រដ្ឋមន្រ្តីក្រសួងថាមពលអ៊ុយក្រែន បានថ្លែងថា មីស៊ីល និងដ្រូន ត្រូវបានរុស្ស៊ី ដាក់គោលដៅ វាយប្រហារកាលពីថ្ងៃពុធលើ រោងចក្រអគ្គីសនី នៅក្នុងតំបន់ជាច្រើន នៅប្រទេសអ៊ុយក្រែន។
កាលពីថ្ងៃពុធទី៨ ឧសភា កងទ័ពអាកាសអ៊ុយក្រែន បានថ្លែងថា បានបាញ់ការពារគ្រាប់ដែលវាយប្រហារសំដៅលើរោងចក្រថាមពល។ កងទ័ពអាកាសអ៊ុយក្រែន បានធ្វើការរាប់ឃើញថា សត្រូវបានប្រើប្រាស់មធ្យោបាយវាយប្រហារតាមអាកាសចំនួន ៧៦ ក្នុងនោះមាន មីស៊ីលចំនួន ៥៥គ្រាប់ និងដ្រូនចំនួន ២១។ កងទ័ពអាកាសអ៊ុយក្រែន បានបន្ថែមថា ប្រព័ន្ធការពារអាកាសចាប់បានមីស៊ីលចំនួន ៣៩ និងដ្រូនចំនួន ២០។
អាជ្ញាធរអ៊ុយក្រែនបានបញ្ជាក់ថា ហ្វូងដ្រូនបានវាយប្រហារប្រឆាំងនឹងហេដ្ឋារចនាសម្ព័ន្ធថាមពលរបស់អ៊ុយក្រែន។ លោកហ្គឺម៉ាន ហ្គាលូតចេនកូ រដ្ឋមន្រ្តីថាមពលអ៊ុយក្រែន បានសរសេរថា ៖ ”សត្រូវមិនបានបោះបង់ចោលផែនការដែលវាយសំដៅដើម្បីឲ្យអ៊ុយក្រែនបាត់បង់អគ្គីសនីប្រើប្រាស់។ នេះគឺជាការវាយប្រហារថ្មីដ៏សម្បើមប្រឆាំងនឹងឧស្សាហកម្មថាមពលអ៊ុយក្រែន។” លោកបានបញ្ជាក់ថា ការវាយប្រហាររបស់រុស្ស៊ី គឺសំដៅលើរោងចក្រផលិតកម្ម និងស្ថានីយ៍ចែកចាយថាមពលនៅក្នុងតំបន់នានា។ ចំណែកអភិបាលទីក្រុង លោកអូឡេចសានដ្រ៍ ប្រូកូឌីន បានថ្លែងថា ទីក្រុងខឺស៊ុន នៅភាគខាងត្បូង ក៏ត្រូវបានដាច់អគ្គីសនីដោយផ្នែក ដោយសារការវាយប្រហាររបស់សត្រូវផងដែរ។
នៅក្នុងកិច្ចប្រជុំកំពូលរបស់រដ្ឋ ប្រធានាធិបតីអ៊ុយក្រែន លោកវ៉ូឡូឌីមៀ ហ្សេឡេនស្គី បានបង្ហាញដោយជឿជាក់ថា សេវាកម្មទាំងអស់នឹងធ្វើការនៅទីកន្លែងផ្ទាល់ដើម្បីបញ្ចប់ផលវិបាកនៃភេរវកម្មរបស់រុស្ស៊ី។
អាជ្ញាធរតាមតំបន់បានបង្ហាញថា មានយ៉ាងហោចណាស់មនុស្ស ៦នាក់ រងរបួស។ ម្នាក់នៅក្នុងតំបន់ ឌីបនីប្រូភើត្រូវស្កួ៍ នៅភាគខាងត្បូង។ ម្នាក់នៅគីរ៉ូវ៉ូហ្គ្រ៉ាដនៅភាគកណ្តាល។ ពីរនាក់នៅប្រូវ៉ារី នៅជិតទីក្រុងគៀវ និងយ៉ាងហោចណាស ពីរនាក់ផ្សេងទៀត នៅក្នុងរដ្ឋធានី។ លោកអភិបាលតំបន់ លោកអន់ឌ្រីអ៊ី រ៉ៃអ៊ីកូវីត បានថ្លែងថា មានក្មេងអាយុ ៨ឆ្នាំម្នាក់ ក៏បានរងរបួសនៅក្នុងតំបន់ គីរ៉ូវ៉ូហ្គ្រ៉ាដ នៅភាគកណ្តាល។
ក្រុមហ៊ុន DTEK ដែលជាអ្នកវិនិយោគដ៏ធំបំផុតផ្នែកឯកជននៅក្នុងវិស័យថាមពល នៅអ៊ុយក្រែន បានឲ្យដឹងថា រោងចក្រអគ្គីសនី ៣ បានទទួលរងការខូចខាតយ៉ាងធ្ងន់ធ្ងរ។ ក្រុមហ៊ុននេះ បានបញ្ជាក់ថា រោងចក្រត្រូវបានទទួលរងការវាយប្រហារប្រមាណ ១៨០ដង ចាប់តាំងពីការចាប់ផ្តើមនៃសង្រ្គាមកាលពីខែកុម្ភៈ ឆ្នាំ២០២២ ហើយរងការវាយប្រហារ ៥ដង ក្នុងអំឡុង ៦សប្តាហ៍ចុងក្រោយនេះ។
យោងតាមរដ្ឋបាលយោធានៃទីក្រុងគៀវ យន្តហោះទម្លាក់គ្រាប់បែកយុទ្ធសាស្រ្តរបស់រុស្ស៊ី Tu-95MS បានបាញ់មីស៊ីលអន្តរទ្វីបជាច្រើនដងមកលើរដ្ឋធានី។ ចំណែកប្រព័ន្ធផ្លូវដែកត្រូវបានដាក់គោលដៅវាយប្រហារផងដែរនៅទីក្រុងខឺស៊ុន។ អភិបាលតំបន់ លោកអូឡេចសានដ្រ៍ ប្រូកូឌីន បានថ្លែងថា ៖ “ផ្លូវដែករងការខូចខាត”។ លោកបន្ថែមថា ចរាចរណ៍តាមខ្សែរត់ត្រូវបានកម្រិត។
ថ្មីៗ នេះរុស្ស៊ី បានពង្រីកវិសាលភាពនៃការវាយប្រហារប្រឆាំងនឹងផ្លូវដែកអ៊ុយក្រែន ដែលមានសារសំខាន់ចំពោះពាណិជ្ជកម្ម ការដឹកនជញ្ជូនស៊ីវិល និងការផ្គត់ផ្គង់ដល់យោធា។ គោលដៅគឺធ្វើឲ្យខូចខាតការផ្គត់ផ្គង់ភស្តុភារខាងយោធាជាពិសេសមកពីភាគខាងលិច។
មុននឹងការវាយប្រហារក្នុងទ្រង់ទ្រាយធំនេះ ប្រធានាធិបតីអ៊ុយក្រែន បានព្រមានថា រាល់ការយឺតយ៉ាវនៃការផ្គត់ផ្គង់អាវុធ នឹងធ្វើឲ្យអ៊ុយក្រែងបង់ថ្លៃខ្ពស់ និងទាំងបស្ចឹមប្រទេសដែលជាសម្ព័ន្ធមិត្តផងដែរ។
Daily Program
