លោកមូកេស្ហ អំបានី កើតនៅថ្ងៃទី១៩ ខែមេសា ឆ្នាំ១៩៥៧ នៅទីក្រុងអេដេន ប្រទេស យេម៉េន។ លោកគឺជាធុរជន និងជាមហាសេដ្ឋីពាន់លានរបស់ឥណ្ឌា។
ជាបងប្អូនរបស់លោកអានីល អំបានី លោកមូកេស្ហ អំបានី ជាអ្នកដឹកនាំក្រុមហ៊ុន រីលៀន អ៊ីនដាសស្រ្ទីស៍ (Relience Industies) ដែលជាសហគ្រាសឯកជនឥណ្ឌា។ នេះគឺជាសហគ្រាសដ៏ធំមួយក្នុងចំណោមសហគ្រាសធំៗបំផុតបី នៅឥណ្ឌា។
លោកមូកេស្ហ អំបានី គឺជាកូនប្រុសរបស់ធុរជន លោក ឌៀរូបហៃ អំបានី និងភរិយា លោកស្រីកូកីឡាបេន ឌៀរូបហៃ អំបានី។
លោកមូកេស្ហ អំបានី មានបងប្អូនម្នាក់ គឺលោក អានីល អំបានី និងបងប្អូនស្រីពីរនាក់ គឺ លោកស្រីនីណា បាដ្រាស្ហ៊ីយ៉ាម និងលោកស្រី ឌីបទី ដាតតារា សាល់ហ្គ៉ាអុនកា។
បន្ទាប់ពីមរណភាពឪពុករបស់ពួកគេ ដោយគ្មានបណ្តាំមរតក នៅឆ្នាំ២០០២ បងប្អូនលោកមូកេស្ហ និងលោកអានីល បានបែកបាក់គ្នាយ៉ាងខ្លាំងក្លានៅជុំវិញរឿងការស្នងមរតក។
នៅឆ្នាំ២០០៥ ចក្រភពជំនួញគ្រួសារបានបែងចែកជាពីរ។ លោកមូកេស្ហ អំបានី ស្នងមរតកសកម្មភាពឧស្សាហកម្ម នៅខណៈដែលលោកអានីល អំបានី ទទួលមរតកលើសកម្មភាពខាងថាមពល និងប្រព័ន្ធផ្សពផ្សាយ។
លោកមូកេស្ហ អំបានី បានឲ្យសាងសងនៅទីក្រុងបំបៃ សម្រាប់ការប្រើប្រាស់ផ្ទាល់ខ្លួនរបស់លោកនូវអគារដែលមានកម្ពស់ ២៧ ជាន់ អគារ អេនទីលៀ (Antilia) ដែលត្រូវបានចាត់ទុកជានិវេសនដ្ឋានស្នាក់នៅឯកជនដ៏ថ្លៃបំផុតនៅលើពិភពលោក ដែលត្រូវបានវាយតម្លៃថា មានតម្លៃ ១ពាន់លានដុល្លារ។
អគារនេះ មានកន្លែងចុះចតឧទ្ធម្ភាចក្រជាច្រើន កន្លែងចតរថយន្តដែលដាក់រថយន្តបាន ១៦០ គ្រឿង សាលមើលកុន អាងហែទឹក កន្លែងហាត់ប្រាណ និងយ៉ូហ្គ៉ា សួនអណ្តែត ប្រាសាទ ព្រមទាំងសាលដែលនៅក្នុង មានព្រិលធ្លាក់សិប្បនិមិត្ត។ មនុស្សប្រមាណ ៦០០នាក់ ជាអ្នកធ្វើការនៅក្នុងនោះ។
លោកមូកេស្ហ អំបានី ចំណាយប្រាក់ ១០០លាន ដុល្លារ សម្រាប់អាពាហ៍ពិពាហ៍កូនស្រីរបស់លោកជាមួយកូនប្រុស អ្នកមានម្នាក់ទៀត នៅខែធ្នូ ឆ្នាំ២០១៨។ នៅក្នុងចំណោមភ្ញៀវចូលរួម ក៏មានបុគ្គលល្បីៗ ដូចជា អ្នកចម្រៀងបេយ៉ងសេ និងអតីតរដ្ឋមន្រ្តីអាម៉េរិក ដូចជា លោកស្រី ហ៊ីលឡារី គ្លីនតុន និងលោក ចន ឃែរីជាដើម។ លោកមូកេស្ហ អំបានី ចំណាយ ១៥០លានដុល្លារ សម្រាប់ការរៀបការកូនប្រុសពៅរបស់លោក ជាមួយកូនស្រីមហាសេដ្ឋីពាន់លានឥណ្ឌាម្នាក់ទៀតនៅខែមីនា ឆ្នាំ២០២៤។ មេដឹកនាំនយោបាយជាច្រើន ទាំងឥណ្ឌា ក៏ដូចជាអន្តរជាតិ និងមហាសេដ្ឋីដែលមានវត្តមាននៅក្នុងពិធី មានដូចជា លោកថូនី ប្ល៊ែរ លោកបូរី ចនសុន លោកចាស្ទីន ប៊ីប៊ើ រីហាណា មហាសេដ្ឋី ប៊ីល ហ្គេត លោកស្រី អ៊ីវ៉ាន់កា ត្រាំ លោកម៉ាក ជូឃើប៊ឺក និងបងប្អូន កាដាស្ហ៊ាន។
ដោយត្រូវពិព៌នាថាជាមិត្តភក្តិជិតស្និទ្ធជាមួយនាយករដ្ឋមន្រ្តី ណារិនដ្រា ម៉ូឌី ដែលលោកមូកេស្ហ អំបានី ជួយចូលរួមឲ្យឡើងកាន់អំណាចនៅឆ្នាំ២០១៤ លោកមូកេស្ហ អំបានី ក៏ទទួលបានគុណប្រយោជន៍ពីភាពស្និទ្ធស្នាលជាមួយរដ្ឋាភិបាលដើម្បីសម្រួលដល់អាជីវកម្មរបស់លោក។ លោកមូកេស្ហ អំបានី ក៏ត្រូវបានពិព៌នាថា ជាអ្នកទទួលបានប្រយោជន៍ម្នាក់ដ៏សំខាន់ពីកំណែទម្រង់លើវិស័យកសិកម្មនៅឆ្នាំ២០២០ នៅប្រទេសឥណ្ឌា។
ទ្រព្យសម្បត្តិរបស់លោកមូកេស្ហ អំបានី វាយតម្លៃថា មាន ១១៣,២ ពាន់លានដុល្លារ ស្ថិតនៅក្នុងលំដាប់ទី១១ នៃទស្សនាវដ្តី Forbes។ លោកក៏ជាអ្នកបំផុតនៅអាស៊ី។ នៅឆ្នាំ២០២៣ ទស្សនាវដ្តី Forbes បានចាត់ថ្នាក់លោកទី១ នៅក្នុងបញ្ជីអ្នកមានបំផុតនៅប្រទេសឥណ្ឌា។
Daily Program
