អូហ្គូស្ត៍ កើតនៅថ្ងៃទី២៣ ខែកញ្ញា ឆ្នាំ៦៣ មុនគ្រិស្តសករាជ នៅទីក្រុងរ៉ូម។ អូហ្គូស្ត៍គឺជាប្រមុខទី១ នៃចក្រភពរ៉ូម៉ាំង ពីថ្ងៃទី១៦ ខែមករា ឆ្នាំ២៧ មុនគ្រិស្តសករាជ រហូតដល់ថ្ងៃទទូលមរណភាពថ្ងៃទី១៩ ខែសីហា ឆ្នាំ១៤ នៃគ្រិស្តសករាជ នៅជិតទីក្រុងណាប្ល៍ ប្រទេសអ៊ីតាលីសព្វថ្ងៃ។
មានប្រភពពីគ្រួសារអ្នកមាននៃលំដាប់ឋានៈមន្រ្តីជាន់ខ្ពស់ទ័ពសេះ អូហ្គូស្ត៍ទទួលបានការអប់រំនៅទីក្រុងរ៉ូម យោងតាមទំនៀមទម្លាប់នៃគហបតីសាធារណរដ្ឋរ៉ូម៉ាំង និងបញ្ចប់ការរៀនសូត្រខាងអក្សរសាស្រ្ត និងទស្សនវិជ្ជា។
ក្រោមមកក្នុងការប្រជែងអំណាច អូហ្គូស្ត៍ ធ្វើការនិរទេស ឡេពីដមន្រ្តីជាន់ខ្ពស់រ៉ូម៉ាំង ទៅជិតភ្នំសៀសេ និងបន្ទាប់មកដឹកនាំធ្វើសង្រ្គាមស៊ីវិលចុងក្រោយនៃសាធារណរដ្ឋរ៉ូម៉ាំង ប្រឆាំងនឹងមន្រ្តីយោធា ម៉ាក អន់ទ័ន និងទទួលជោគជ័យនៅសមរភូមិអាកទ្យូម។ ការធ្វើអត្តឃាតរបស់ម៉ាក អន់ទ័នបានធ្វើឲ្យអូហ្គូស្ត៍ក្លាយជាម្ចាស់ទីក្រុងរ៉ូមតែឯង។
បន្ទាប់ពីការរំលាយសម្ព័ន្ធមិត្តទីក្រុងរ៉ូមបុរាណ អូហ្គូស្ត៍ស្តារឡើងវិញនូវស្ថាបនសាធារណរដ្ឋ។ ទោះបីជាទ្រឹស្តី គាត់ស្ថាបនាអំណាច និងតួនាទីព្រឹទ្ធសភា ចៅក្រមកំពូល និងតំណាងរាស្រ្ត ប៉ុន្តែអូហ្គូស្ត៍ គឺតាមពិតជាក់ស្តែង រក្សានូវអំណាចផ្តាច់ការ និងបន្តដឹកនាំដោយមិនមានប្រឹក្សា ឬយកតាមការសម្រេចចិត្តរបស់ព្រឹទ្ធសភាទេ។ រវាងឆ្នាំ៣១ និង ២៣ មុនគ្រិស្តសករាជ រហូតដល់ឆ្នាំ២៧ មុនគ្រិស្តសករាជ បន្តិចម្តងៗ អូហ្គូស្ត៍ ដណ្តើមបានអំណាច និងធ្វើឲ្យស្របច្បាប់ពីព្រឹទ្ធសភា ដែលអាចឲ្យគាត់ដឹកនាំមួយជីវិត និងអំណាចតុលការដែលមិនមាននរណាអាចជំទាស់។ ប៉ុន្តែអូហ្គូស្ត៍បដិសេធយកឋានៈជាក្សត្រ និងដាក់ឋានៈខ្លួនយ៉ាងងាយថា ប្រាំងស៊ីប ស៊ីវីតាទីស ឬ ពលរដ្ឋទី១ នៃបុរី ដែលមានន័យថាជាប្រមុខ។ ដូច្នេះ នៅឆ្នាំ២៧ មុនគ្រិស្តសករាជ ត្រូវបានកត់សម្គាល់នូវព្រឹត្តិការណ៍នៃរបបនយោបាយថ្មីនៅទីក្រុងរ៉ូម ចក្រភពរ៉ូម ឬបុរីរ៉ូម ដែលអូហ្គូស្ត៍ គឺតាមការពិតជាក់ស្តែង គឺជាប្រមុខកំពូល ដែលប្រមូលផ្តុំឲ្យខ្លួនឯងនូវអំណាចបញ្ជាលើទីក្រុង និងលើយោធា។ អូហ្គូស្ត៍មានអំណាចនៃការតាក់តែងច្បាប់ ប្រឆាំងរាល់ការវ៉េតូជំទាស់ ដោយទទួលគុណប្រយោជន៍តាមផ្លូវច្បាប់ពីភាពមិនអាចរំលោភលើរាងកាយ និងជាទីសក្ការៈ។
ជាមួយនិងយុគសម័យរបស់អូហ្គូស្ត៍ នេះគឺជាការចាប់ផ្តើមនៃរយៈពេលស្ថិរភាព ដែលតាមប្រពៃណីត្រូវបានគេស្គាល់ក្រោមនាមថា ប៉ាក្ស រ៉ូម៉ាណា ឬសន្តិភាពរ៉ូម៉ាំង។ ដូច្នេះចក្រភពរ៉ូម៉ាំងលែងត្រូវបានទទួលការគំរាមកំហែងដោយសង្រ្គាមឈ្លានពានធំៗ ទៀតហើយ។ ទឹកដីរបស់ចក្រភពកើនឡើងជាសំខាន់ជាមួយការភ្ជាប់ជាឧបសម្ព័ន្ធនៃទឹកដីអេហ្ស៊ីប ដាម៉ាស៊ី អាឡឺម៉ង់ និងនៅហ៊ីស្ព៉ានី។
អូហ្គូស្ត៍ធ្វើកំណែទម្រង់ប្រព័ន្ធប្រមូលពន្ធ អភិវឌ្ឍគមនាគមន៍ទំនាក់ទំនងដោយចងភ្ជាប់បណ្តាញផ្លូវការជាមួយប៉ុស្តត្រួតពិនិត្យ។ ព្រះមុខរដ្ឋ អូហ្គូស្ត៍ ស្ថាបនាទាហានអចិន្ត្រៃយ៍ដែលដាក់នៅតាមខេត្ត និងដាក់យាមកាមតាមព្រំដែនរហូត។ ដោយអនុវត្តនូវកំណែទម្រង់ដ៏ទំលំទូលាយខាងរដ្ឋបាល អូហ្គូស្ត៍បានគូសចែករដ្ឋធានីជាសង្កាត់ៗ តាមដានមើលបរិស្ថានអនាម័យនៃសំណង់ ធ្វើការទប់ស្កាត់នឹងគ្រោះទឹកជំនន់ និងអគ្គីភ័យ។ អូហ្គូស្ត៍បានផ្លាស់ប្តូររូបភាពមុខមាត់រដ្ឋធានីយ៉ាងទូលំទូលាយ។ មួយផ្នែកដ៏ធំនៃបូជនីយដ្ឋាននានានៃរដ្ឋធានីត្រូវបានស្ថាបនា ធ្វើសំអិតសំអាង និងតាក់តែងលម្អសាជាថ្មីនៅយុគសម័យគ្រប់គ្រងអំណាចរបស់គាត់។
អូហ្គូស្ត៍ទទួលមរណភាពនៅឆ្នាំ១៤ នៃគ្រិស្តសករាជ នៅអាយុ ៧៦ឆ្នាំ ប្រហែលជាដោយសារមូលហេតុធម្មជាតិ ប៉ុន្តែមានពាក្យចចាមអារ៉ាមនថា វាមានលទ្ធភាពជាការដាក់ថ្នាំបំពុលដោយការជំរុញពីភរិយារបស់គាត់ឈ្មោះ លីវី។
Daily Program
