លោកឡរ៉េនស៍ អេដវ៉ដ ផេជ៍ គេហៅលោកថា ឡារី ផេជ៍ កើតនៅថ្ងៃទី២៦ ខែមីនា ឆ្នាំ១៩៧៣ នៅទីក្រុងអីស្ត៍ ឡេនហ្ស៊ីង នៅក្នុងរដ្ឋមីជីហ្គេន សហរដ្ឋអាម៉េរិក។ លោកគឺជាមហាសេដ្ឋី ពាន់ លាន និងជាអ្នកបច្ចេកវិជ្ជាព័ត៌មានវិទ្យាសហរដ្ឋអាម៉េរិក។ លោកសហការជាមួយលោកសឺហ្គេ ប្រ៊ីន និងជាសហស្ថាបនិកនៃក្រុមហ៊ុន ហ្គ៉ូហ្គល់។
លោកឡារី ផេជ៍ កើតនៅក្នុងគ្រួសារជនជាតិហ្ស៊ីវ។ ម្តាយរបស់លោកគឺលោកស្រីសាស្រ្តាចារ្យ ហ្គ្លូរៀ វេនស្តេន ដែលជាសាស្រ្តាចារ្យកម្មវិធីកុំព្យូទ័រ នៅសកលវិទ្យាល័យមីជីហ្គេន និងឪពុក របស់លោក គឺលោក ខាលវី ផេជ៍ ដែលជាសាស្រ្តាចារ្យព័ត៌មានវិទ្យា និងបញ្ញាញ្ញាណសិប្បនិមិត្ត នៅសកលវិទ្យាល័យ ការ៉ូលីន ខាងជើង និងនៅសកលវិទ្យាល័យមីជីហ្គេន។ ហើយលោកខាល ផេជ៍ ក៏ជាម្ចាស់ជំនាន់ដំបូង និងជាអ្នកដែលគេយកជាគំរូយោងនៅក្នុងវិស័យបញ្ញាញ្ញាណសិប្បនិមិត្តផងដែរ។
ក្នុងនាមជាកូនប្រុសនៃសាស្រ្តាចារ្យព័ត៌មានវិទ្យា លោកឡារី ផេជ៍ មានចំណាប់អារម្មណ៍យ៉ាងខ្លាំងទៅនឹងព័ត៌មានវិទ្យាដែលចាប់ផ្តើមតាំងពីលោកនៅវ័យក្មេងមកម្ល៉េះ។ កាលពីវ័យក្មេង លោកឡារី ផេជ៍ បានបង្ហាញនូវអត្ថប្រយោជន៍យ៉ាងរស់រវើកសម្រាប់បច្ចេកវិទ្យា សហគ្រាស និងការបង្កើតថ្មី។ ជំនក់ចិត្តរបស់លោកសម្រាប់ព័ត៌មានវិទ្យា និងបច្ចេកវិទ្យា បានចាប់ផ្តើម នៅពេលលោកមានអាយុ ១០ឆ្នាំ ហើយវរជននៅក្នុងដួងចិត្តរបស់លោកគឺអ្នកវិទ្យាសាស្រ្តនីកូឡា តេស្លា។ លោកឡារី ផេជ៍ តែងស្រមៃនឹងបង្កើតក្រុមហ៊ុនផ្ទាល់ខ្លួនរបស់លោកតាំងពីអាយុ ១២ឆ្នាំ។ លោកក៏ជាកុមារដំបូងនៅក្នុងសាលាដែលបានធ្វើការប្រើប្រាស់កម្មវិធីវាយអត្ថបទដំបូងផងដែរ។
លោកឡារី ផេជ៍ បានទទួលសញ្ញាបត្រផ្នែកវិស្វកម្មកុំព្យូទ័រពីសកលវិទ្យាល័យមីជីហ្គេន នៅឆ្នាំ១៩៩៥។ បន្ទាប់ពីនេះ លោកក៏បានសម្រេចចិត្តផ្តោតអារម្មណ៍លើវិស្វកម្មកុំព្យូទ័រ និងចុះឈ្មោះចូលរៀននៅសកលវិទ្យាស្តេនហ្វ៉ដសម្រាប់កម្មវិធីបណ្ឌិត។ នៅក្នុងនិក្ខេបបទបណ្ឌិតរបស់លោក លោកបានបង្ហាញនូវបំណងចង់ស្វែងយល់អំពីលក្ខណៈគណិតវិទ្យានៃបណ្តាញគេហទំព័រពិភពលោក (World Wide Web)។ ការអភិវឌ្ឍនិក្ខេបបទនេះ ធ្វើឡើងក្រោមការត្រួតពិនិត្យមើលរបស់លោកថែរី វីណូហ្គ្លាដ ដែលជាអ្នកជំនាញដ៏ឆ្នើមផ្នែកបញ្ញាញ្ញាណសិប្បនិមិត្ត។
លោកឡារី ផេជ៍ គឺជាអ្នកបង្កើតនីតិវិធី ផេជ៍រេង (PageRank) សម្រាប់ចាត់ថ្នាក់គេហទំព័រតាមកម្រិតពេញនិយមរបស់វា។
នៅឆ្នាំ២០០២ វេទកាសេដ្ឋកិច្ចពិភពលោក បានសម្រេចប្រគល់ឋានៈជាមេដឹកនាំអន្តរជាតិនៃសេដ្ឋកិច្ចនាពេលអនាគតដល់លោកឡារី ផេជ៍ និងនៅឆ្នាំ ២០០៤ លោកបានទទួលពានរង្វាន់ ម៉ាកូនី ដែលជាពានរង្វាន់ឈានមុខប្រចាំឆ្នាំនៅក្នុងវិស័យព័ត៌មានវិទ្យា។
នៅថ្ងៃទី២០ ខែមករា ឆ្នាំ២០១១ លោកអេរីក ឆ្មីដ អគ្គនាយកប្រតិបត្តិនៃក្រុមហ៊ុន ហ្គូលហ្គ៉ល តាំងពីឆ្នាំ២០០១ បានប្រកាសនៅលើប្លកផ្លូវការនៃហ្គូលហ្គ៉លថា លោកឡារី ផេជ៍ នឹងក្លាយជាអ្នកស្នងបន្តពីលោកក្នុងតំណែងជាអគ្គនាយកប្រតិបត្តិហ្គូលហ្គ៉លចាប់ពីថ្ងៃទី៤ ខែមេសា ឆ្នាំ២០១១ តទៅ។
លោកឡារី ផេជ៍ មានការតាំងចិត្តចូលរួមនៅក្នុងចលនា មនុស្សហួសវិស័យ (transhumaniste) មានន័យថា ជាការប្រើបច្ចេកវិជ្ជា និងវិទ្យាសាស្រ្ត ក្នុងការពង្រីកសមត្ថភាពរបស់មនុស្ស ទាំងរាយកាយ និងផ្លូវចិត្ត។
នៅខែវិច្ឆិកា ឆ្នាំ២០២៥ យោងតាមទស្សនាវដ្តីហ្វ៉ប (Forbes) និងប្ល៊ូមបឺហ្គ (Bloomberg) ទ្រព្យសម្បត្តិរបស់លោកឡារី ផេជ៍ ស្ថិតនៅចន្លោះ២៤៦ ដល់ ២៥៦ ពាន់លានដុល្លារ ដែលធ្វើឲ្យលោកក្លាយជាបុរសមានទ្រព្យសម្បត្តិច្រើនជាងគេទីពីរនៅលើពិភពលោក។
Daily Program
