បើគ្រីស្តបរិស័ទមកព្រះវិហារយឺត តើអាចទទួលព្រះកាយបាន ឬមិនបាន? ព្រោះអ្វី?

បើគ្រីស្តបរិស័ទមកព្រះវិហារយឺត តើអាចទទួលព្រះកាយបាន ឬមិនបាន? ព្រោះអ្វី? សំណូរនេះ​បក​ស្រាយ​ដោយ​លោកបូជាចារ្យ រឿង ឆ័ត្រសិរី បូជាចារ្យទទួល​ខុស​ត្រូវ​​មណ្ឌលសកម្មភាពភ្នំពេញខាងជើង ក្នុយភូមិភាគភ្នំពេញ។

លោកបូជាចារ្យរឿង ឆ័ត្រសិរី​៖       ជម្រាបសួរបងប្អូន! បងប្អូនធ្លាប់មានជីវិតនៅក្នុងព្រះសហគមន៍ ជាពិសេសបងប្អូនគ្រីស្តបរិស័ទ បងប្អូនអាចដឹងថាពិធី ឬការអធិដ្ឋានសំខាន់ជាងគេគឺអ្វី? បាទ នោះគឺអភិបូជា លើសពីការអធិដ្ឋានទៅទៀត។​ អភិបូជា ជាកំពូល ឬផ្លូវការបំផុតនៅក្នុងការចូលរួមសកម្មភាពខាងផ្លូវវិញ្ញាណរបស់ព្រះសហគមន៍ អភិបូជា និងដំណាក់កាលផ្សេងៗដែរ។ ដូច្នេះអត្ថន័យកំពូលនៅក្នុងអភិបូជា គឺយើងរំលឹកឡើងវិញនូវការរស់ឡើងវិញរបស់ព្រះយេស៊ូ និងពិធីចុងក្រោយរបស់ព្រះអង្គ ហើយយើងជាគ្រីស្តបរិស័ទក៏បានទទួលព្រះកាយរបស់ព្រះអង្គផងដែរ។ ដូច្នេះសំណួរក្នុងថ្ងៃនេះក៏បានសួរថា៖ «គ្រីស្តបរិស័ទអាចទទួលបានព្រះកាយបាន ឬមិនបានពេលមកព្រះវិហារយឺត?»  

បងប្អូន! ចំណុចនេះ យើងត្រូវពិចារណាពីចំណុចដែលព្រះសហគមន៍បានប្រាប់យើង។ ទី១ នៅក្នុងមាត្រា៨៤៣ វគ្គទី១ ព្រះសហគមន៍បានលើកឡើងថា អ្នកបម្រើឲ្យសាសនា ឬអគ្គសញ្ញានានាក៏មិនអាចបដិសេធ ពេលមាននណាម្នាក់សុំទទួលអគ្គសញ្ញានៅពេលវេលាដែលសាកសម ក៏ដូចជាការត្រៀមខ្លួនបានយ៉ាងល្អហើយ និងអត់មានខហាមរបស់ព្រះសហគមន៍ជាប់នៅខ្លួនរបស់គាត់ គាត់មានសិទ្ធិទទួល។ មានន័យថាអ្នកផ្តល់អគ្គសញ្ញាហ្នឹង (ឧទាហរណ៍លោកបូជាចារ្យ ឬលោកពុក) គាត់ត្រូវពិចារណាចំណុចទាំងអស់នោះ និងមួយទៀតរឿងការទទួលព្រះកាយព្រះគ្រីស្តតែម្តង។ មាត្រា៩១២ អ្នកដែលទទួលអគ្គសញ្ញាហើយទាំងអស់ បើសិនគាត់អត់មានខហាមអ្វីមួយនៅក្នុងជីវិតរបស់គាត់ តាមច្បាប់ ក៏អាចទទួលព្រះកាយព្រះគ្រីស្តបានដែរ។ ដូច្នេះចំណុចនេះ នាំឲ្យ​យើងនពិចារណាចំណុចពីរ៖  ទី១ ការទទួលព្រះកាយយើងមានខហាម នៅក្នុងខ្លួនឬក៏អត់? នេះសំខាន់ ដែលបងប្អូនត្រូវពិចារណា។ ចំណុចទី២ តើអ្នកដែលចង់ទទួលព្រះកាយព្រះគ្រីស្តសាកសមឬអត់(ត្រៀមខ្លួនឬនៅ) ដើម្បីទទួលព្រះយេស៊ូ។ បងប្អូនត្រូវដឹងថាព្រះយេស៊ូជាលក្ខណៈដ៏វិសុទ្ធ ដ៏សក្ការៈ ដូច្នេះ បើយើងប្រៀបធៀប ឧទាហរណ៍ថា មុនយើងទៅទទួលបាយត្រូវមានចាន ហើយចានទាំងនោះត្រូវលាងឲ្យបានស្អាតបាតជាមុនសិន ដើម្បីឲ្យយើងទទួលទានទៅមានអនាម័យល្អ និងសុខភាពល្អ។ បងប្អូនប្រៀបធៀបមើល ម្ហូបឆ្ងាញ់ បាយមានស្រាប់ហើយដើម្បីឲ្យយើងបានទទួលទាន។ តែចានដាក់បាយម្ហូបនេះមិនទាន់លាងផង តើវាសាកសមដែឬទេ? ដូចគ្នាដែរបងប្អូន! ជីវិតខាងផ្លូវវិញ្ញាណរបស់យើង យើងមើលមិនឃើញ តែបងប្អូនដឹងថាក្នុងជីវិតរបស់យើង សាកសមទទួលស្ថានភាពដ៏វិសុទ្ធរបស់ព្រះជាម្ចាស់ ដែលកើតជាមនុស្ស ឲ្យយើងបានទទួលព្រះកាយព្រះគ្រីស្តឬអត់? ដូច្នេះហើយបានជាព្រះសហគមន៍យើងមានរបៀបដើម្បីឲ្យបងប្អូនរៀបចំ។

ជាទូទៅ បងប្អូនត្រូវមើលខ្លួនឯងថា មានចំណុចត្រូវច្បាប់របស់ព្រះសហគមន៍ហាមឃាត់ឬអត់? នេះជាចំនុចសំខាន់។ ច្បាប់ព្រះសហគមន៍ហាមឃាត់មិនមានច្រើននោះទេ តែមានមួយចំនួន ជាពិសេសបងប្អូនដែលមានបាបធ្ងន់។

តើបាបធ្ងន់មានអ្វីខ្លះ?

ជាទូទៅលោកពុកសុំនិយាយតែ៣ចំណុចទេ៖ ការបោះចោលជំនឿ ធ្លាប់បដិសេធជំនឿ ធ្លាប់បោះចោលព្រះជាម្ចាស់ មិនទទួលស្គាល់ព្រះអង្គ។ ស្ថានភាពនេះបងប្អូនមានឬអត់? ជាទូទៅបើគាត់បដិសេធ គាត់អត់មកព្រះវិហារទេ។ ជួនកាលភាពមិនអើពើយូរៗទៅ វាអាចធ្វើឲ្យយើងឃ្លាតឆ្ងាយពីព្រះជាម្ចាស់។ ឧទាហរណ៍៖ មិនមកព្រះវិហារយូរឆ្នាំ...ឬមួយឆ្នាំមកតែម្តង..។ល។ ទី២ ផិតក្បត់ ឬកុហកក្រុមគ្រួសារ។ បងប្អូនត្រូវប្រយ័ត្នរឿងនេះ ហើយសួរខ្លួនឯងថា បានធ្វើរឿងនេះឬអត់?។ ទី៣ គឺឃាតកម្ម បងប្អូនមានធ្លាប់សម្លាប់មនុស្សឬទេ? ដូចជាការពន្លូតកូន។ ការពន្លូតកូនក៏ចាត់ទុកជាអំពើឃាតកម្មមួយដែរ។ បើបងប្អូនមានចំណុចនេះ សូមជម្រះខ្លួនពីរឿងទាំងអស់នោះ។ និងមានខហាមមួយចំនួនទៀតដែរ ដូចជាការរស់នៅមិនត្រឹមត្រូវ ឬក៏យើងមានបាបធ្ងន់ផ្សេងទៀត នេះជាខហាមពេញមួយជីវិតតែម្តង។ តែមួយទៀតជាទូទៅបងប្អូនអត់មានខហាមទេ ឬច្បាប់ហាមពីព្រះសហគមន៍ បងប្អូនអាចទទួលព្រះកាយបាន ប៉ុន្តែដោយសារខ្លួនយើង អារម្មណ៍យើង ជីវិតស្ថានភាព វិញ្ញាណយើងដូចជាអាប់អួរមិនទាន់សាកសម មិនទាន់សប្បាយ មិនទាន់ត្រៀមខ្លួនល្អ ចំណុចនោះក៏គួរតែពិចារណាផងដែរ។ ដូច្នេះពេលបងប្អូនទៅព្រះវិហារ ធម្មតាបងប្អូនមានចំណុចនេះនៅក្នុងខ្លួន ដែលគេហៅថាទំនៀមទំលាប់ ឬក៏ច្បាប់អប់រំតាំងពីកូនក្មេង។ វិន័យទី៣ គឺទូន្មានថា ថ្ងៃរបស់ព្រះជាម្ចាស់ត្រូវតែថ្វាយបង្គំ បងប្អូនទាំងអស់ត្រូវតែទៅព្រះវិហារ។ ដោយសារមានទំលាប់ វាជាអ្វីដែលល្អម្យ៉ាង តែមិនល្អមួយរយភាគរយនោះទេ។ គឺល្អដោយសារយើងបានទៅជួបព្រះជាម្ចាស់តាមច្បាប់វិន័យ ប៉ុន្តែមួយចំនួនទៀតទៅដោយការបង្ខំ ឬក៏ខ្លាច ឬមិនបានត្រៀមខ្លួនយ៉ាងល្អ។ ចំណុចនេះធ្វើឲ្យការចូលរួម ឬការទទួលព្រះកាយរបស់បងប្អូនធ្លាក់ចុះ និងគិតឡើងវិញថាខ្លួនឯងសាកសមឬអត់? ដូច្នេះការមកយឺត ឬមិនមកយឺត បើសិនណាចូលក្ខណៈនេះ បងប្អូនត្រូវពិចារណាថា តើយើងគួរសមឬអត់? ជួនកាលបងប្អូនមកមុនអភិបូជាទៅទៀត តែពេលនោះបងប្អូកំពុងមានអារម្មណ៍មិនល្អជាមួយអ្នកដទៃ បងប្អូនកំពុងខឹងគេ កំពុងមានចិត្តគង្គួន ឬស្អប់អ្នកដទៃ ឬមានរឿងដែលមិនសប្បាយចិត្ត។ តែបើមិនដឹងខ្លួនមុនទេ ការចូលអភិបូជានាពេលនោះ ក៏ហាក់មិនសាកសម និងការទទួលព្រះកាយព្រះអង្គដែរ។ ដូច្នេះមុនអភិបូជា គេមានធម៌សារភាព តែសម្រាប់បងប្អូនដែលមានបាបស្រាលទេ គឺដើម្បីជួយឲ្យអារម្មណ៍របស់យើង នឹងការត្រៀមខ្លួនទទួលព្រះអង្គ។ តែបើហួសចំណុចនេះហើយ បងប្អូនមិនគួរទទួលព្រះកាយនោះទេ។ ដូច្នេះការផ្អាកទទួលព្រះកាយនេះ គឺជាការត្រៀមខ្លួនឲ្យបានល្អជាថ្មី រួមមានការអធិដ្ឋាន តមអាហារ ឬការអានព្រះគម្ពីរជាដើម... ដើម្បីទទួលព្រះអង្គឡើងវិញ។ ថ្ងៃអភិបូជាមកយឺត ព្រះបន្ទូលក៏មិនបានស្តាប់ តែបងប្អូនមានតម្រូវការ សុំឲ្យព្រះអង្គជួយ ឬចង់ឲ្យព្រះអង្គនៅក្នុងខ្លួនរបស់យើង ឬក៏មានសេចក្តីប្រាថ្នា គឺអាចទទួលព្រះកាយព្រះគ្រីស្តបាន។ ដូច្នេះការមកព្រះវិហារយឺត ឬមិនយឺតមិនបញ្ហានោះទេ តែសំខាន់ក្នុងចិត្តរបស់យើងចង់ទទួលព្រះអង្គឬអត់? សាកសមទទួលព្រះអង្គឬអត់?។ ទី១ មានបាបធ្ងន់ឬអត់? ទី២ ចិត្តរបស់យើងបានត្រៀមខ្លួនយ៉ាងល្អឬអត់?។ បងប្អូនត្រូវដឹងថាមនុស្សមិនបរិសុទ្ធមួយរយភាគរយនោះទេ។ តែព្រះកាយព្រះអង្គដូចជាថ្នាំជួយព្យាបាលជំងឺផ្លូវវិញ្ញាណរបស់យើង។ មានន័យថាសេចក្តីស្រលាញ់របស់ព្រះជាម្ចាស់ធំធេង និងជួយព្យាបាលរបួសស្នាមក្នុងចិត្តរបស់យើងបានដែរ។ ការទទួលព្រះកាយជួយព្យាបាល ឬក៏ជាថ្នាំម្យ៉ាងដ៏ពូកែផងដែរ៕