត្តឧត្តរមានជ័យ។ សហគមន៍នេះ ជាសហគមន៍ការពារធនធានធម្មជាតិព្រៃឈើ និងសត្វព្រៃយ៉ាងសកម្មរហូតទទួលបានជ័យលាភីរង្វាន់អេក្វាទ័រក្នុងឆ្នាំ២០១០ និងមានការទទួលស្គាល់ពីរដ្ឋាភិបាលដោយចេញអនុក្រឹតស្ដីពីការបង្កើតដែនជម្រកសត្វព្រៃ«សង្ឃរុក្ខាវ័ន» ដែលមានទំហំ ១៨២៦១ ហិកតា ដឹកនាំ គ្រប់គ្រង ការពារ អភិរក្ស​ដោយព្រះសង្ឃ៕

ដោយសុខ កែវរតនា