សន្តម៉ាកុសបានណែនាំឱ្យយើងឃើញព្រះយេស៊ូបានទៅដល់ស្រុកកេនេសារ៉ែត នៅទីនេះមានបណ្តាជន និងអ្នកជំងឺជាច្រើនចង់មកពាល់ព្រះយេស៊ូដើម្បីបានជាសះស្បើយ ហើយអស់អ្នកដែលបានប៉ះពាល់នោះ គេបានជាសះស្បើយទាំងអស់គ្នាមែន។ ដូច្នេះបងប្អូនយើងឃើញការអស្ចារ្យកើតឡើង! តែការអស្ចារ្យនោះកើតឡើងបានលុះត្រាតែយើងមានជំនឿ។
អស់អ្នកដែលបានពាល់ព្រះយេស៊ូគឹមានជំនឿយ៉ាងមុតមាំដោយផ្ញើជីវិតទៅព្រះយេស៊ូ ជឿថាគ្រាន់តែពាល់ព្រះយេស៊ូគេនឹងបានជា។ នេះជាសំណួរមួយដែលយើងត្រូវសួរខ្លួនយើងដែលជាគ្រីស្តបរិស័ទ! រាល់ដងដែលយើងចូលរួមអភិបូជាយើងបានស្តាប់ព្រះបន្ទូលផ្ទាល់របស់ព្រះអង្គ យើងបានពាល់ព្រះអង្គផ្ទាល់ដោយការទទួលព្រះកាយគ្រីស្ត នឹងតាមរយៈអគ្គសញ្ញាផ្សេងៗ ដូចជាអគ្គសញ្ញាសម្រុះសម្រួល។
ផ្ទុយទៅវិញ! យើងធ្លាប់សួរខ្លួនឯងទេថា រាល់ដងដែលយើងបានពាល់ព្រះអង្គតាមរយៈអគ្គសញ្ញា នឹងការចូលរួមអភិបូជានេះ តើយើងពាល់ព្រះអង្គដោយជំនឿរបស់យើង ឬយើងពាល់ព្រះអង្គដោយទំលាប់តែប៉ុណ្ណឹង!។ ដូច្នេះកុំឱ្យយើងទទួលព្រះកាយព្រះគ្រីស្ត យើងទទួលអគ្គសញ្ញាសម្រុះសម្រួលព្រោះតែទម្លាប់ សូមឱ្យគ្រប់ពេលដែលយើងទទួលព្រះកាយព្រះគ្រីស្ត! រាល់ដងដែលយើងស្តាប់ព្រះបន្ទូលរបស់ព្រះអង្គ! រាល់ដងដែលយើងទទួលអគ្គសញ្ញាសម្រុះសម្រួល! សុំឱ្យយើងមានជំនឿលើព្រះអង្គ សូមឱ្យយើងជឿទៅលើអគ្គសញ្ញាដែលយើងទទួលដើម្បីឱ្យការអស្ចារ្យរបស់ព្រះអង្គអាចកើតឡើងនៅក្នុងជីវិតរបស់យើងដែរ។
សុំព្រះជាម្ចាស់ជួយយើងពីមួយថ្ងៃទៅមួយថ្ងៃ ដើម្បីឱ្យយើងមានជំនឿកាន់តែមុតមាំ ឱ្យយើងមានជំនឿកាន់តែជ្រៅនៅក្នុងទំនាក់ទំនងព្រះអង្គ ដើម្បីឱ្យយើងអាចមើលឃើញវត្តមានរបស់ព្រះអង្គផ្ទាល់នៅក្នុងជីវិតរបស់យើង ហើយឱ្យយើងអាចមើលឃើញការអស្ចារ្យរបស់ព្រះអង្គផ្ទាល់នៅក្នុងជីវិតរបស់យើង។ អាម៉ែន៕
Daily Program
