ឯកសារថ្មីរបស់បុរីវ៉ាទីកង់រាយបញ្ជី «ការរំលោភយ៉ាងធ្ងន់ធ្ងរ» លើសេចក្តីថ្លៃថ្នូររបស់មនុស្ស

ឯកសារថ្មីដែលប្រកាសដោយក្រសួងគោលលទ្ធិនៃជំនឿរបស់សន្តអាសនៈបានចេញផ្សាយនូ​វបញ្ជីសកម្មភាពដែលព្រះសហគមន៍កាតូលិកចាត់ទុកថាជាសកម្មភាពរំលោភយ៉ាងធ្ងន់ធ្ងរលើសេចក្តីថ្លៃថ្នូរបស់មនុស្សជាតិ។

វ៉ាទីកង់ញូវបានរាយការណ៍ថា ឯកសារនេះក្រុមការងាររបស់ក្រសួងនេះ បានចំណាយពេលប្រាំឆ្នាំដើម្បីបញ្ចប់ ហើយត្រូវបានចងក្រងចំនួន​៧​ជំពូក។ ជំពូកទី១ស្តីអំពី មូលដ្ឋានគ្រឹះនៃជីវិតដែល​រិះគិត​អំពី​ស្នាព្រះហស្តរបស់ព្រះជាម្ចាស់។​

ជំពូកទី២គឺ សេចក្តីថ្លៃថ្នូររបស់​មនុស្ស​គ្រប់រូប គឺពួកគេជារូបតំណាងរបស់ព្រះជាម្ចាស់ ទោះមានក្តីក្រក្តី​ មនុស្សទាំងអស់​មាន​សិទ្ធិ សេរីភាព និង​សេចក្តីថ្លៃថ្នូរ​របស់​ខ្លួន ហើយ​ពួកគេ​ត្រូវ​ទទួល​បាន​ការ​ធានា​និងគាំពារ តាំងពី​ពេល​ចាប់កំណើត។ ក្នុងនោះ​ក៏​បាន​លើក​ឡើង​អំពី​ទារក​ក្នុងផ្ទៃ និង​កុមារ​មានពិការភាពផងដែរ។​

ជំពូកទី​៣គឺ បញ្ជីនៃអំពើ​ហិង្សាលើមនុស្ស​ជាតិដែល​រាប់​តាំងពី ស្ថានភាពរស់នៅរបស់មនុស្សតូចតាច​ ការ​ដាក់ទោសតាម​អំពើចិត្ត ការនិរទេស ទាសភាព ពេស្យាចារ ការលក់ស្ត្រីនិងកុមារ ការបន្ទាបបន្ថោកលក្ខខណ្ឌការងារដើម្បីប្រាក់ចំណេញជាដើម។ ទោសប្រហារជីវិតក៏ត្រូវបានលើកឡើងផងដែរ ចាប់តាំងពីវា "រំលោភលើសេចក្តីថ្លៃថ្នូរដែលមិនអាចកាត់ថ្លៃបានរបស់មនុស្សគ្រប់រូប ដោយមិនគិតពីកាលៈទេសៈណាក៏ដោយ។

ជំពូកទី​៤ គឺ​ភាពក្រីក្រ សង្គ្រាម និងការជួញដូរមនុស្ស។ ហើយ​ភាពក្រីក្រ គឺជា​កត្តា​សំខាន់ជាងគេ​ ដែលបង្ក​ឲ្យកើត​មាន​អំពើ​អយុត្តិធម៌ក្នុងពិភពលោកនេះ បន្ទាប់​មក​គឺ​សង្គ្រាម​ដែលប​ង្កវិនាសកម្ម​ដល់​មនុស្សជាតិ​ បង្កឲ្យកើត​វិបត្តិនានា​ជាច្រើន​ផងដែរ។​ ឯកសារនេះ​ក៏​បាន​និយាយដែរ​អំពី​ការអំពាវនាវ​ឲ្យ​ប្រយុទ្ធប្រឆាំង​នឹង​ទីផ្សារ​សរីរាង្គ និង​ជាលិការបស់មនុស្ស​  ការកេងប្រវ័ញ្ចផ្លូវភេទលើកុមារា និងកុមារី ពលកម្មទាសករ រួមទាំងពេស្យាកម្ម ពាណិជ្ជកម្មគ្រឿងញៀន និងអាវុធ អំពើភេរវកម្ម និងឧក្រិដ្ឋកម្មរៀបចំជាអន្តរជាតិ។

ជំពូកទី​៥ គឺ​ស្តីអំពី​ការរំលូតកូន និងការពពោះជំនួស។ ការ​រំលូតកូន អាចចាត់ទុកថា​ជា​ឧក្រិដ្ឋកម្មមួយដែរ ហើយ​ការពពោះ​ជំនួស គឺជា​អំពើ​ពាណិជ្ជកម្មមួយដែលមិន​អាចទទួល​យក​បាន ព្រោះ​កូន​ជាអំណោយពីព្រះជាម្ចាស់ មិនដែលជាមូលដ្ឋាននៃកិច្ចសន្យាពាណិជ្ជកម្មនោះទេ។

ជំពូកទី​៦ ស្តីអំពី ទ្រឹស្តីយេឌឺ។ ឯកសារនេះសង្កត់ធ្ងន់ថា "រាល់សញ្ញានៃការរើសអើងជារឿងអយុត្តិធម៌" ដែលប្រឆាំងនឹងអ្នកស្រឡាញ់ភេទដូចគ្នា "គឺត្រូវជៀសវាងដោយប្រុងប្រយ័ត្ន ជាពិសេសទម្រង់នៃការឈ្លានពាន និងអំពើហិង្សាណាមួយ" ។

និង​ជំពូកទី៧ ស្តីអំពីហិង្សាឌីជីថល។ ចំណុចនេះ​ផ្តោត​សំខាន់​លើ​ អំពើហឹង្សាថ្មីកំពុងរីករាលដាលតាមរយៈប្រព័ន្ធផ្សព្វផ្សាយសង្គម ដូចជា​ ការគំរាមកំហែងតាមអ៊ីនធឺណិត និងការកេងប្រវ័ញ្ចមនុស្សសម្រាប់គោលបំណងផ្លូវភេទ ឬតាមរយៈល្បែងស៊ីសងជាដើម។

សេចក្តីបញ្ចប់នៃឯកសារនេះ គឺជំរុញឲ្យមាន «ការគោរពសេចក្តីថ្លៃថ្នូររបស់មនុស្សនៅ​គ្រប់កាលៈទេសៈទាំងអស់ ហើយ​ត្រូវ​ដាក់សេចក្តីថ្លៃថ្នូរ​នេះ​នៅចំកណ្តាលនៃការប្តេជ្ញាចិត្តចំពោះផលប្រយោជន៍រួម និងនៅកណ្តាលនៃប្រព័ន្ធច្បាប់ទាំងអស់»៕