ជូ កឺលៀង អ្នកយុទ្ធសាស្រ្តនៃនគរស៊ូ ក្នុងអំឡុងសម័យសាមកុក

លោកជូ កឺលៀង គឺជាអ្នកយុទ្ធសាស្រ្តដ៏ឈ្លាសវៃបំផុតនៃយុគសម័យសាមកុក ចិនបុរាណ។ ជូ កឺលៀង បម្រើ​ការឲ្យស្តេចលីវ ប៉ី និងធ្វើជាឧបរាជនៃនគរស៊ូ។ លោកដឹកនាំការឈ្លានពាន ៥​ដង លើនគរវ៉េភាគខាងជើង ក្នុងគោលដៅស្តាររាជ្យវង្សហានឡើងវិញ។ 

លោកជូ កឺលៀង មានភរិយា ឈ្មោះ ហ័ង ស្ហ៊ី។ លោកគឹជាប្អូនពៅរបស់ជូ កឺជីន និង​ជា​បងប្រុស​​របស់​ជូ កឺជន។ លោកជូ កឺលៀង រៀនសូត្រជាមួយស៊ូ ស្ហ៊ី និងផាង ថុង គ្រូ​របស់​ពួកគេ​គឺស៊ីម៉ា ហួយ។ ឈ្មោះជូ កឺលៀង គឺមានន័យក្នុងប្រទេសចិនថា ជាបញ្ញាញៀន និង​ដួង​ព្រលឹង។

លោកជូ កឺលៀង កើតក្នុងអំឡុងឆ្នាំ១៨១ នៅអំឡុងបណ្តាលឆ្នាំចុងក្រោយនៃរាជ្យវង្សហាន នៅ​ខេត្តយ៉ាងទូ ឬខេត្តស្ហ៉ានទុង ប្រទេសចិនសព្វថ្ងៃ។ ដោយបានក្លាយជាក្មេងកំព្រាតាំងពីវ័យ ក្មេង ជូ កឺលៀង ត្រូវតម្រូវឲ្យចាកចេញពីស្ហ៉ានទុង ក្នុង​អំឡុងការសម្លាប់រង្គាលជនស៊ីវិល ៤០០០០០នាក់​ ដោយឆាវឆាវ ដែលជាស្តេចត្រាញ់ ដ៏មាន​អំណាចនៅទំនាបកណ្តាល។

រយៈពេលប៉ុន្មានឆ្នាំ លោករស់នៅក្នុងកសិដ្ឋានតូចមួយនៅភូមិឡុងចុង ធ្វើស្រែចំការ និង បង្កើត​​មិត្តភាពជាមួយនឹងអ្នកល្បីល្បាញខាងអក្សរសាស្រ្ត យោធា និងទស្សនវិទូ នៅជំនាន់​នោះ។ កេរ្តិ៍ឈ្មោះរបស់លោកចាប់ផ្តើមល្បាញល្បី។ យោងតាមកំណត់ហេតុនៃសម័យ​សាមកុក លីវ ប៉ី បានមករកលោកចំនួន ៣ដង និង​អង្វរលោកធ្វើឲ្យធ្វើជាអ្នកយុទ្ធសាស្រ្ត​ឲ្យ​គាត់។ បន្ទាប់ពី ការពិភាក្សារយៈពេលដ៏យូរ និងត្រូវ​ធ្វើ​ឲ្យរំភើបដោយភាពស្មោះត្រង់របស់លីវ ប៉ី ជូ កឺលៀង ក៏យល់ព្រម និងចាកចេញពីកសិដ្ឋាន​របស់លោកដើម្បីចូលរួមធ្វើការជាមួយលី ប៉ី។ នៅពេល នោះ លោកមានអាយុ ២៦ឆ្នាំ។

ជាមួយនិងលី ប៉ី ជូ កឺលៀង បានស្ថាបនានគរស៊ូ។ ដោយចងសម្ព័ន្ធជាមួយស៊ុន ឈៀន ស្តេច​នៃ​នគរអ៊ូ ពួកគេបានយកឈ្នះកងទ័ពឆាវឆាវនៅសមរភូមិជ្រោះក្រហម។ បន្ទាប់មក ជូ កឺលៀង ក៏ត្រូវបានតែងតាំងជាមហាឧបរាជ នៅពេលលី ប៉ីឡើងសោយរាជ្យ​ជា អធិរាជ។ ប៉ុន្តែ​លីវ ប៉ី បានសោយទីវង្គតនៅឆ្នាំ២២៣ បន្ទាប់យុទ្ធនាការយោធាដ៏អន្តរាយ​របស់ នគរស៊ូប្រឆាំង​នឹង​នគរអ៊ូ។ រាជ្យសម្បត្តិត្រូវប្រគល់​ឲ្យ​លីវ ស្ហ៉ាន ជាបុត្រ ហើយជូ គឺលៀង បានបម្រើការ​រាជការ​នគរស៊ូ ក្នុងនាមជាឧបរាជ​រហូត​ដល់​ទទួលមរណភាព នៅឆ្នាំ២៣៤។

នៅឆ្នាំ២២៥ ជូ កឺលៀង បានដឹកនាំយុទ្ធនាការយោធាទៅភាគខាងត្បូង និងបញ្ចប់ដោយ​សន្តិភាព​នូវការបះបោររបស់ជនជាតិដើម។ ដោយសារតែមានធនធាននៃទឹកដី​ដែលដណ្តើម​បាន​​ថ្មី នគរស៊ូបានចាប់ផ្តើមរុងរឿង ហើយជូ កឺលៀង ក៏ត្រៀមសម្រាប់ការវាយប្រហារដ៏ធំ​ទៅ​​ភាគខាងជើង។

នៅអំឡុងការគ្រប់គ្រងរដ្ឋបាល ដ៏ល្អឥតខ្ចោះ របស់ជូ កឺលៀង នគរស៊ូ បានស្គាល់នូវភាព រុងរឿង​យ៉ាងឆាប់រហ័ស និងអាចទប់ទល់ និងទាំងវាយប្រហារនគរវ៉េដ៏មាន អំណាច នៅភាគ​ខាង​ជើងផង។ ក្នុងអំឡុងបណ្តាលឆ្នាំ ចុងក្រោយនៃជីវិត ជូ កឺលៀង បានធ្វើយុទ្ធនាការ​យោធា​ចំនួន ៥ដង ដើម្បីដណ្តើមយកនគរវ៉េ នៅភាគខាងជើង ប៉ុន្តែត្រូវបរាជ័យ។ អ្នកវិភាគថា វា បណ្តាលមកពីអសមត្ថភាពរបស់អធិរាជលីវ ស្ហ៉ាន នៃនគរស៊ូ ហើយ​នគរ​វ៉េមាន​ទាហាន និង មេទ័ពច្រើនជាងនគរស៊ូផង។

ក្នុងអំឡុងយុទ្ធនាការយោធាចុងក្រោយ ជូ កឺលៀង មានការនឿយហត់លើសកម្រិត និងធ្លាក់​ខ្លួនឈឺ។ លោកទទួលមរណភាព។ ជៀង វ៉េ ដែលពីមុនជាឧត្តមសេនីយ៍ម្នាក់របស់នគរវ៉េ ដែល​ជូ កឺលៀង បានបញ្ចុះបញ្ចូលមកចូលរួមនឹងនគរស៊ូ បានស្នងបន្តពីលោក។