ថ្ងៃទី១១ ខែកុម្ភៈ ឆ្នាំ២០២៥អត្ថបទគម្ពីរ ម៉ាកុស (៧, ១-១៣) អត្ថាធិប្បាយគម្ពីរដោះ៖ លោកបូជាចារ្យ រឿង ឆ័ត្រសិរី

ថ្ងៃនេះយើងស្តាប់ព្រះបន្ទូល ម៉ាកុស (៧,១-១៣)ទាក់ទងនឹងពួកផារ៉ាស៊ី និងពួកធម្មាចារ្យ ខ្លះមើល​ឃើញ​ព្រះយេស៊ូបរិភោគអាហារដោយមិនលាងដៃ បរិភោគដោយដៃមិនបរិសុទ្ធ។ នេះជាអ្វី​មួយដែលបង្ហាញ​ថា​ព្រះអង្គ​បាន​ធ្វើខុសវិន័យរបស់ព្រះអង្គ ឬមិនប្រពឹត្តតាមវិន័យ​ដែលមានចែងទុកនៅសម័យកាល​លោក​ម៉ូសេ​។ ​អ្នក​​ណាមិនធ្វើទេ! ចាត់ទុកថាជាមនុស្សបាប ជាអ្នកធ្វើខុស។

ព្រះយេស៊ូ​ធ្វើ​​អញ្ចឹង ព្រោះ​ព្រះអង្គចង់បង្រៀនពួកគេឲ្យដឹងខ្លួនថា អ្វីក៏ដោយមិន​គ្រាន់តែ​រឿងលា​ងដៃ​មុន​បាយ តែគ្រប់រឿងដែលពាក់ព័ន្ធនិងអត្ថន័យវិន័យ និងភាពប្រាកដរបស់រឿងនីមួយៗ គឺចង់​ឱ្យ​ពួក​ផារ៉ា​ស៊ី​កាន់​យ៉ាងត្រឹមត្រូវ មិនគ្រាន់តែកាន់ដើម្បីតែ​រកផលប្រយោជន៍ ឱ្យ​គេសរសើរ ​ឱ្យគេលើក​តម្កើង​ខ្លួន ឬ​ក៏​ដើម្បី​បានផលប្រយោជន៍អ្វីមួយពីកិច្ចការដែលខ្លួនធ្វើ។

​ហេតុការណ៍នោះព្រះយេស៊ូរំលឹកយើងឲ្យរិះគិត នូវអ្វី​ដែល​យើងកំពុងរស់​នៅតាម​វិន័យ​របស់ព្រះជា​ម្ចាស់ តើយើងកាន់តាមគោលការណ៍របស់រឿងនីមួយៗនោះយ៉ាងពិតប្រាកដឬអត់ ឧទារហណ៍៖ ថ្ងៃសុក្រ ច្បាប់​ព្រះសហគមន៍ឱ្យយើងតមអាហារ ឬមុនទទួលព្រះកាយ​យើងត្រូវតែត​ម​អាហារ​មួយ​ម៉ោង​យ៉ាង​តិច​។ តើ​បងប្អូនដឹងអំពីច្បាប់វិន័យនេះទេ? រឿងនេះក៏ធ្វើឱ្យយើងពិចារណាដែលថា តើហេតុអ្វី​បានជា​ច្បាប់​មិន​ឱ្យ​យើងញាំអ្វីមួយម៉ោងមុនទទួលព្រះកាយ ហើយហេតុអ្វីយើងត្រូវតមអាហារថ្ងៃសុក្រ?

ថ្ងៃសុក្រជាថ្ងៃដែល​ព្រះយេស៊ូសុគតព្រះអង្គរង់ទុក្ខលំបាក នេះគឺជាអត្ថន័យ!​យើងចូលរួមជា​មួយព្រះអង្គ​ការ​តមទីមួយក៏ជួយឱ្យយើងចេះអត់ធ្មត់  ទីពីរការតមអាហាររបស់យើងធ្វើឱ្យយើងមិនចំណាយលុយច្រើន ហើយយើងក៏អាចយកលុយនឹងទៅធ្វើបុណ្យធ្វើទានបានដែរ និងទីបីជា​ឱកាសដើម្បី​ឱ្យយើ​ងអាចទាក់ទង​កាន់តែជិតស្និទ្ធជាមួយព្រះជាម្ចាស់។ បាទ! វាមានអត្ថន័យរបស់វា តែបងប្អូនខ្លះគិតតែតមសត្វ សត្វអីខ្លះ​ឱ្យ​យើងចេះស៊ូទ្រាំមិនថាសត្វណាឱ្យតែដល់គោលដៅនឹងល្អហើយ។

យើងមិនចាំបាច់ទៅតាមគ្រប់សេចក្តីលំអិតទេ ជូនកាលយើងក៏អត់បានតមដែរ តែព្រះសហគមន៍​បើក​ទូលំ​ទូលាយបងប្អូនអាចធ្វើកិច្ចការអ្វីផ្សេងបានជាការតមវិញ ដូចជាការសួរសុខទុក្ខអ្នកជំងឺ ការធ្វើ​បុណ្យ​ធ្វើ​ទាន ការអធិដ្ឋានទាំងអស់នេះក៏អាចជំនួសនៃការតមបានដែរ ដូច្នេះការតមរបស់យើងមានរូបភាព​ផ្សេង​គ្នា។ ព្រះយេស៊ូរិះគន់ពួកផារ៉ាស៊ីដែលគេត្រូវកាត់មួយភាគដប គេហៅថាខបាំង ដើម្បីទៅថ្វាយ​ព្រះជាម្ចាស់​នៅពេលដែលឪពុកម្តាយត្រូវការថវិកា ឬលុយកាក់ដើម្បីទៅព្យាបាល ឬក៏ជួយចិញ្ចឹម​ឪពុក​ម្តាយ តែពួក​គេ​ប្រាប់​ថាអត់បានទេ ត្រូវតែកាត់មួយភាគដបនឹងឱ្យ។ បាទ ព្រះយេស៊ូអត់យល់ព្រមទេ! ព្រះអង្គយល់​ឃើញ​ថា​ជីវិតមនុស្សមានតម្លៃជាង ឪពុកម្តាយមាន​តម្លៃជាង ហេតុនេះបានជាព្រះអង្គរិះគន់ការ​កាន់​ធម្មវិន័យ​​ដោយមិនយល់ពីគោលគំនិតនៃអប់រំ ឬហៅថាវត្ថុបំណង។

ព្រះសហគមន៍របស់យើងមានវិន័យ​ច្រើន បើបងប្អូនចាប់អារម្មណ៍បង​​ប្អូនអាចមានសំណួរ​សួរ​បាននៅ​ពេលក្រោយ តែបងប្អូនត្រូវដឹងថា វិន័យទាំងអស់នោះជួយឱ្យយើងទៅជិតស្និទ្ធជាមួយព្រះជាម្ចាស់។

ឧបមា​​ថា បើយើង​ធ្វើតាមរឿងណាមួយ យើងត្រូវដឹងថា យើងត្រូវថ្វាយរឿង​ទាំងនោះ​ទៅព្រះ​ជាម្ចា​ស់​ឱ្យ​អស់​​ពីចិត្តរបស់យើងដោយសេចក្តីថ្លៃថ្នូរ ត្រូវមានចិត្តសង្ឈឹម ជាពិសេសបង្ហាញសេចក្តីស្រឡាញ់ ធម៌​មេត្តា​ករុណារបស់ព្រះជាម្ចាស់នៅក្នុងកិច្ចការទាំងនោះ នោះពិតជាមិនខុសឡើយ បងប្អូននឹងអាចបំពេញ​កិច្ច​ការ​ទាំងនោះដោយជំនឿ និងចិត្តសង្ឈឹម៕