បើទោះបីប្រជាជនកម្ពុជាភាគច្រើនកាន់ព្រះពុទ្ធសាសនាភាគច្រើនក្តី ប៉ុន្តែមានយុវជនជាច្រើន បានចូលរួមប្រារព្ធពិធីបុណ្យណូអែល ឬគ្រីស្មាស់ ឬបុណ្យព្រះយេស៊ូប្រសូត យ៉ាងអាធិកអធម។ យុវជនខ្លះ យកឱកាសនេះ ជូនកាដូដល់មនុស្សជាទីស្រឡាញ់ ដើរកម្សាន្ត រៀបចំកម្មវិធីជប់លៀង និងមានយុវជនខ្លះមិន ខ្វល់នឹងពិធីបុណ្យនេះឡើយ។
ទោះបីជាឆ្នាំ២០២០នេះ កម្ពុជាក៏ដូចជាពិភពលោកកំពុងទទួលរងការរាតត្បាតជាសកលនៃជំងឺឆ្លងកូវីដ១៩យ៉ាងណាក្តី និងតម្រូវឱ្យផ្អាកការជួបជុំទ្រង់ទ្រាយធំនោះ ខណៈពិធីបុណ្យគ្រីស្មាស់ ឬណូអែល ឬបុណ្យព្រះយេស៊ូប្រសូត កាន់តែមានប្រជាប្រិយភាពខ្លាំងនៅលើសាកលលោក យុវជនខ្មែរ ឯណេះវិញ មិនបានព្រងើយកន្តើយឡើយ។ ពួកគេ ចូលរួមពិធីបុណ្យ មួយនេះ បើទោះបីយុវជនមួយចំនួន បានយល់ច្បាស់ពីសាវតានៃបុណ្យនេះក្តី និងខ្លះទៀតចូលរួមដោយមិនយល់ដឹងក៏ដោយ។
យុវជន ហឿន ហាក់ បានត្រៀមកាដូជូនមិត្តភក្តិ សង្សារ និងសាច់ញាតិផងដែរ នៅថ្ងៃបុណ្យគ្រីស្មាស់នេះ។ ក្រៅពីជូនកាដូ កម្លោះសង្ហាររូបនេះ គ្រោងនាំសមាជិកគ្រួសារទៅកម្សាន្តនៅរមណីដ្ឋាននានាក្នុងប្រទេសទៀតផង។ ៖«ខ្ញុំនឹងទិញស្ករគ្រាប់ ជូនមិត្តរួមថ្នាក់ កាមេរ៉ាជូនសង្សារ និងខោអាវអាណូអែល ជូនបងប្អូន និងឪពុកម្តាយនៅស្រុក»។ នេះជាការបញ្ជាក់របស់ យុវជន ហឿន ហាក់។
ក្រៅពីការជូនកាដូ និស្សិតឆ្នាំទី៤ ដែលមានវ័យ២៣ឆ្នាំ រូបនេះ ក៏មានគម្រោងនាំមិត្តភក្តិទៅញ៉ាំអាហារជុំគ្នាផងដែរ។ លោកក៏មិនបានចាប់អារម្មណ៍ពីប្រវត្តិនៃបុណ្យគ្រីស្មាស់ឡើយ តែបុរសដើមកំណើតនៅខេត្តកំពង់ធំរូបនេះ បែរជាគាំទ្រឲ្យមានការបង្កើតពិធីបុណ្យគ្រីស្មាស់នៅកម្ពុជា រៀងរាល់ឆ្នាំទៀតផង។ លោកបញ្ជាក់យ៉ាងដូច្នេះថា ៖«បុណ្យនេះ យើងបានសម្រាក ដែលមានព្រិលធ្លាក់ មានកាដូជូនគ្នាទៅវិញទៅមក បង្កើតអនុស្សាវរីយ៍ល្អៗ ថតរូបជុំគ្នាជាមិត្តភក្តិ និយាយទៅវាជាបុណ្យមួយដ៏ល្អសម្រាប់ខ្ញុំ»។
ការចូលរួមពិធីបុណ្យនេះ ក៏ជាគំនិតរបស់កញ្ញា ដួង សុធីតា ផងដែរ។ ទោះបីជារវល់នឹងការងារជាអ្នកសំអាងការក៏ដោយ យុវតីវ័យ១៨ឆ្នាំ និងជាសិស្សវិទ្យាល័យរូបនេះ នៅតែឆ្លៀតទិញកាដូខ្លះ ជូនមិត្តរួមថ្នាក់និងមិត្តភក្តិជិតស្និទ្ធផងដែរ។
ពិធីបុណ្យណូអែល ឬគ្រីស្មាស់ ឬបុណ្យព្រះយេស៊ូប្រសូត គឺមិនមែនប្រារព្ធតែនៅទីក្រុងនោះទេ តែនៅជនបទវិញ ក៏មិនចាញ់ទីក្រុងប៉ុន្មានឡើយ។ កញ្ញា សឿម នីតា ដែលមានវ័យ២០ និងជាគ្រូបង្រៀនម្នាក់នៅខេត្តកំពង់ឆ្នាំង ក៏មានគម្រោងបបួលមិត្តភក្តិធ្វើអាហារញ៉ាំគ្នាផងដែរ។ កញ្ញាបញ្ជាក់យ៉ាងដូច្នេះថា ៖«ខ្ញុំបានណាត់ជាមួយមិត្តភក្តិដទៃទៀត ថាពួកយើងនឹងទៅជួបជុំគ្នា ដើម្បីធ្វើអីញ៉ាំ បន្ទាប់ពីបើកលុយ »។ ក្រៅពីសប្បាយរីករាយជាមួយមិត្តភក្តិ បុណ្ណារី មិនភ្លេចឪពុកម្តាយ ដែលជាអ្នកមានគុណរបស់ខ្លួនឡើយ។ នាងបានត្រៀមសំលៀកបំពាក់រួចជាស្រេច ដើម្បីជូនពួកគាត់ទៀតផង។
មិនខុសគ្នាពីកញ្ញាខាងលើឡើយ អ្នកគ្រូរូបនេះ បានឲ្យតម្លៃខ្លាំងលើពិធីបុណ្យណូអែល ឬគ្រីស្តស្មាក់ ឬបុណ្យព្រះយេស៊ូប្រសូត បើទោះបីជានាងមិនបានយល់ច្បាស់ពីប្រវត្តិបុណ្យគ្រីស្មាស់ក៏ដោយ។ ៖«ខ្ញុំមិនសូវដឹងច្បាស់ទេ តែខ្ញុំគិតថា បុណ្យនេះ គឺល្អ ព្រោះធ្វើយើងអាចបង្កើតទំនងស្អិតល្មួត និងបង្កភាពរីករាយ»។
ផ្ទុយស្រឡះពីអ្នកខាងលើ លោក សៅ វាសនា ឯណេះវិញ មិនគិតដូច្នេះឡើយ។ លោកមិនដែលចូលរួម ឬ រំភើបនឹងពិធីបុណ្យបរទេសមួយនេះឡើយ។ ៖«បុណ្យបរទេស ខ្ញុំគ្មានអារម្មណ៍ចូលរួមទេ។ ខ្ញុំគិតថា ការទិញកាដូនៅក្នុងពិធីបុណ្យបរទេសនីមួយៗ នាំឲ្យខាតលុយច្រើន»។ នេះជាការបញ្ជាក់របស់យុវជនវ័យ២៥ឆ្នាំ មកពីខេត្តសៀមរាប ដោយបន្តពន្យល់ថា ការជូនកាដូមិនមែនជាទង្វើដែលលោក និងមិត្តភក្តិរបស់ខ្លួនចង់ធ្វើឡើយ ពីព្រោះមិត្តភក្តិរបស់លោក មានគំនិតដូចលោក ដែលអាចចងមិត្តភាពដោយមិនចាំបាច់យកអំណោយនោះឡើយ។
ក្នុងឆ្នាំ២០២០នេះ ពិធីបុណ្យនេះ ក៏ដូចជាពិធីបុណ្យផ្សេងៗទៀតត្រូវបានផ្អាកការរៀបចំទ្រង់ទ្រាយធំ តែនៅតាមផ្លូវសួនច្បារក្នុងរាជធានីភ្នំពេញក៏មានការរៀបចំតុបតែង លម្អដើម្បីអបអរសាទរ ពិធីបុណ្យនេះដែរ។ នៅសល់ប្រមាណជាងមួយសប្ដាហ៍ទៀត ឆ្នាំ២០២០នឹងឆ្លងផុតចូលដល់ឆ្នាំ២០២១ ដែលជាទៀងទាត់ នៅលើពិភពលោក ក៏ដូចជានៅកម្ពុជាតែងធ្វើនូវកម្មវិធីផ្សេងៗ ដើម្បីសប្បាយភាព និងការលក់ផលិតផលបញ្ចុះតម្លៃជាដើម ហើយពិធីទាំងនោះតែងតែមានមនុស្សប្រមូលផ្ដុំច្រើន។
ខណៈដែលកម្ពុជាកំពុងប្រយុទ្ធប្រឆាំងជាមួយជំងឺកូវីដ១៩ ក៏ដូចជាបាននឹងកំពុងទប់ស្កាត់ការរីករាលដាលជំងឺកូវីដ១៩ មិនឱ្យចូលដល់សហគមន៍បន្តទៀតនោះ នៅក្នុងក្របខណ្ឌភូមិសាស្ត្ររាជធានី ភ្នំពេញ ដែលមានប្រជាជនរស់នៅច្រើន និងមានក្រុមហ៊ុន ហាងលក់ផលិតផលនានាច្រើនតែងតែប្រារព្ធកម្មវិធីសប្បាយភាព និងមានការលក់បញ្ចុះតម្លៃផងនោះ ត្រូវបានអាជ្ញាធរគិតគូរ និងដាក់ចេញនូវវិធានការបន្ទាន់មួយ ដោយមិនអនុញ្ញាតឱ្យមានការប្រមូលផ្ដុំមនុស្សច្រើនធ្វើកម្មវិធីឆ្លងឆ្នាំសកល ការប្រគុំតន្ដ្រី ឬធ្វើស្តង់ផ្សព្វផ្សាយលក់ផលិតផលអ្វីឡើយ។
នៅក្នុងសេចក្តីណែនាំរបស់ក្រសួងសុខាភិបាល ដើម្បីការពារចម្លងកូវីដ១៩នៅក្នុងអំឡុងថ្ងៃChristmas និងថ្ងៃឆ្លងឆ្នាំសកល ចំនួន៤ចំណុចដែលរដ្ឋបាលរាជធានីភ្នំពេញប្រកាសអោយអនុវត្តនោះគឺ៖ ១.សូមបន្តការរស់នៅធម្មតាតាមបែបគន្លងថ្មីមានការពាក់ម៉ាស់ពេលចេញក្រៅផ្ទះ លាងដៃជាមួយទឹកសាប៊ូអាកុលជែល និងការរក្សាគន្លាតសង្គម។
ទី២ សូមអនុវត្ត៣កុំ រួមមាន៖ កុំចូលកន្លែងបិទជិតប្រើម៉ាស៊ីនត្រជាក់ កុំនៅកន្លែងមនុស្សច្រើនកុះករ កុំប៉ះពាលគ្នា។ ទី៣ មិនត្រូវមានការជួបជុំគ្នានៅកន្លែងមានមនុស្សលើពី២០នាក់ និងទី៤នៅតាមកន្លែងលក់ដូរ ភោជនីយដ្ឋាន ផ្សារទំនើប ធនាគារ និងតាមមូលដ្ឋានអាជីវកម្មនានាទៀត ត្រូវត្រួតពិនិត្យ បើមិនពាក់ម៉ាស់គឺមិនអនុញ្ញាតអោយចូល ហើយត្រូវវាស់កម្ដៅ រៀបកន្លែងឈរអង្គុយរក្សាគន្លាតគ្នា និងត្រូវមានដាក់ទឹកអាកុលជែល សាប៊ូលាងដៃជាប្រចាំ៕
Daily Program
