សហរដ្ឋអាមេរិកស្នើបទឈប់បាញ់ ខណៈជម្លោះតំបន់ហ្គាហ្សាបន្តក្តៅគគុក

សហរដ្ឋ​អាមេរិក​បាន​ស្នើ​នូវសេចក្តី​ព្រាង​សេចក្តី​សម្រេច​មួយ​នៅ​ក្រុម​ប្រឹក្សា​សន្តិសុខ​អង្គការ​សហ​ប្រជាជាតិ ដោយ​អំពាវនាវ​ឲ្យ​មាន​បទ​ឈប់​បាញ់​ជា​បណ្តោះ​អាសន្ន​នៅ​តំបន់ ហ្គាហ្សា។កាលពីមុន ទីក្រុងវ៉ាស៊ីនតោនតែងតែជៀសវាងការប្រើពាក្យ «បទឈប់បាញ់» ក្នុងអំឡុងពេលពិភាក្សា​ ឬក៏ពិគ្រោះយោបលនៅគ្រប់វេទិកានៃ អង្គការសហប្រជាជាតិស្តីពីជម្លោះនៅហ្គាហ្សា​។

សំណើនេះជាលើកទីមួយហើយ ដែលសហរដ្ឋអាមេរិកបានអំពាវនាវឱ្យមានបទឈប់បាញ់បណ្តោះអាសន្ននៅហ្គាហ្សា បន្ទាប់ពីបានប្រើសិទ្ធវេតូនៅរាល់ការសម្រេចចិត្តផ្តល់ដំណោះស្រា​យជាច្រើនអំពីជម្លោះនៅហ្គាហ្សា។

របាយការណ៍បង្ហាញថា កិច្ចពិភាក្សានឹងចាប់ផ្តើមលើសេចក្តីព្រាងរបស់សហរដ្ឋអាមេរិកនៅចុងសប្តាហ៍នេះ ប៉ុន្តែវាមិនច្បាស់ទេថាតើសំណើនេះនឹងត្រូវបោះឆ្នោតអនុម័តឬអត់។

កាលពីថ្ងៃចន្ទ រដ្ឋសមាជិកចំនួន ២៦ នៅសហភាពអឺរ៉ុបបានអំពាវនាវឱ្យមានការផ្អាកសក​ម្មភាពមួយចំនួន ដែលនឹងនាំឱ្យមានបទឈប់បាញ់ប្រកបដោយនិរន្តរភាពនៅក្នុងតំបន់ហ្គាហ្សា​។

នៅឯការជួបជុំរបស់រដ្ឋមន្ត្រីការបរទេសសហភាពអឺរ៉ុបនៅទីក្រុងប្រ៊ុចសែល ប្រទេសសហភាពអឺរ៉ុបទាំងអស់ លើកលែងតែប្រទេសហុងគ្រី បានព្រមានអ៊ីស្រាអែលប្រឆាំងនឹងការបើកការវា​យប្រហារលើទីក្រុងរ៉ាហ្វាស ដែលពួកគេបាននិយាយថានឹងបង្កើនស្ថានភាពជនភៀសខ្លួននៅក្នុងទីក្រុងកាន់តែធ្ងន់ធ្ងរ៕