បូជាចារ្យថ្មីត្រូវបានតែងតាំងនៅនីការ៉ាហ្គ័រ

ទោះបីវិថីនៃជំនឿនៅប្រទេសនីការ៉ាហ្គ័រកំពុងតែរដិរដុប ដោយសារតែអាជ្ញាធរចាប់បុព្វជិតជាច្រើនរូប ក៏គ្រាប់ពូជនៃព្រះជាម្ចាស់នៅតែបន្ត ដោយថ្មីៗនេះ ព្រះសហគមន៍មួយនៅក្នុងប្រទេ​ស​នេះ​បានតែងតាំងលោកបូជាចារ្យថ្មី៩រូបបន្ថែមទៀត។​

វ៉ាទីកង់ញូវបានរាយការណ៍ថា បូជាចារ្យថ្មីចំនួន ៩ រូប ត្រូវបានតែងតាំងដោយលោក កាឌីណាល់ និង​ជាអគ្គអភិបាល​នៃព្រះសហគមន៍ ម៉ាណាហ្គា (Managua) ឡេអូផុលឌូ ចូសេ ប្រេនណេស សូឡហ្សាណូ (Leopoldo José Brenes Solórzano)។​

នៅក្នុងពិធីតែងតាំងនោះ លោកកាឌីណាល់ បានសំដែងអំណរគុណនិងអំណរសប្បាយ សម្រា​ប់អំណោយដ៏មានអត្ថន័យសម្រាប់ប្រជាជាតិនីការ៉ាហ្គ័រ​។

លោកបានមានប្រសាសន៍ថា ជីវិតជាបូជាចារ្យ គឺមិនមែនជាបុគ្គលដែលមានអំណាច មានឥទ្ធិពលនោះទេ តាមពិតទៅ បូជាចារ្យគ្រប់រូបគឺសុទ្ធតែជាអ្នកបម្រើ ដែលចាំបាច់ដើម្បីកសាងចរន្តនិងតភ្ជាប់ចំណងភាតរភាព។​

មកដល់ពេលនេះ បុព្វជិតប្រមាណជា ១៤ នាក់ ដោយនៅក្នុងនោះមានទាំងនិស្សិតទេវវិទ្យាល័យ ២ នាក់ និង លោកអភិបាលនៃព្រះសហគមន៍កាតូលិក២ នាក់ ត្រូវបានចាប់ខ្លួនដោយអាជ្ញា​ធរនៅក្នុងប្រទេសនេះ៕