ជប៉ុន ៖ ការបង្ហូរទឹកពីរោងចក្រ ហ្វ៊ូគូស្ហ៊ីម៉ា ចូលទៅក្នុងសមុទ្រ

ការចាក់បញ្ចូលទឹកទៅក្នុងសមុទ្រលើកដំបូងនឹងគួរតែមានរយៈពេល ១៧ថ្ងៃ ដែលមានទឹកប្រមាណជា ៧៨០០ m3 ដែលមានផ្ទុកដោយជាតិ ទ្រីត្យូម ដែលជាសារធាតុវិទ្យុសកម្ម​ដែលមានគ្រោះថ្នាក់នៅពេលណាដែលការប្រមូលផ្តុំវាលើសកម្រិត។

កាលពីចុងខែសីហា ប្រទេសជប៉ុន បានចាក់បញ្ចូលទៅក្នុងសមុទ្រ​នូវទឹកដែលមានប្រភពពីរោងចក្រនុយក្លេអ៊ែរ ហ្វ៊ូគូស្ហ៊ីម៉ា ទោះបីជាមានការព្រួយបារម្ភ​ពីអ្នកនេសាទ និងការប្រឆាំងដ៏ក្លៀវក្លាពីទីក្រុងប៉េកាំងក៏ដោយ។ ហើយប្រទេសចិនក៏បានដាក់កំហិតភ្លាមៗ នូវពាណិជ្ជកម្មជាមួយទីក្រុងតូក្យូ។

ទីក្រុងប៉េកាំងបានបរិហារថា នេះគឺជាសកម្មភាពអាត្មានិយម និងគ្មានការទទួលខុសត្រូវ​របស់ទីក្រុងតូក្យូ និងបានផ្អាក​រាល់ការនាំចូលផលិតផលគ្រឿងសមុទ្ររបស់ជប៉ុនដើម្បីគិតគូរទៅ​ដល់​សុវត្ថិភាពចំណីអាហាររបស់ខ្លួន។ កាលពីឆ្នាំ​មុន ប្រទេសចិន គឺជាទីផ្សារធំបំផុត​នៃការនាំចេញផលិតផលនេសាទរបស់ជប៉ុន។

ការចាក់ចូលទៅក្នុងសមុទ្រប៉ាស៊ីហ្វីក​នូវទឹកដែលចេញពីរោងចក្រ ហ្វ៊ូគូស្ហ៊ីម៉ា ធ្វើឡើងដោយ​ក្រុមហ៊ុន Tepco ដែលជាក្រុមហ៊ុនប្រតិបត្តិការរោងចក្រ។

ជាសរុប ប្រទេសជប៉ុនត្រៀមនឹង​ចាក់បញ្ចូលទឹក​ច្រើនជាង ១,៣ លាន m3 ដែលស្តុក​នៅរោង​ចក្រហ្វ៊ូគូស្ហ៊ីម៉ា ដៃអ៊ីជី។ រោងចក្រនុយក្លេអ៊ែរហ្វ៊ូគូស្ហ៊ីម៉ា ទទួលរងការខូចខាត​ដោយ​រលកយក្សស៊ូណាមី កាលពីខែមីនា ឆ្នាំ២០១១ ដែលបានបំផ្លាញ​ឆ្នេរ​ភាគខាងឥសាននៃប្រទេសជប៉ុន។ ទឹកត្រូវបានចម្រោះជាបឋមរួចហើយដើម្បី​រំដោះចេញនូវ​សារធាតុវិទ្យុសកម្មភាពភាគច្រើន លើកលែងតែទ្រីត្យូម។ ប្រទេសជប៉ុនត្រៀមនឹងចាក់បញ្ចូលទឹក​ជាមួយនឹងការរំលាយ​ជាដំបូងដើម្បីឲ្យកម្រិតជាតិវិទ្យុសកម្ម​មិនហួសផុតពី ១៥០០ ប៊ិកកឺរ៉ែល ក្នុងមួយលីត្រ។  

កម្រិតនេះគឺមានចំនួន ៤០ដង តិចជាងបទដ្ឋាន​ជាតិរបស់ជប៉ុន​សម្រាប់ជាមួយទឹកដែលមាន​ជាតិទី្រត្យូម ហើយស្របនឹងបទដ្ឋានអន្តរជាតិ គឺ ៦០០០០ ប៊ិកកឺរ៉ែល ក្នុងមួយលីត្រ។ ហើយ​ក៏វាតិចជាង ៧ដង សម្រាប់ពិដាន​របស់អង្គការសុខភាពពិភពលោក សម្រាប់ទឹកស្អាត គឺ ១០០០០ ប៊ិកកឺរ៉ែល ក្នុងមួយលីត្រ។

ទីភ្នាក់ងារអន្តរជាតិនៃថាមពលអាតូមិច (AIEA) ដែលត្រួតពិនិត្យពីលើនៃប្រតិបត្តិការចាក់បញ្ចូលបានផ្តល់ភ្លើងខៀវ​កាលពីខែកក្កដា ដោយវិនិច្ឆ័យថា គម្រោងការនេះ គឺស្របតាម​បទដ្ឋាន​អន្តរជាតិ​នៃសុវត្ថិភាព ហើយវានឹងមិនមានឥទ្ធិពលជាតិវិទ្យុសកម្មដែលមានសក្តានុពលលើប្រជាជន និងបរិស្ថាន”។

ប៉ុន្តែមនុស្សជាច្រើនបានមើលរឿងនេះក្នុងភាពផ្សេងៗគ្នា។ ជាបឋម អ្នកនេសាទជប៉ុនភ័យខ្លាច​អំពីឥទ្ធិពលនៃរូបភាពនៃផលិតផលរបស់ពួកគេ ដែលបានទទួលការកំហិតរួចហើយ​ពីប្រទេសចិន​កាលពីខែមុន។

សារព័ត៌មានតូក្យូ បានលើកឡើងថា ការចាក់បញ្ចូលទៅក្នុងសមុទ្រនៃទឹក​ដែលមានសារធាតុទ្រីត្យូម គឺជាការអនុវត្តទូទៅ​នៃឧស្សាហកម្មនុយក្លេអ៊ែរ​ក្នុងពិភពលោកទាំងមូល។ កម្រិតប្រចាំឆ្នាំនៃជាតិវិទ្យុសកម្ម​ពីការចាក់បញ្ចូលនេះ​ពីរោងចក្រនុយក្លេអ៊ែរ​ចិន គឺពិតជាខ្ពស់ជាងការចាក់បញ្ចូល​របស់រោងចក្រ ហ្វ៊ូគូស្ហ៊ីម៉ា ដៃអ៊ីជី។

យោងតាមអ្នកវិភាគ ជំហររឹងត្អឹង របស់ទីក្រុងប៉េកាំងអំពីទឹក​នៃរោងចក្រ ហ្វ៊ូគូជីម៉ា គឺប្រហែលជាពាក់ព័ន្ធផងដែរនឹងទំនាក់ទំនង​ចិន និងជប៉ុន ដែល​មានភាពតានតឹងរួចហើយលើសំណុំរឿង​ជាច្រើនទាំងសេដ្ឋកិច្ច និងភូមិសាស្រ្តនយោបាយ។  រដ្ឋដទៃៗទៀត នៃអាស៊ីប៉ាស៊ីហ្វីក ដែលមានទំនាក់ទំនង​ល្អជាមួយជប៉ុន ដូចជា កូរ៉េខាងត្បូង តៃវ៉ាន់ អូស្រ្តាលី កោះហ្វ៊ីជី កោះឃុក បានសម្តែងនូវទំនុកចិត្តរបស់ពួកគេ​សម្រាប់សុវត្ថិភាព​នៃដំណើរការនៃការចាក់បញ្ចូល​ដែល​ត្រូវបានត្រួតពិនិត្យពីទីភ្នាក់ងារអន្តរជាតិនៃថាមពល​អាតូមិច។