លោកស្រីអូប្រ៉ា វីនហ្វ្រ៉េ បុគ្គលដែលមានឥទ្ធិពលបំផុតនៅក្នុងប្រព័ន្ធ​ផ្សព្វផ្សាយ​និងកំសាន្តរបស់សហរដ្ឋអាម៉េរិក

លោកស្រីអូប៉្រា វីនហ្វ្រ៉េ កើតនៅថ្ងៃទី២៩ ខែមករា ឆ្នាំ១៩៥៤ នៅទីក្រុង កូស្យ៊ូស្កូ រដ្ឋ មីស៊ីស៊ីពី សហរដ្ឋអាម៉េរិក។ លោកស្រីគឺជាអ្នកដឹកនាំកម្មវិធី ផលិតករទូរទស្សន៍ និងភាពយន្ត តារា​សម្តែង អ្នករិះគន់អក្សរសាស្រ្ត និងអ្នកកែសម្រួលនៃទស្សនាវដ្តីអាម៉េរិក។

លោកស្រីល្បីល្បាញជាពិសេសតាមរយៈ កម្មវិធីសន្ទនា ឬ The Oprah Winfrey Show ដែល​ផលិត​ឡើងដោយ​ក្រុមហ៊ុនរបស់លោកស្រីផ្ទាល់ គឺ ផលិតកម្ម Harpo ដែលមានមូលដ្ឋាន​នៅ​រដ្ឋឈីកាហ្គោ។ កម្មវិធី​ផ្សាយរបស់លោកស្រី បានឈ្នះរង្វាន់ជាច្រើន និងក្លាយជាកម្មវិធី ដែល​មាន​ការទស្សនា​ច្រើន​បំផុត​នៅក្នុងប្រវត្តិសាស្រ្តនៃទូរទស្សន៍​រហូតដល់​ភាគចុងក្រោយ​នៅ​ថ្ងៃ​ទី​២៥ ខែឧសភា ឆ្នាំ២០១១។  លោកស្រីអូប៉្រា ក៏ជាតារាសម្តែង ដែលបានទទួល​ពាន​រង្វាន់​អូស្ការផងដែរ។ លោកស្រីត្រូវបានចាត់ថ្នាក់ជាបុគ្គលជនជាតិអាម៉េរិកដើមកំណើតអាហ្វ្រិក​ដែល​មានបំផុត​នៅសតវត្សទី២០ និងជាជនជាតិអាម៉េរិកអាហ្វ្រិក​ដែលស្រឡាញ់​មនុស្សជាតិ​បំផុតគ្រប់ពេល​វេលា។

នៅអំឡុងពាក់កណ្តាលទសវត្សឆ្នាំ១៩៩០ លោកស្រីបាន​បង្កើតកម្មវិធីកិច្ចសន្ទនា​របស់​លោកស្រី​សាជាថ្មីដើម្បីផ្តោចអារម្មណ៍ទៅលើអក្សរសាស្រ្ត ការអភិវឌ្ឍបុគ្គលិកលក្ខណៈ ដួង​ព្រលឹង និងការធ្វើសមាធិ។

នៅបារាំង លោកស្រីត្រូវបានគេស្គាល់ជាពិសេស តាមការសម្ភាសន៍អំពីព្រឹត្តិការណ៍​ដែល​លោក​ស្រីធ្វើជាមួយលោកម៉ៃឃើ ជែកស៊ុន នៅខែមករា ឆ្នាំ១៩៩៣ នៅផ្ទះរបស់លោក​ជែកស៊ុន​នៅ​រដ្ឋ​កាលីហ្វ័រនី សហរដ្ឋអាម៉េរិក។

នៅឆ្នាំ២០០៦ លោកស្រីបានក្លាយជាអ្នកគាំទ្រ​តាំងពីម៉ោងដំបូង​របស់លោកបារ៉ាក អូបាម៉ា។ ការ​វិភាគមួយ បានវាយតម្លៃថា លោកស្រីបានធ្វើឲ្យ​លោកអូបាម៉ា បានទទួលសម្លេងបន្ថែម​ច្រើនជាង ១លាន សម្លេង​នៅក្នុងការបោះឆ្នោតបេក្ខភា​គណបក្ស​ប្រជាធិបតេយ្យ​​នៅ​ឆ្នាំ​២០០៨។ នេះគឺជាជ័យជម្នះ​ដែលធ្វើឲ្យលោកអូបាម៉ា ក្លាយជាអភិបាល​រដ្ឋ​​អ៊ីលីណ័រ ដែលផ្តល់​ឲ្យ​លោកនូវ​អាសនៈមួយនៅព្រឹទ្ធសភាសហរដ្ឋអាម៉េរិក។

នៅខែកក្កដា ឆ្នាំ២០០៧ ទស្សនាវដ្តី TV Guide នៅសហរដ្ឋអាម៉េរិក បានលើកឡើងថា លោក​ស្រី​អូប៉្រា គឺជាអ្នកដឹកនាំកម្មវិធី​ដែលរកកម្រៃបានច្រើនបំផុតនៅ​សហរដ្ឋអាម៉េរិក។ លោកស្រី​រក​ចំណូលបានប្រមាណ ២៦០លានដុល្លារ នៅឆ្នាំនោះ។ ចំនួននេះគឺមាន ៥ដង ច្រើនជាង បុគ្គល​ដែលមានលំដាប់ទី២ នៅក្នុងវិស័យនេះ គឺផលិតករ Simon Cowell ដែលរកបាន ៤៥​លានដុល្លារ។ នៅឆ្នាំ២០០៨ ចំណូលរបស់លោកស្រី បានកើតឡើងរហូតដល់ ២៧៥លាន ដុល្លារ។ លោកស្រីរកបាន ៣១៥លាន ដុល្លារ នៅចន្លោះឆ្នាំ២០០៩-២០១០។

លោកស្រីអូប៉្រា វីនហ្វ្រ៉េ ត្រូវបានវាយតម្លៃថា គឺជាស្រ្តីដែលមានអំណាចបំផុតនៅលើលោក ដោយ CNN និង គេហទំព័រ Time.com ជាស្រ្តីដែលមានឥទ្ធិពលបំផុត​នៅក្នុងពិភពលោក។ បើ​យោង​តាមទស្សនិកជន លោកស្រីគឺជាបុគ្គលម្នាក់​ដែលមានឥទ្ធពលបំផុត​នៅសតវត្សទី២០ និងជា​បុគ្គល​ដែលមានឥទ្ធិពលបំផុតពីឆ្នាំ២០០៤ ដល់ ២០០៨ ដោយទស្សនាវដ្តី Time។ នៅដំណាច​សតវត្ស​ទី២០ ទស្សនាវដ្តី Life បានចាត់ថ្នាក់ លោកស្រីអូប៉្រា វីនហ្វ្រ៉េ ជាស្រ្តីដែល​មាន​ឥទ្ធិពល​បំផុត និងជាស្រ្តីស្បែកខ្មៅដែលមានឥទ្ធិពលបំផុតនៅជំនាន់នោះ។ សារព័ត៌មាន Ladies Home Journal ក៏​បានចាត់ថ្នាក់លោកស្រីអូប៉្រា វីនហ្វ្រ៉េ លេខមួយ​នៅក្នុងបញ្ជី​របស់​ខ្លួន​​នៃស្រ្តី​ដែល​មាន​អំណាច​បំផុតនៅអាម៉េរិក។ នៅឆ្នាំ១៩៩៨ លោកស្រីអូប៉្រា វីនហ្វ្រ៉េ បានក្លាយ​ជា​ស្រ្តី​ទី​១ និង​ជា​ស្រ្តី​ស្បែកខ្មៅឈានមុខ​ដែលត្រូវ​បាន​ចាត់​ថ្នាក់​ស្ថិតនៅក្នុង​ចំណោម​បុគ្គល ១០១​នាក់ ដែល​មាន​ឥទ្ធិពលបំផុត នៅក្នុង​ឧស្សាហកម្មកំសា​ន្ត ដោយ​ទស្សនាវដ្តី Entertainment Weekly ។

នៅឆ្នាំ២០១២ ទស្សនាវដ្តី Forbes បានចាត់ថ្នាក់លោកស្រីអូប៉្រា វីនហ្វ្រ៉េ ស្ថិតនៅក្នុងបុគ្គល ១១នាក់ នៅលើ​បញ្ជីស្រ្តីដែលមានអំណាចបំផុតនៅក្នុងពិភពលោក។