សារលិខិតរបស់សម្តេចប៉ាប ហ្វ្រង់ស៊ីស្កូ សម្រាប់ ទិវាបេសកកម្មប្រកាសដំណឹងល្អសកលលើកទី៩៧ ឆ្នាំ២០២៣
សារលិខិតរបស់សម្តេចប៉ាប ហ្វ្រង់ស៊ីស្កូ
សម្រាប់ ទិវាបេសកកម្មប្រកាសដំណឹងល្អសកលលើកទី៩៧ ឆ្នាំ២០២៣
(ថ្ងៃទី ២២ ខែតុលា ឆ្នាំ២០២៣)
«ដួងចិត្តឆេះឆួលជើងចេញដំណើរ»
(លក ២៤,១៣-៣៥)
******
បងប្អូនជាទីស្រឡាញ់
សម្រាប់ថ្ងៃអាទិត្យទិវាបេសកកម្មប្រកាសដំណឹងល្អសកលឆ្នាំនេះ ខ្ញុំបានជ្រើសរើសប្រធានបទមួយ ដែលទទួលគំនិតមកពីអត្ថបទ សាវ័កពីរនាក់ធ្វើដំណើរទៅភូមិអេម៉ាអ៊ូស នៅក្នុងព្រះគម្ពីរដំណឹងល្អរបស់សន្តលូកា (លក ២៤,១៣-៣៥) “ដួងចិត្តឆេះឆួល ជើងចេញដំណើរ”។ សាវ័កទាំងពីរនាក់មានការពិបាកចិត្ត និងខកចិត្ត ប៉ុន្តែ ការជួបព្រះគ្រីស្តតាមរយៈព្រះបន្ទូល និងពិធីកាច់នំប៉័ង បានធ្វើឲ្យពួកគេមានអណរ ចេញដំណើរទៅក្រុងយេរូសាឡឹមវិញ ហើយប្រកាសថា ព្រះអម្ចាស់មានព្រះជន្មរស់ឡើងវិញពិតប្រាកដមែន។ នៅក្នុងដំណើររឿងនៃដំណឹងល្អ យើងបានឃើញការផ្លាស់ប្តូរក្នុងក្រុមសាវ័ក តាមរយៈរូបភាពមួយចំនួន៖ ពួកគេរំភើបចិត្ត នៅពេលស្តាប់ព្រះយេស៊ូបកស្រាយព្រះគម្ពីរ ភ្នែកមើលឃើញដើម្បីទទួលស្គាល់ព្រះអង្គ ហើយចំណុចកំពូលនោះ គឺជើងរបស់ពួកគេចេញដំណើរ។ ដោយសញ្ជឹងគិតអំពីទិដ្ឋភាពទាំងបី ដែលរាយរាប់អំពីដំណើររបស់ក្រុមសាវ័កក្នុងការប្រកាសដំណឹងល្អនេះ យើងអាចបន្តការខ្នះខ្នែងរបស់យើងក្នុងការប្រកាសដំណឹងល្អ នៅក្នុងពិភពលោកសព្វថ្ងៃ។
១- ចិត្តរបស់យើងរំភើប “ពេលព្រះអង្គបកស្រាយព្រះគម្ពីរ” ព្រះបន្ទូលរបស់ព្រះជាម្ចាស់ បំភ្លឺ និងកែប្រែចិត្ត ក្នុងសកម្មភាពប្រកាសដំណឹងល្អ។
នៅតាមផ្លូវពីក្រុងយេរូសាឡឹមទៅក្រុងអេម៉ាអ៊ូស សាវ័កទាំងពីរមានការពិបាកចិត្ត ដែលទឹកមុខរបស់ពួកគេបានបង្ហាញឡើង ដោយសារការសោយទិវង្គតរបស់ព្រះយេស៊ូ ដែលពួកគេបានសង្ឃឹម (លក ២៤,១៧)។ ដោយប្រឈមមុខនឹងការបរាជ័យរបស់លោកគ្រូដែលជាប់ឆ្កាង សេចក្តីសង្ឃឹមរបស់ពួកគេលើព្រះមេស្ស៊ី បានដួលរលំ (លក ២៤,២១) ។
បន្ទាប់មក «នៅពេលដែលពួកគេកំពុងតែពិភាក្សាគ្នាទៅវិញទៅមក ព្រះយេស៊ូយាងមកជិតគេ ហើយធ្វើដំណើរជាមួយគេទៅ» (លក ២៤,១៥)។ ដូចកាលដែលព្រះអង្គត្រាស់ហៅក្រុមសាវ័កលើកដំបូង សព្វថ្ងៃនេះនៅពេលដែលពួកគេបានយល់ខុស ព្រះអម្ចាស់បានចាប់ផ្តើមមុន ដោយចូលទៅជិតពួកគេ ហើយដើរជាមួយគេ។ នៅក្នុងធម៌មេត្តាដ៏ខ្ពង់ខ្ពស់របស់ព្រះអង្គ ទ្រង់មិនដែលព្រងើយកន្តើយក្នុងការគង់នៅជាមួយយើងឡើយ ទោះបីយើងមានកំហុស មានចិត្តសង្ស័យ មានភាពទន់ខ្សោយ ហើយសូម្បីតែការសោកសៅ និងទុទិដ្ឋិនិយម ដែលធ្វើឲ្យយើងក្លាយជា «មនុស្សខ្វះប្រាជ្ញា និងមិនងាយជឿ» (លក ២៤,២៥) ជាមនុស្សដែលមានជំនឿ
តិច។
សព្វថ្ងៃនេះក៏ដូចជាពីកាលពីដើមដែរ ព្រះអម្ចាស់ដែលរស់ឡើងវិញ គង់នៅក្បែរក្រុមសាវ័ករបស់ព្រះអង្គ ដែលប្រកាសដំណឹងល្អ ហើយព្រះអង្គរួមដំណើរជាមួយពួកគេ ជាពិសេសនៅពេលដែលពួកគេមានអារម្មណ៍បរាជ័យ បាក់ទឹកចិត្ត ភ័យខ្លាចចំពោះអាថ៌កំបាំងនៃអំពើទុច្ចរិត ដែលនៅជុំវិញពួកគេ ហើយធ្វើឲ្យពួកគេដកដង្ហើមមិនចង់រួច។ ហេតុនេះ «យើងមិនត្រូវបណ្តោយឲ្យគេប្លន់យកក្តីសង្ឃឹមនោះឡើយ!» (Evangelii Gaudium លេខ៨៦)។ ព្រះអម្ចាស់ធំជាងបញ្ហារបស់យើង ជាពិសេស បើយើងជួបបញ្ហាទាំងនោះក្នុងការប្រកាសដំណឹងល្អដល់ពិភពលោក ដ្បិតតាមពិតទៅ បេសកកម្មនេះគឺជាបេសកកម្មរបស់ព្រះអង្គ ហើយយើងគ្រាន់តែជាសហការីដ៏សាមញ្ញរបស់ព្រះអង្គ “អ្នកបម្រើធម្មតាប៉ុណ្ណោះ” (លក ១៧,១០)។
ខ្ញុំចង់បង្ហាញភាពស្និទ្ធស្នាលរបស់ខ្ញុំក្នុងអង្គព្រះគ្រីស្ត ចំពោះអស់អ្នកប្រកាសដំណឹងល្អទាំងបុរស និងស្ត្រីក្នុងពិភពលោក ជាពិសេស ចំពោះអស់អ្នកដែលកំពុងរងទុក្ខលំបាកគ្រប់ប្រភេទ។ មិត្តទាំងអស់ជាទីស្រឡាញ់ ព្រះអម្ចាស់ដែលមានព្រះជន្មរស់ឡើងវិញគង់នៅជាមួយអ្នក។ ព្រះអង្គទតឃើញចិត្តដ៏សប្បុរសរបស់អ្នក និងការលះបង់ដែលអ្នកកំពុងធ្វើសម្រាប់បេសកកម្មប្រកាសដំណឹងល្អនៅកន្លែងដាច់ស្រយាលបំផុត។ ជីវិតរបស់យើង មិនមែនស្ងប់ស្ងាត់ និងគ្មានពពករាល់ថ្ងៃនោះទេ ប៉ុន្តែ សូមឲ្យយើងនឹកដល់ព្រះបន្ទូលរបស់ព្រះអម្ចាស់យេស៊ូ ចំពោះមិត្ដសម្លាញ់របស់ព្រះអង្គមុនពេលរងទុក្ខលំបាកថា៖ «អ្នករាល់គ្នាជួបនឹងទុក្ខវេទនានៅក្នុងលោក ប៉ុន្តែ ចូរមានសង្ឃឹមឡើង! ខ្ញុំបានឈ្នះលោកនេះហើយ» (យហ ១៦,៣៣)។
ក្រោយពេលបានស្តាប់សាវ័កពីរនាក់នៅតាមផ្លូវទៅភូមិអេម៉ាអ៊ូស ព្រះយេស៊ូដែលមានព្រះជន្មរស់ឡើងវិញ «បានបកស្រាយសេចក្ដីដែលមានចែងទុកអំពីព្រះអង្គនៅក្នុងគម្ពីរទាំងមូល ចាប់ពីគម្ពីរលោកម៉ូសេ រហូតដល់គម្ពីរព្យាការីទាំងអស់» (លូកា ២៤,២៧)។ ចិត្តរបស់ពួកគេបានរំភើបជាខ្លាំង ដូចដែលពួកគេបានទទួលស្គាល់ចំពោះគ្នាទៅវិញទៅមកថា៖ «កាលព្រះអង្គមានព្រះបន្ទូលមកកាន់យើង ព្រមទាំងបកស្រាយគម្ពីរឲ្យយើងស្ដាប់នៅតាមផ្លូវ តើយើងមិនមានចិត្តរំភើបទេឬ?» (លក ២៤,៣២)។ ពិតប្រាកដណាស់ ព្រះយេស៊ូជាព្រះបន្ទូលដ៏មានជីវិតតែមួយគត់ ដែលអាចបញ្ឆេះ បំភ្លឺ និងផ្លាស់ប្តូរចិត្តរបស់យើង។
តាមរបៀបនេះ យើងអាចយល់កាន់តែច្បាស់អំពីពាក្យរបស់សន្តយេរ៉ូមថា៖ “អ្នកដែលមិនស្គាល់ព្រះគម្ពីរ អ្នកនោះក៏មិនស្គាល់ព្រះគ្រីស្តដែរ” ( អត្ថាធិប្បាយព្រះគម្ពីរ អេសាយ ពាក្យលំនាំ )។ «បើគ្មានការបំភ្លឺរបស់ព្រះជាម្ចាស់ទេ យើងមិនអាចយល់ព្រះគម្ពីរបានស៊ីជម្រៅឡើយ។ ប៉ុន្តែ ផ្ទុយនឹងសេចក្តីនេះក៏ជាការពិតដែរ៖ បើគ្មានព្រះគម្ពីរទេ ព្រឹត្តិការណ៍នៃបេសកកម្មរបស់ព្រះយេស៊ូ និងព្រះសហគមន៍របស់ព្រះអង្គនៅក្នុងលោកនេះ នៅតែមិនអាចបកស្រាយបាន» ( Aperuit Illis, លេខ១ ) ។ ដូច្នេះហើយ ចំណេះដឹងអំពីព្រះគម្ពីរ មានសារសំខាន់ណាស់សម្រាប់ជីវិតគ្រីស្តបរិស័ទ ហើយលើសពីនេះទៅទៀត សម្រាប់ការប្រកាសអំពីព្រះគ្រីស្ត និងដំណឹងល្អរបស់ព្រះអង្គ។ បើមិនដូច្នេះទេ អ្វីដែលយើងកំពុងបញ្ជូនទៅអ្នកដទៃនោះ គ្រាន់តែជាគំនិត និងគម្រោងផ្ទាល់ខ្លួនប៉ុណ្ណោះទេ? ហើយដួងចិត្តត្រជាក់ មិនអាចធ្វើឲ្យដួងចិត្តអ្នកដទៃឆេះឆួលបានឡើយ!
ដូច្នេះ ចូរយើងទុកឲ្យព្រះអម្ចាស់ដែលមានព្រះជន្មរស់ឡើងវិញរួមដំណើរជាមួយយើងជានិច្ច ព្រះអង្គបកស្រាយព្រះគម្ពីរសម្រាប់យើង។ ចូរទុកឲ្យព្រះអង្គបញ្ឆេះចិត្តរបស់យើង បំភ្លឺយើង និងកែប្រែយើង ដើម្បីឲ្យយើងអាចប្រកាសអំពីគម្រោងការនៃការសង្រ្គោះរបស់ព្រះអង្គដល់ពិភពលោក ប្រកបដោយឫទ្ធានុភាព និងប្រាជ្ញាដែលមកពីព្រះវិញ្ញាណរបស់ព្រះអង្គ។
២- ភ្នែករបស់យើងបាន «ភ្លឺឡើង ហើយបានស្គាល់ព្រះអង្គ» នៅពេលព្រះអង្គកាច់នំបុ័ង។ ព្រះយេស៊ូក្នុងអគ្គសញ្ញាអរព្រះគុណ ជាប្រភព និងជាកំពូលនៃការប្រកាសដំណឹងល្អ។
ដួងចិត្តឆេះឆួលសម្រាប់ព្រះបន្ទូលរបស់ព្រះជាម្ចាស់ បានជំរុញសាវ័កតាមផ្លូវអេម៉ាអ៊ូស ឲ្យសុំអ្នករួមដំណើរដ៏អាថ៌កំបាំងស្នាក់នៅជាមួយពួកគេ នៅពេលថ្ងៃជិតលិច។ ពេលពួកគេនៅជុំវិញតុ ភ្នែករបស់គេបានភ្លឺឡើង ហើយបានស្គាល់ព្រះអង្គ នៅពេលព្រះអង្គកាច់នំបុ័ង។ កត្តាចម្បងដែលនាំឲ្យក្រុមសាវ័កបើកភ្នែក គឺជាលំដាប់នៃសកម្មភាពដែលព្រះយេស៊ូបានធ្វើ៖ ព្រះអង្គយកនំបុ័ងមកកាន់ អរព្រះគុណព្រះជាម្ចាស់ ហើយកាច់ប្រទានឲ្យពួកគេ។ ទាំងនេះគឺជាកាយវិការធម្មតារបស់មេគ្រួសារជនជាតិយូដា ប៉ុន្តែ ព្រះយេស៊ូគ្រីស្ត បានធ្វើឡើងដោយព្រះអំណោយទាននៃព្រះវិញ្ញាណដ៏វិសុទ្ធ កាយវិការនេះបានរំឭកភ្ញៀវទាំងពីរ អំពីសញ្ញាដែលព្រះអង្គបង្កើននំប៉័ង និងជាពិសេស អគ្គសញ្ញាអរព្រះគុណ សក្ការបូជានៅលើឈើឆ្កាង។ ក៏ប៉ុន្តែ នៅពេលដែលពួកគេកំពុងតែស្គាល់ព្រះយេស៊ូ ក្នុងពេលព្រះអង្គកាច់នំប៉័ង «ព្រះអង្គបាត់ពីមុខគេទៅ» (លក ២៤,៣១)។ សេចក្តីនេះនាំឲ្យយើងយល់ការពិតដ៏សំខាន់មួយនៃជំនឿរបស់យើង គឺ ព្រះគ្រីស្តដែលកាច់នំបុ័ង ពេលនេះក្លាយជា
នំប៉័ងដែលបានកាច់ ចែកឲ្យក្រុមសាវ័ក និងបរិភោគដោយក្រុមសាវ័ក។ យើងមើលព្រះអង្គមិនឃើញទៀតទេ ព្រោះឥឡូវនេះ ព្រះអង្គបានចូលក្នុងដួងចិត្តរបស់ក្រុមសាវ័ក ដើម្បីធ្វើឲ្យពួកគេឆេះឆួលកាន់តែខ្លាំង ហើយជំរុញឲ្យពួកគេចេញដំណើរដោយមិនបង្អង់យូរ ដើម្បីចែករំលែកជាមួយមនុស្សទាំងអស់នូវបទពិសោធន៍ដ៏ពិសេសដែលពួកគេបានជួបព្រះអម្ចាស់រស់ឡើងវិញ។ ដូច្នេះ ព្រះគ្រីស្តដែលមានព្រះជន្មរស់ឡើងវិញ គឺជាព្រះអង្គដែលកាច់នំបុ័ង ហើយក្នុងពេលជាមួយគ្នា ព្រះអង្គជានំប៉័ងដែលត្រូវកាច់សម្រាប់យើងទាំងអស់គ្នា។ ហេតុនេះ តាមរយៈសកម្មភាពនៃព្រះវិញ្ញាណដ៏វិសុទ្ធ អ្នកដែលប្រកាសដំណឹងល្អគ្រប់រូប ត្រូវបានត្រាស់ហៅឲ្យដូចព្រះយេស៊ូ និងនៅក្នុងព្រះអង្គ គឺ ជាអ្នកដែលកាច់នំបុ័ង និងជានំប៉័ងដែលត្រូវកាច់សម្រាប់ពិភពលោក។
នៅទីនេះ គួរតែចងចាំក្នុងចិត្តថា ការកាច់នំបុ័ងជាអាហាររបស់យើង ដើម្បីចែករំលែកដល់អ្នកស្រេកឃ្លានក្នុងព្រះនាមព្រះគ្រីស្ត គឺជាបេសកកម្មប្រកាសដំណឹងល្អរបស់គ្រីស្តបរិស័ទរួចទៅហើយ។ ជាងនេះទៅទៀត ការកាច់នំបុ័ងក្នុងអគ្គសញ្ញាអរព្រះគុណ ដែលជាព្រះគ្រីស្តផ្ទាល់ គឺជាការប្រកាសដំណឹងល្អមួយដ៏ល្អឥតខ្ចោះ ដោយសារអគ្គសញ្ញាអរព្រះគុណ គឺជាប្រភព និងជាកំពូលនៃជីវិត និងបេសកកម្មរបស់ព្រះសហគមន៍។
សម្តេចប៉ាប បេណេឌិកតូ ទី១៦ បានរំឭកថា៖ «យើងមិនអាចរក្សាទុកសេចក្តីស្រឡាញ់ ដែលយើងប្រារព្ធនៅក្នុងអគ្គសញ្ញាអរព្រះគុណសម្រាប់ខ្លួនយើងប៉ុណ្ណោះ។ តាមធម្មជាតិនៃសេចក្តីស្រឡាញ់នេះ ទាមទារឲ្យមានទំនាក់ទំនងជាមួយមនុស្សទាំងអស់។ អ្វីដែលពិភពលោកត្រូវការ គឺសេចក្ដីស្រឡាញ់របស់ព្រះជាម្ចាស់ គឺជាការជួបព្រះគ្រីស្ត និងជឿលើព្រះអង្គ។ ហេតុនេះហើយ បានជាអគ្គសញ្ញាអរព្រះគុណ មិនត្រឹមតែជាប្រភព និងកំពូលនៃជីវិតរបស់ព្រះសហគមន៍នោះទេ តែជាប្រភពនិងកំពូល នៃបេសកកម្មក្នុងការប្រកាសដំណឹងល្អ របស់ព្រះសហគមន៍៖ «ព្រះសហគមន៍ដ៏ពិតប្រាកដ គឺជាព្រះសហគមន៍ប្រកាសដំណឹងល្អ» (Sacramentum Caritatis លេខ៨៤) ។
ដើម្បីបង្កើតផលផ្លែ យើងត្រូវស្ថិតនៅជាប់នឹងព្រះយេស៊ូជានិច្ច (យហ ១៥,៤-៩)។ ហើយការរួបរួមនេះអាចសម្រេចបានតាមរយៈការអធិដ្ឋានប្រចាំថ្ងៃ ជាពិសេសក្នុងពិធីនមស្ការព្រះកាយព្រះគ្រីស្ត ដោយស្ងៀមស្ងាត់ នៅជាមួយវត្តមានរបស់ព្រះអម្ចាស់ ដែលគង់នៅជាមួយយើងក្នុងអគ្គសញ្ញាអរព្រះគុណ។ តាមរយៈការបណ្ដុះបណ្ដាលទំនាក់ទំនងដោយក្ដីស្រឡាញ់ជាមួយព្រះគ្រីស្តនេះ សាវ័កដែលប្រកាសដំណឹងល្អ អាចក្លាយជាមនុស្សខាងផ្លូវវិញ្ញាណដោយប្រព្រឹត្តកិច្ចការ។ សូមឲ្យដួងចិត្តរបស់យើងប្រាថ្នាចង់រួមជាមួយព្រះយេស៊ូជានិច្ច ដោយខ្សឹបនូវពាក្យទូលសុំដ៏ខ្លាំងក្លារបស់សាវ័កទាំងពីរតាមផ្លូវអេម៉ាអ៊ូស ជាពិសេសនៅពេលថ្ងៃជិតលិច៖ «ឱព្រះអម្ចាស់! សូមគង់នៅជាមួយយើងខ្ញុំ!» ( លក ២៤,២៩ )។
៣- ជើងចេញដំណើរទៅ រីករាយនឹងប្រាប់អំពីព្រះគ្រីស្តដែលមានព្រះជន្មរស់ឡើងវិញ។ ភាពជាយុវជននៃព្រះសហគមន៍មួយ តែងតែចាកចេញជានិច្ច។
បន្ទាប់ពីបានមើលឃើញ ហើយស្គាល់ព្រះយេស៊ូនៅពេល «កាច់នំប៉័ង» ពួកសាវ័ក «បានក្រោកឡើង ហើយប្រញាប់ប្រញាល់វិលត្រឡប់ទៅក្រុងយេរូសាឡឹមវិញភ្លាម» (លក ២៤,៣៣)។ ការប្រញាប់ប្រញាល់ចេញទៅដើម្បីចែកចាយជាមួយអ្នកដទៃ នូវអំណរសប្បាយនៃការជួបព្រះអម្ចាស់បង្ហាញថា «អំណរសប្បាយនៃដំណឹងល្អ បានបំពេញដួងចិត្ត និងជីវិតទាំងមូលរបស់អស់អ្នកដែលជួបព្រះយេស៊ូ។ អស់អ្នកដែលអនុញ្ញាតឲ្យព្រះអង្គសង្រ្គោះ ត្រូវបានរំដោះពីអំពើបាប ពីទុក្ខព្រួយ ពីភាពទទេខាងក្នុង ពីភាពឯកោ។ ជាមួយព្រះយេស៊ូ
គ្រីស្ត អំណរសប្បាយតែងតែកើតឡើង និងកើតសាជាថ្មីគ្រប់ពេល” ( Evangelii Gaudium លេខ១) ។ យើងមិនអាចជួបព្រះយេស៊ូដែលមានព្រះជន្មរស់ឡើងវិញ ដោយគ្មានការរលាកដោយសារចិត្តឆេះឆួលចង់ប្រាប់ឲ្យមនុស្សលោកស្គាល់ព្រះអង្គនោះទេ។ ហេតុដូច្នេះហើយ អស់អ្នកដែលបានស្គាល់ព្រះគ្រីស្តមានព្រះជន្មរស់ឡើងវិញ ក្នុងព្រះគម្ពីរ និងក្នុងអគ្គសញ្ញាអរព្រះគុណ ហើយដែលកាន់ភ្លើងរបស់ព្រះអង្គនៅក្នុងដួងចិត្ត និងពន្លឺរបស់ព្រះអង្គនៅក្នុងភ្នែក គឺជាប្រភពដំបូង និងចម្បងនៃការប្រកាសដំណឹងល្អ។ ពួកគេអាចធ្វើជាសាក្សីអំពីជីវិតអស់កល្បជានិច្ច សូម្បីតែក្នុងស្ថានភាពលំបាកបំផុត និងគ្រាងងឹតបំផុតក៏ដោយ។
រូបភាពនៃ «ការចេញដំណើរ» ជួយរំឭកយើងម្តងទៀត អំពីតម្លៃដ៏ស្ថិតស្ថេរនៃ បេសកកម្មសម្រាប់ប្រជាជាតិ(missio ad gentes) គឺជាបេសកកម្ម ដែលព្រះអម្ចាស់មានព្រះជន្មរស់ឡើងវិញ ប្រគល់ឲ្យព្រះសហគមន៍ ដើម្បីប្រកាសដំណឹងល្អដល់មនុស្សគ្រប់គ្នា និងគ្រប់ជាតិសាសន៍រហូតដល់ទីដាច់ស្រយាលនៃផែនដី។ សព្វថ្ងៃនេះ មនុស្សជាតិដែលរងរបួសដោយសារភាពអយុត្តិធម៌ជាច្រើន ការបែកបាក់ និងសង្គ្រាម កំពុងត្រូវការដំណឹងល្អនៃសន្តិភាព និងការសង្គ្រោះក្នុងអង្គព្រះគ្រីស្ត។ ខ្ញុំឆ្លៀតយកឱកាសនេះ ដើម្បីបញ្ជាក់ឡើងវិញថា «មនុស្សគ្រប់រូបមានសិទ្ធិទទួលដំណឹងល្អ។ គ្រីស្តបរិស័ទមានកាតព្វកិច្ចប្រកាសដំណឹងល្អ ដោយមិនបដិសេធន៍អ្នកណាម្នាក់ឡើយ គេមិនមែនជាអ្នកដែលដែលដាក់បន្ទុកថ្មីទៅលើអ្នកដទៃ ប៉ុន្តែ ជាម្នាក់ដែលចែករំលែកអំណរសប្បាយ បង្ហាញអំពីជើងមេឃដ៏ស្រស់ស្អាត ផ្តល់នូវពិធីជប់លៀងដែលគួរឲ្យចង់បាន” ( Evangelii Gaudium លេខ១៤) ។ ការកែប្រែអ្នកប្រកាសដំណឹងល្អ នៅតែជាគោលដៅចម្បងដែលយើងត្រូវកំណត់សម្រាប់ខ្លួនយើង ក្នុងនាមជាបុគ្គល និងជាសហគមន៍ ពីព្រោះ «ការប្រកាសដំណឹងល្អ គឺជាគំរូនៃសកម្មភាពទាំងអស់របស់ព្រះសហគមន៍» (ibid., ១៥) ។
ដូចគ្រីស្តទូតប៉ូលបានបញ្ជាក់៖ សេចក្ដីស្រឡាញ់របស់ព្រះគ្រីស្ត ទាក់ទាញ និងជំរុញយើង (២ករ ៥,១៤)។ សេចក្ដីស្រឡាញ់នេះមានពីរផ្នែក៖ សេចក្ដីស្រឡាញ់របស់ព្រះគ្រីស្តសម្រាប់យើង ដែលត្រាស់ហៅ បំភ្លឺ និងជំរុញសេចក្ដីស្រឡាញ់របស់យើងចំពោះព្រះអង្គ។ ហើយជាសេចក្តីស្រឡាញ់ដែលធ្វើឲ្យព្រះសហ
គមន៍នៅក្មេងជានិច្ច ហើយចេញដំណើរ ជាមួយសមាជិកទាំងអស់នៃព្រះសហគមន៍ ក្នុងបេសកកម្ម ដើម្បីប្រកាសដំណឹងល្អអំពីព្រះគ្រីស្ត ដោយមានជំនឿថា «ព្រះអង្គបានសោយទិវង្គតសម្រាប់មនុស្សទាំងអស់ ដើម្បីឲ្យអស់អ្នកដែលមានជីវិត លែងរស់នៅសម្រាប់ខ្លួនឯងទៀតហើយ គឺរស់សម្រាប់ព្រះអង្គដែលសោយទិវង្គត និងមានព្រះជន្មរស់ឡើងវិញ» (២ករ ៥,១៥)។ យើងម្នាក់ៗអាចរួមចំណែកក្នុងចលនាប្រកាសដំណឹងល្អនេះ តាមរយៈការអធិដ្ឋាន និងកិច្ចការផ្សេងៗ តាមរយៈការថ្វាយប្រាក់ និងការរងទុក្ខលំបាក តាមរយៈសក្ខីភាពរបស់ខ្លួន។ ក្រសួងប្រកាសដំណឹងល្អ គឺជាមធ្យោបាយចម្បងនៃការលើកកម្ពស់កិច្ចសហប្រតិបត្តិការអ្នកប្រកាសដំណឹងល្អនេះ ទាំងផ្នែកខាងវិញ្ញាណ និងសម្ភារៈ។ ដោយហេតុផលនេះ ប្រាក់តង្វាយនៅថ្ងៃអាទិត្យ នៃទិវាបេសកកម្មប្រកាសដំណឹងល្អសកល ត្រូវបានបរិច្ចាគទៅឲ្យក្រសួងនៃការប្រកាសដំណឹងល្អ សម្រាប់ការប្រកាសដំណឹងល្អនៃជំនឿ។
ភាពបន្ទាន់នៃសកម្មភាពប្រកាសដំណឹងល្អរបស់ព្រះសហគមន៍ អំពាវនាវឲ្យមានកិច្ចសហប្រតិបត្តិការប្រកាសដំណឹងល្អឲ្យបានកាន់តែជិតស្និត រវាងសមាជិកទាំងអស់នៃព្រះសហគមន៍ និងគ្រប់កម្រិត។ នេះគឺជាគោលដៅសំខាន់ នៃដំណើររបស់មហារសន្និបាត ដែលព្រះសហគមន៍សកលកំពុងតែបំពេញជាមួយនឹងពាក្យគន្លឹះ «ការរួមគ្នាជាធ្លុងតែមួយ ការចូលរួម ការប្រកាសដំណឹងល្អ»។ ដំណើរការនេះមិនមែននាំព្រះសហគមន៍ឲ្យគិតតែពីខ្លួនឯងនោះទេ ហើយវាក៏មិនមែនជាការស្ទង់មតិរបស់ប្រជាពលរដ្ឋដើម្បីសម្រចដូចនៅក្នុងសភា នូវអ្វីដែលត្រូវជឿ និងអនុវត្ត ឬក៏មិនជឿទៅតាមចំណង់ចំណូលចិត្តរបស់មនុស្សនោះដែរ។ ផ្ទុយទៅវិញ វាជាដំណើរការនៃការចេញដំណើរទៅមុខដូចក្រុមសាវ័កតាមផ្លូវអេម៉ាអ៊ូស ដោយស្តាប់ព្រះអម្ចាស់ដែលមានព្រះជន្មរស់ឡើងវិញ ដែលយាងមកក្នុងចំណោមយើងរាល់គ្នា ដើម្បីបកស្រាយព្រះគម្ពីរ និងកាច់នំប៉័ងសម្រាប់យើង ដើម្បីឲ្យយើងបំពេញបេសកកម្មរបស់ព្រះអង្គនៅក្នុងពិភពលោក ដោយអំណាចនៃព្រះវិញ្ញាណដ៏វិសុទ្ធ។
ដូចសាវ័កទាំងពីរនាក់តាមផ្លូវអេម៉ាអ៊ូស បានរៀបរាប់ដល់អ្នកដទៃនូវហេតុការណ៍ដែលបានកើតឡើងនៅតាមផ្លូវ (លក ២៤,៣៥) ការប្រកាសរបស់យើង នឹងក្លាយជាដំណើររឿងដ៏រីករាយអំពីព្រះគ្រីស្តជាព្រះអម្ចាស់ អំពីជីវិតរបស់ព្រះអង្គ ការរងទុក្ខលំបាក សោយទិវង្គត់ និងមានព្រះជន្មរស់ឡើងវិញ ព្រមទាំងការ
អស្ចារ្យដែលសេចក្តីស្រឡាញ់របស់ព្រះអង្គបានសម្រេចក្នុងជីវិតរបស់យើង។
ដូច្នេះ សូមឲ្យយើងចេញដំណើរម្តងទៀត ដោយមានការបំភ្លឺមកពីការជួបជាមួយព្រះអម្ចាស់ដែលមានព្រះជន្មរស់ឡើងវិញ និងណែនាំដោយព្រះវិញ្ញាណរបស់ព្រះអង្គ។ ចូរយើងចេញដំណើរទៅដោយដួងចិត្តឆេះឆួល ដោយបើកភ្នែក ហើយជើងឈានទៅមុខ ដើម្បីធ្វើឲ្យដួងចិត្តអ្នកដទៃឆេះឆួលដោយព្រះបន្ទូលរបស់ព្រះ
ជាម្ចាស់ បើកភ្នែកអ្នកដ៏ទៃឲ្យឃើញព្រះយេស៊ូនៅក្នុងអគ្គសញ្ញាអរព្រះគុណ ហើយអញ្ជើញមនុស្សគ្រប់គ្នាឲ្យដើរជាមួយគ្នា នៅលើផ្លូវនៃសន្តិភាព និងការសង្រ្គោះ ដែលព្រះជាម្ចាស់បានប្រទានដល់មនុស្សទាំងអស់ក្នុងអង្គព្រះគ្រីស្ត។
បពិត្រព្រះនាងម៉ារី ជាអ្នកនាំផ្លូវ
ជាមាតារបស់សាវ័កដែលប្រកាសដំណឹងល្អអំពីព្រះគ្រីស្ត
និងជាម្ចាស់ក្សត្រីនៃបេសកកម្មប្រកាសដំណឹងល្អ
សូមជួយអង្វរព្រះអម្ចាស់ឲ្យយើងខ្ញុំផង !
ធ្វើនៅទីក្រុងរ៉ូម ព្រះវិសាលវិហារ សន្តយ៉ូហាន ឡាត្រង់
ក្នុងឱកាសបុណ្យ ព្រះយេស៊ូសម្តែងព្រះអង្គ
ថ្ងៃទី០៦ ខែមករា ឆ្នាំ២០២៣
សម្តេចប៉ាប ហ្វ្រង់ស៊ីស្កូ
Daily Program
