ថ្ងៃទី០៩ ខែតុលា ២០២៤អត្ថបទគម្ពីរ លូកា(១១,១-៤)អត្ថាធិប្បាយគម្ពីរដោយ៖ លោកបូជាចារ្យ រ៉ាជេត ហាសាពូទី

បងប្អូនជាទីគោរពអត្ថបទថ្ងៃនេះតាមលូកា(១១,១-៤) ព្រះយេស៊ូបង្រៀនសាវ័កអំពីរបៀបអធិដ្ឋាន ព្រះ​អង្គ​​បង្រៀនសាវ័កពីធម៌ឱព្រះបិតា ប្រហែលធម៌​ឱព្រះបិតាជាធម៌មួយដ៏សំខាន់មែន​ទែនសម្រាប់​យើង ព្រោះយើងសូត្ររាល់ថ្ងៃ ប៉ុន្តែជូនកាលយើងមិនបានយក​ចិត្តទុកដាក់​នៃតម្លៃនិ​ងខ្លឹម​សា​រធម៌​ឱ​ព្រះ​បិតា  ធម៌នេះរំលឹកអត្តសញ្ញាណរបស់យើង ជាបុត្រធីតារបស់ព្រះជាអម្ចាស់។

​យើង​​ត្រូវពោលប្រាប់ព្រះអង្គថា ឱព្រះបិតាអើយ! ព្រះជាអម្ចាស់ជាព្រះបិតារបស់យើងខ្ញុំ យើងខ្ញុំជា​បុត្រា​បុត្រី​របស់ព្រះអង្គ យើងត្រូវថ្វាយព្រះនាមព្រះអង្គ អរព្រះគុណ កោតសរសើរ និងលើកតម្កើងព្រះ​នាម​ព្រះអង្គ យើងមានទំនាក់ទំនងជាមួយព្រះអង្គពោរពេញទៅដោយសេចក្តីស្រឡាញ់។ ព្រះបិតា​ស្រឡាញ់​យើងច្រើនជាងឪពុកស្រឡាញ់កូនយើង ព្រះយេស៊ូគ្រីស្តបូជាព្រះជន្មនៅលើឈើឆ្កាង ព្រះអង្គ​អត់​ទោស​ឱ្យ​យើ​ងរួចពីបាបជានិច្ច ប៉ុន្តែបើយើងមិនអត់ទោសឱ្យអស់អ្នកដែលប្រព្រឹត្តខុសនឹងយើងខ្ញុំ ព្រះអង្គក៏​មិនអត់ទោសឱ្យយើងខ្ញុំដែរ។ ប្រសិនបើយើងអត់ទោសឱ្យគេ ព្រះអង្គនឹងអត់ទោសឱ្យយើងដែរ។

ជាទីបញ្ចប់ដោយការសូត្រធម៌ឱព្រះបិតាយើងសុំព្រះអង្គថា សូមកុំបណ្តោយឱ្យ​យើងខ្ញុំចាញ់​ការល្បួង​ឡើយ​​។ យើងជួបប្រទះការល្បួងរបស់​មារសាតាំង សង្គមបច្ចុប្បន្ននេះ និង​របស់​ទំនើបបាននឹងកំពុងអូស​ទាញ​​​​យើងទៅឆ្ងាយពីព្រះជាម្ចាស់ ទៅឆ្ងាយពីព្រះសហគមន៍ និងទៅឆ្ងាយពីបងប្អូនគ្រីស្តបរិស័ទ។ ដូច្នេះ​ពេលណាយើងអធិដ្ឋានធម៌ឱព្រះបិតាដោយស្មោះត្រង់ ព្រះអង្គនឹងការពារយើងព្រះអង្គប្រោសយើង​ឱ្យ​ស្ថិតជាប់ជាមួយនិងព្រះអង្គជានិច្ច។

បងប្អូនជាទីស្រឡាញ់! អត្ថបទថ្ងៃនេះគឺធម៌ឱព្រះបិតាជាធម៌ដែល​ជួយ​យើងស្រឡាញ់ព្រះជា​អម្ចាស់ជា​ព្រះបិតា​អស់ពីដួងចិត្ត។ សុំពួកយើងសូត្រធម៌ឱព្រះបិតាដោយទុកចិត្ត​របស់​យើងទាំងស្រុងលើព្រះអង្គ។ សូមព្រះជាអម្ចាស់ប្រទានពរយើង៕