ការកើនឡើងទឹកក្រោមដីបង្កការភ័យបារម្ភនៅក្នុងទីក្រុងហ្ស៊្លីតេន ប្រទេសលីប៊ី

ការកើនឡើងដ៏សម្បើមនៃទឹកក្រោមដី​នៅក្នុងទីក្រុងហ្ស៊្លីតេន នៅភាគខាងលិច​ប្រទេសលីប៊ី នៅទ្វីបអាហ្វ្រិក បានជំរុញឲ្យមនុស្សរាប់សិបគ្រួសារ​ចាកចេញពីលំនៅឋានរបស់ពួកគេ ដែល​ទទួលរងការលិច ដែលធ្វើឲ្យមានការភ័យខ្លាចអំពីវិបត្តិទៅលើបរិស្ថាន។

នៅខណៈ​ដែលទឹកជំនន់ ដែលបណ្តាលឲ្យមានមនុស្សស្លាប់ និង​បានបំផ្លាញទីក្រុង​ឌែណា កាលពីខែកញ្ញា ឆ្នាំមុន នៅភាគខាងកើតប្រទេសលីប៊ី ស្ថិតនៅក្នុងការចងចាំនៅឡើយ ទីក្រុង​ហ្ស៊្លីតេន ដែលស្ថិតនៅភាគខាងលិច ចម្ងាយចម្ងាយ ១៦០គម ពីរដ្ឋធានីទ្រីប៉ូលី និងតំបន់​ជន​បទ​នៃ​ទីក្រុង​នេះត្រូវទទួលរងទឹកជន់ ដែលជាទឹកផុសពីក្នុងដី ជនលិចលំនៅដ្ឋាន ចំការ និងផ្ទះ​សម្បែង ហើយទឹកនេះឡើងមិនឈប់រយៈពេល ២ខែមកហើយ។

យោងតាមប្រជាជននៃទីក្រុងដែលមានមនុស្សរស់នៅប្រមាណ ៣៥០០០០នាក់ បាតុភូតនេះ មិនមែនថ្មីទេនៅក្នុងតំបន់ ប៉ុន្តែទំហំរបស់វានៅពេលសព្វថ្ងៃគឺមិនដែលធ្លាប់មានពីមុន។ ផ្ទះ​រាប់​សិបខ្នង ផ្លូវនានា និងចំការត្រូវបានជនលិច ប៉ុន្តែ​មជ្ឈមណ្ឌលកណ្តាលទីក្រុងភាគច្រើន​មិនទាន់លិចទេ។

លោកម៉ូហាម៉ាដ អាលី ឌីយូប ម្ចាស់ចំការមួយ​ដែលមានចំងាយប្រមាន ៤គម​ពីតំបន់​កណ្តាល​ទីក្រុង​ហ្ស៊្លីតេន បានរៀបរាប់ថា ៖ “ទឹកបានចាប់ផ្តើមលិចឡើងពីរខែមកហើយ និងបន្តកើន​ឡើង​​រហូតដល់ជនលិចអណ្តូងរបស់គាត់។ ដើមឈើហូបផ្លែទាំងអស់របស់គាត់ មានប៉ម អាព្រីកូ និងត្របែក បានងាប់”។ បុរសវ័យ ៦០ឆ្នាំរូបនេះ មានរាងកាយហាក់ទន់ខ្សោយ​ប្រឈមមុខនឹងទំហំនៃបញ្ហា​នៅក្នុងតំបន់នេះ ដែលមិនពាក់ព័ន្ធនឹងប្រព័ន្ធទឹក តែជាទឹកចេញ​ពី​ក្នុងដី។ លោកក៏ បានរៀបរាប់ដែរថា លោកអាចសង្រ្គោះដើមត្នោតមួយចំនួន​ដោយសារតែ​លោក​បានទិញខ្សាច់​ដើម្បីគ្រប​ដីមួយផ្នែក និងជួល​ឡានស៊ីទែនទឹកដើម្បីបូម​រូង​ដែលជឿថា ជា​ប្រភពនៃទឹកឡើង”។

គ្រួសារនានា ដែលភ័យបារម្ភថា ស្ថានភាពកាន់តែអាក្រក់ បានចាកចេញពីផ្ទះរបស់ពួកគេ ដែល​ពោរពេញដោយទឹក ហើយផ្ទះផ្នែកខ្លះបានបាក់រលំ និង មិនមាំទាំឡើយ។ លើសពីនេះ ទឹកនេះ​ឡើងនៅហ្នឹងមិនហូរទៅណា និងភក់នៅតាមផ្លូវ បានទាក់​ទាញ​ពពួក​មូស ហើយ​ក៏​​នាំក្លិនមិនល្អដល់ច្រមុះផងដែរ។

លោកម៉ូហាម៉ាដ អាល់ នូរី ដែលជាម្ចាស់ដីដែលលិចទឹកទាំងស្រុង បានរៀបរាប់ថា ដី ដែល​តាម​ធម្មតា មានខ្សាច់ និងមានពណ៌ស ឥឡូវនេះ ឡើងភក់ ពណ៌ខ្មៅ និងមានក្លិនអាក្រក់”។

អាជ្ញាធរ ដែលភ័យខ្លាចអំពីវិបត្តិបរិស្ថាន ឬ​ការខូចខាតនៅក្នុងផ្ទះ បានជម្លៀសប្រជាជន​ដែល​ស្ថិត​នៅក្នុងស្ថានភាពគ្រោះថ្នាក់ឲ្យចាកចេញ។ បើយោងតាមចៅហ្វាយក្រុងហ្ស៊្លីតេន លោក​ម៉ូហ្វតា ហាម៉ាឌី បានឲ្យដឹងថា គ្រួសារជិត ៥០សិប បានចេញទៅតាំងទីលំនៅ​ឡើងវិញ ឬ​ទទួល​អត្ថប្រយោជន៍អំពី​កន្លែងថ្មីដើម្បីតាំងទីលំនៅ។

នៅអំឡុងកិច្ចប្រជុំគណរដ្ឋមន្រ្តី កាលពីថ្ងៃទី៦ ខែកុម្ភៈ នាយករដ្ឋមន្រ្តីលីប៊ី លោកអាប​ដេល​ហា​មីដ ឌ្បីបា បានសន្យាទៅកាន់ប្រជាជននៅទីក្រុងហ្ស៊្លីតេន ថា រដ្ឋាភិបាលរបស់លោក មិន​បោះបង់​កិច្ចខិតខំប្រឹងប្រែងដើម្បីដោះស្រាយ​វិបត្តិនេះដោយវិធី​បែបវិទ្យាសាស្រ្ត និងឲ្យបាន​ឆាប់រហ័ស​នោះឡើយ។ លោកក៏បានជួបជុំរដ្ឋមន្រ្តីពាក់ព័ន្ធ​ដើម្បីចាត់វិធានការចាំបាច់​ដើម្បី​សង​​ការ​ខូចខាត និងឲ្យប្រជាជនរងផលប៉ះពាល់ទៅតាំងទីលំនៅថ្មី។

ស្ថាបនរដ្ឋជាច្រើន ដែល​​រួម​មាន អាជ្ញាធរ គ្រប់គ្រងទន្លេសិប្បនិមិត្ត ដែលបាននាំទឹកមក​ស្រោច​ស្រព​មួយផ្នែកដ៏ធំ​នៃ​​ប្រទេស​​លីប៊ី ក្រុមហ៊ុនអគ្គីសនី និងក្រុមហ៊ុនទឹក ត្រូវ​បាន​ប្រមូល​ផ្តុំ​គ្នាមកដោះស្រាយ​វិបត្តិ។ មជ្ឈមណ្ឌលជាតិប្រយុទ្ធប្រឆាំងនឹងជំងឺ បានប្រញាបមកដល់​កន្លែង ដែលរួមមានអ្នក​សង្រ្គោះ​​បន្ទាន់ សម្ភារ និងថ្នាំសម្លាប់សត្វល្អិតដើម្បី​ចាត់ចែងបញ្ហា​នៃ​មូស​​ដែលនាំជំងឺ។