រដូវវស្សានៅកម្ពុជាកំពុងតែជិតអស់ហើយ ដូច្នេះរដូវបង្កបង្កើនផលស្រូវនៅកម្ពុជានៅតំបន់ភាគច្រើននៃប្រទេសយើងក៏ជិតអស់ដែរ លើកលែងកន្លែងខ្លះដែលមានប្រភពទឹក ហើយអាចបង្កបង្កើនផលស្រូវរដូវប្រាំងបាន ប៉ុន្តែតំបន់ដែលមិនមានទឹកគួរទុកដីចោលឬ?
តាមទម្លាប់ប្រជាពលរដ្ឋនៅតាមស្រុកស្រែចំការនៅរដូវប្រាំងអ្នកខ្លះដែលឧស្សាហ៍គឺអាច ដាំដំណាំនេះដំណាំនោះ ទុកហូប ខ្លះក៏ទៅជួញដូរ ខ្លះក៏ធ្វើនំធ្វើនេះលក់ ដើម្បីដោះស្រាយជីវភាព ហើយខ្លះក៏ដើរលេងទំនេរមិនធ្វើអ្វីឡើយ ប៉ុន្តែជាទូទៅដីដែលមិនមានទឹក ច្រើនត្រូវទុកចោលដោយគ្មានផលិតភាព។
នេះគឺជាចំណុចខ្សោយមួយ ហើយក៏អាចជាទម្លាប់ដែលអាចនឹងអោយយើងខ្ជះខ្ជាយធនធាន ដី ទំនេរចោល ខណៈដែលដីទាំងនេះ អាចនឹងមានសក្តានុពលសម្រាប់សកម្មភាពផ្សេងៗ ដូច្នេះគួរតែច្នៃ យ៉ាងហោចណាស់ក៏អាចដាំត្រសក់ស្រូវ ល្ពៅ ដំឡូងនេះដំឡូងនោះ ដោយសារតែប្រភេទដំណាំខ្លះ មិនត្រូវការទឹកច្រើនទេ ។
ដីស្រែយើងបើអាចកែច្នៃហើយអាចធ្វើនេះធ្វើនោះទាញប្រយោជន៍បន្ថែមពីការធ្វើស្រែវាក៏អាចអោយយើងបានផល បានកម្រៃ ឬយ៉ាងហោចណាស់ដោះស្រាយជីវភាពបានខ្លះ ជាជាងទុកចោលគ្មានសកម្មភាព។
ដោយឡែកអ្នកជំនាញកសិកម្ម ក៏គួរតែចេញការអប់រំ ឬផ្តល់ជម្រើស ឬក៏ចេញសេចក្តីណែនាំ ផ្តល់ពលរដ្ឋដើម្បីពិចារណា ដើម្បីធ្វើយ៉ាងណាជួយជាគំនិតជាយោបល និង ជាការបង្ហាញផ្លូវ ដល់កសិករយើង។
កសិករនិងអ្នកជំនាញកសិកម្ម ក៏ដូចជាអ្នកដែលពាក់ព័ន្ធនានា ប្រសិនបើយើងអាចដោះស្រាយ បញ្ហានេះបាន គឺអាចជួយលើកកំពស់ប្រសិទ្ធភាព និងសក្តានុពល ហើយក៏អាចបន្ថែមតម្លៃដល់ផ្ទៃដីកសិកម្មដ៏ធំល្វឹងល្វើយរបស់យើងបានមួយចំណែកទៀតផងដែរ។
យើងខ្ញុំជឿជាក់ថា ចាប់ពីខែវិច្ឆិកា ដល់ ខែមេសា ខាងមុខនេះតទៅ ផ្ទៃដីកសិកម្ម ជាពិសេសគឺស្រែរាប់សិបហិកតា នឹងត្រូវទុកចោល គ្មានសកម្មភាពទាំងអស់ ដូច្នេះគួរតែយើងរិះរកគំនិត ដោះស្រាយបញ្ហានេះចាប់ពីពេលឥឡូវ។
យើងដឹងថា ដំណាំត្រូវការទឹក ត្រូវការជី តែផ្ទៃដីទាំងនេះភាគច្រើនមិនមានទឹកទេ ប៉ុន្តែបើនិយាយអំពីគុណភាពដីក៏មិនអន់ដែរ ដូច្នេះយើងខ្ញុំគិតថា អ្នកជំនាញកសិកម្មអាចសិក្សារកពូជដំណាំដែលសមស្របសម្រាប់ដីទំាងនេះ ហើយមានប្រយោជន៍អាចជាជីសម្រាប់ពេលធ្វើស្រែខាងមុខពេលមានទឹកភ្លៀងមកដល់៕
Daily Program
