ប្រទេសជប៉ុនបានសន្យា កាត់បន្ថយការបំភាយឧស្ម័នផ្ទះកញ្ចក់ ៦០% ពីពេលនេះរហូត ដល់ ឆ្នាំ២០៣៥ បើប្រៀបធៀបនឹងឆ្នាំ២០១៣ នៅក្នុងក្របខណ្ឌនៃផែនការអាធាតុ។ នេះគឺជាមហិច្ចតា កើនឡើង និងនាំមកជាមួយនូវការត្រួតពិនិត្យឡើងវិញអំពីយុទ្ធសាស្រ្តថាមពល។
ជាមហាអំណាចសេដ្ឋកិច្ចទី៤ នៅលើពិភពលោក ហើយនៅពឹងផ្អែកច្រើនឡើងឥន្ធនៈផូស៊ីល និងត្រូវបានចោទប្រកាន់ថាជាប្រទេសបំពុលបំផុតនៅក្នុងចំណោមមហាអំណាចសេដ្ឋកិច្ច G7 ប្រទេសជប៉ុន បានកំណត់គោលដៅដើម្បីឈានទៅបំបាត់ការបំភាយឧស្ម័នកាបូនពីពេលនេះ រហូតដល់ឆ្នាំ២០៥០។ ការសន្យាបានចុះក្នុងបញ្ជីសម្រាប់ក្របខណ្ឌនៃការចូលរួមចំណែកថ្មីដោយមានការតាំងចិត្តនៅកម្រិតពិភពលោក។ ប្រទេសជប៉ុន ក៏ដូចប្រទេសទាំងអស់ជាហត្ថលេខីនៃកិច្ចព្រមព្រៀងទីក្រុងប៉ារីសស្តីអំពីអាកាសធាតុនៅឆ្នាំ២០១៥ តម្រូវឲ្យប្រាប់ទៅ អង្គការសហប្រជាជាតិយឺតបំផុតនៅត្រឹមថ្ងៃទី១០ ខែកុម្ភៈ ឆ្នាំ២០២៥។
យោងតាមទិន្នន័យរបស់អង្គការសហប្រជាជាតិ បានឲ្យដឹងថា ជិត ២០០ ប្រទេស ដែលពាក់ព័ន្ធមានតែ ១០ប្រទេស ប៉ុណ្ណោះដែលដាក់ផែនការបន្ថយឧស្ម័នទាន់ពេលវេលា។ រដ្នមន្រ្តីក្រសួងបរិស្ថានជប៉ុន បានបញ្ជាក់ថា គោលដៅត្រូវតែឈានសម្រេចបាននៅអំឡុងការធ្វើផែនកាថវិកាជប៉ុននៅឆ្នាំ២០៣៥ ដែលនឹងបញ្ចប់នៅដំណាច់ខែមីនា ឆ្នាំ២០៣៦។ ម្យ៉ាងវិញទៀត ប្រទេសជប៉ុនក៏សំដៅកាត់បន្ថយការបំភាយឧស្ម័នផ្ទះកញ្ចក់ឲ្យបាន ៧៣% ពីពេលនេះរហូតដល់ឆ្នាំ២០៤០ បើប្រៀបធៀបនឹងឆ្នាំ២០១៣។
ក្រសួងបរិស្ថានបានទទូចថា ៖ “គោលដៅដ៏មានមហិច្ចតាទាំងនេះ ដើរស្របនឹងគោលដៅពិភពលោកដែលគ្រោងដោយកិច្ចព្រមព្រៀងទីក្រុងប៉ារីស ដែលសំដៅកម្រិតការកើនកម្តៅពិភពលោកមិនឲ្យលើសពី 1,5°C បើប្រៀបធៀបនឹងយុគសម័យមុនឧស្សាហកម្ម និងចុះបញ្ជីនៅក្នុងទស្សនវិស័យនៃការលុបបំបាត់ការបំភាយឧស្ម័នកាបូន។” នៅក្នុងផែនការវិភាគទានរបស់ជប៉ុនដែលដាក់ទៅអង្គការសហប្រជាជាតិកាលពីលើកមុន កាលពីខែមីនា ឆ្នាំ២០២០ ជប៉ុនធ្លាប់បានសន្យាកាត់បន្ថយការបំភាយឧស្ម័នតែ ២៦% ប៉ុណ្ណោះ ពីពេលនេះ រហូតដល់ឆ្នាំ២០៣០។ វាបានបង្កការរិះគន់ដ៏ស្រួចស្រាវពីផ្នែកនៃអង្គការក្រៅរដ្ឋាភិបាល និងអ្នកជំនាញខាងអាកាសធាតុ។
ក្រោយមកភ្លាមៗនោះ ផែនការមួយដែលប្រកបដោយមហិច្ចតាជាង ត្រូវបានលើកបង្ហាញនៅខែតុលា ឆ្នាំ២០២១។ វាដាក់ចេញនូវគោលដៅកាត់បន្ថយការបំភាយឧស្ម័នឲ្យបាន ៤៦% ពីពេលនេះរហូតដល់ឆ្នាំ២០៣០ បើប្រៀបធៀបនឹងឆ្នាំ២០១៣។
លោកម៉ាសាយ៉ូស្ហ៊ី អ៊ីយ៉ូដា បុគ្គលិកទទួលខុសត្រូវសម្រាប់អង្គការជប៉ុនក្រៅរដ្ឋាភិបាលមួយខាងបរិស្ថាន បានប្រតិកម្មថា គោលដៅថ្មី កើតក្រោយការបរាជ័យក្នុងការបង្ហាញទៅកាន់ពិភពលោកនូវភាពជាអ្នកដឹកនាំរបស់ជប៉ុននៅក្នុងការប្រយុទ្ធប្រឆាំងនឹងការប្រែប្រួលអាកាសធាតុ។ លោកសម្តែងការសោកស្តាយថា ៖ “អ្នកវិទ្យាសាស្រ្តបានព្រមានថា ប្រទេសជប៉ុន ត្រូវតែកាត់បន្ថយ ការបំភាយឧស្ម័ន ៨១% ពីពេលនេះទៅដល់ឆ្នាំ២០៣៥ ដើម្បីឲ្យស្របតាមគោលដៅកំណត់សីតុណ្ហភាពផែនដីមិនឲ្យឡើងលើស 1,5°C (...) នាយករដ្ឋមន្រ្តីជប៉ុន ស្ហ៊ីហ្ស៉ឺរូ អ៊ីស្ហ៊ីបា បានចុះចាញ់នៅចំពោះមុខសំពាធនៃឧស្សាហកម្មដែលតម្រូវសម្រាប់ផលប្រយោជន៍នៃឥន្ធនៈផូស៊ីលទាំងនេះ។ លោកបរិហារថា នេះគឺជាបរាជ័យដ៏ធំសម្រាប់ការបម្លែងទៅកាន់ថាមពលកកើតឡើងវិញអនាគត ដែលមានភាពត្រឹមត្រូវ និងសមធម៌។
នៅឆ្នាំ២០២៣ ៧០% នៃតម្រូវការអគ្គីសនីរបស់ជប៉ុនគឺត្រូវបានគ្របដណ្តប់ដោយរោងចក្រកម្តៅដែលដំណើរការដោយឥន្ធនៈកាបូន និងធ្យូងថ្ម។
Daily Program
