កងទ័ពកូរ៉េខាងជើងចន្លោះពី ៣០០០០នាក់ ដល់ ៥០០០០នាក់ ត្រូវបានពង្រាយក្នុងទ័ពរុស្ស៊ី ខណៈទីក្រុងគៀវ ស្នើអាវុធការពារអាកាសពីទីក្រុងសេអ៊ូល
ប្រធានាធិបតីអ៊ុយក្រែន លោកវ៉ូឡូឌីមៀ ហ្សេឡេនស្គី (Volodymyr Zelensky) បានចេញមុខ ប្រកាសអាសន្នថា ប្រទេសរុស្ស៊ីបានដាក់ពង្រាយកងទ័ពកូរ៉េខាងជើងចន្លោះពី ៣០០០០នាក់ ទៅ ៥០០០០ នាក់ នៅលើទឹកដីរបស់ខ្លួន ដើម្បីចូលរួមក្នុងប្រតិបត្តិការសង្គ្រាមប្រឆាំងនឹងអ៊ុយក្រែន។ តួលេខថ្មីនេះ មានការកើនឡើងយ៉ាងខ្លាំង បើប្រៀបធៀបទៅនឹងការវាយតម្លៃកាលពីខែកក្កដា កន្លងទៅ ដែលកាលនោះមានត្រឹមតែប្រមាណ ៣០០០០នាក់ប៉ុណ្ណោះ។
ការប្រកាសនេះត្រូវបានធ្វើឡើងនៅលើបណ្តាញសង្គមអ៊ិក (X) កាលពីចុងសប្តាហ៍មុន ដោយលោកហ្សេឡេនស្គី បានបញ្ជាក់បន្ថែមថា ទីក្រុងគៀវបានរកឃើញសំណល់មីស៊ីលរបស់កូរ៉េខាងជើងធ្លាក់នៅលើទឹកដីអ៊ុយក្រែនរួចទៅហើយ។ លោកបានសង្កត់ធ្ងន់ថា ព្យុងយ៉ាងកំពុងប្រាប់ពិភពលោកថា ខ្លួនប្រើប្រាស់សង្គ្រាមនេះដើម្បីដកបទពិសោធន៍យុទ្ធសាស្ត្រសង្រ្គាមទំនើប និងដោះដូរយកបច្ចេកវិទ្យាអាវុធគ្រប់ប្រភេទពីទីក្រុងមូស្គូ។
ប្រឈមមុខនឹងការគំរាមកំហែងកាន់តែផ្ទាល់ពីសម្ព័ន្ធមិត្តរុស្ស៊ី-កូរ៉េខាងជើង ប្រធានាធិបតីអ៊ុយក្រែន បានអំពាវនាវយ៉ាងទទូចទៅកាន់រដ្ឋាភិបាលទីក្រុងសេអ៊ូល (កូរ៉េខាងត្បូង) ឲ្យពង្រឹងកិច្ចសហប្រតិបត្តិការយោធាជាមួយអ៊ុយក្រែន ជាពិសេសលើ «ប្រព័ន្ធការពារដែនអាកាស» ដែលវាជាចំណុចខ្សោយដ៏ធ្ងន់ធ្ងររបស់អ៊ុយក្រែននាពេលបច្ចុប្បន្ន។ លើសពីនេះ អ៊ុយក្រែនក៏បានសម្តែងការត្រៀមខ្លួនជាស្រេចក្នុងការធ្វើកិច្ចព្រមព្រៀងសហប្រតិបត្តិការលើបច្ចេកវិទ្យាការពារដែនអាកាស ដ្រូន (Drone) និងវិស័យការពារជាតិផ្សេងៗទៀតជាមួយកូរ៉េខាងត្បូងផងដែរ។
តាមប្រភពពីចារកម្មយោធាអ៊ុយក្រែនដែលបានប្រាប់ទីភ្នាក់ងារសារព័ត៌មានរ៉យទ័រ (Reuters) ថា អង្គភាពមីស៊ីលកូរ៉េខាងជើងបានចាប់ផ្តើមពង្រាយនៅភាគខាងលិចនៃប្រទេសរុស្ស៊ីរួចហើយ ដោយបំពាក់ដោយមីស៊ីលបាលីស្ទីក (Ballistic Missiles) ប្រមាណ ១២០គ្រាប់ និងជើងទម្របាញ់ចំនួន ៦គ្រឿង។ ផ្ទុយមកវិញ ប្រទេសអ៊ុយក្រែនកំពុងខ្វះខាតយ៉ាងខ្លាំងនូវប្រព័ន្ធការពារអាកាសទំនើប ហើយរុស្ស៊ីព្យាយាមទាញចំណេញពីភាពទន់ខ្សោយនេះដោយប្រើប្រាស់មីស៊ីលបាលីស្ទីកកាន់តែច្រើនឡើងដើម្បីបាញ់ ដែលវាធ្វើឲ្យមានការលំបាកយ៉ាងខ្លាំងសម្រាប់អ៊ុយក្រែនក្នុងការស្ទាក់ចាប់បាញ់ទម្លាក់ពួកវា។
ចំណែកការផ្គត់ផ្គង់គ្រាប់កាំភ្លើងធំ រ៉ូក្កែត និងមីស៊ីលរាប់លានគ្រាប់ពីសំណាក់កូរ៉េខាងជើង ត្រូវបានគេមើលឃើញថា ជាការអនុវត្តតាម «សន្ធិសញ្ញានៃភាពជាដៃគូយុទ្ធសាស្ត្រសកល» ដែលលោកវ្ល៉ាឌីមៀ ពូទីន និងលោក គីម ជុងអ៊ុន បានចុះហត្ថលេខាកាលពីខែមិថុនា ឆ្នាំ២០២៤។ កតិកាសញ្ញានេះមានឃ្លាចែងអំពីការជួយគ្នាទៅវិញទៅមក នៅពេលមានការវាយប្រហារពីខាងក្រៅលើប្រទេសណាមួយក្នុងចំណោមទាំងពីរ។
ប្រទេសកូរ៉េខាងជើង បង្ហាញវត្តមានការដាក់ពង្រាយកងកម្លាំងរបស់ខ្លួនដូចជាជំនួយសម្រាប់ដៃគូដែលមាននៅក្នុងកិច្ចព្រមព្រៀង។ ទីក្រុងព្យុងយ៉ាង បានបញ្ជូលទាហានប្រមាណ ១៤០០០នាក់ នៅក្នុងតំបន់គូស្ក៍របស់រុស្ស៊ីកាលពីឆ្នាំ២០០៤ ដែលជួយទីក្រុងមូស្គូ វាយរុញច្រានការជ្រៀតចូលដ៏ចម្បងរបស់កងកម្លាំងអ៊ុយក្រែនចូលក្នុងទឹកដីរុស្ស៊ី។
យោងតាមការវាយតម្លៃរបស់អ៊ុយក្រែន និងដោយឯករាជ្យ បានឲ្យដឹងថា ប្រទេសកូរ៉េខាងជើង បានផ្គត់ផ្គង់ឲ្យរុស្ស៊ីនូវគ្រាប់កាំភ្លើងធំ និងគ្រាប់ត្បាល់ រាប់លានគ្រាប់ ព្រមទាំងមីស៊ីលបាលីស្ទីកជាច្រើន កាំភ្លើងធំបាញ់រយៈចម្ងាយឆ្ងាយ និងប្រព័ន្ធបាញ់រ៉ូកែតពហុមុខងារផងដែរ។
រហូតមកដល់ពេលនេះ ទូតកូរ៉េខាងជើងប្រចាំនៅរុស្ស៊ី និងក្រសួងការបរទេសកូរ៉េខាងត្បូង នៅមិនទាន់បានចេញមុខឆ្លើយតប ឬធ្វើអត្ថាធិប្បាយជុំវិញការលើកឡើងរបស់ប្រធានាធិបតីអ៊ុយក្រែននៅឡើយទេ៕
Daily Program
