កាលពីថ្ងៃទី៧ ខែមេសា ប្រទេសចិនបានធ្វើការល្បាតប្រយុទ្ធនៅសមុទ្រចិនខាងត្បូងដែល ត្រូវបានតវ៉ា។ នេះគឺជាឆាកនៃឧប្បត្តិវហេតុថ្មីៗ ជាមួយហ្វីលីពីន នៅខណៈដែលប្រទេសនេះរៀបចំលំហាត់យោធារួមគ្នាជាមួយសហរដ្ឋអាម៉េរិក ជប៉ុន និងអូស្រ្តាលី។
នៅប៉ុន្មានខែចុងក្រោយនេះ ភាពតានតឹងរវាងចិន និងហ្វីលីពីន ដែលបញ្ជាក់កាន់តែម៉ឺងម៉ាត់ឡើងៗ នូវការទាមទារទឹកដី និងឈានដល់ចំនុចមិនស្របគ្នាខ្លាំងនាប៉ុន្មានឆ្នាំចុងក្រោយនេះ។
ឧប្បត្តិវហេតុជាបន្តបន្ទាប់នៅជិតកោះប៉ប្រះទឹកដែលមានជម្លោះ បានកើតមានឡើងជាទៀងទាត់ចាប់តាំងពីដំណាច់ឆ្នាំ២០២៣ ដោយការកើនឡើងនូវភាពតានតឹងរវាងទីក្រុងប៉េកាំង និងទីក្រុងម៉ានីល។
នៅក្នុងសេចក្តីប្រកាសមួយយោធាចិន បានថ្លែងថា ៖ “កាលពីថ្ងៃទី៧ ខែមេសា មេបញ្ជាការនៃយោធភូមិភាគខាងត្បូងនៃយោធារំដោះប្រជាជនចិន រៀបចំការដើរល្បាតប្រយុទ្ធតាមនាវា រួមជាមួយយន្តហោះចម្បាំងនៅសមុទ្រចិនខាងត្បូង”។
សេចក្តីប្រកាសមិនបានបញ្ជាក់អំពីទំហំនៃការធ្វើលំហាត់សមយុទ្ធ និងការឈរជើងបោះទីតាំងនោះទេ។ សមុទ្រចិនគឺជាតំបន់សមុទ្រដ៏ធំ ដែលជាផ្លូវដឹកជញ្ជូនមួយផ្នែកដ៏ធំនៃពាណិជ្ជកម្មរវាងអាស៊ី និងផ្នែកដែលនៅសល់នៃពិភពលោក។
យោធាចិនបន្ថែមថា ៖ ”គ្រប់សកម្មភាពយោធាដែលធ្វើឲ្យវិបប្លាសដល់ស្ថានភាពនៅសមុទ្រចិនខាងត្បូង និងបង្កើតជាចំនុចក្តៅ ត្រូវស្ថិតនៅក្រោមការគ្រប់គ្រង”។ ចិននិយាយសំដៅដល់លំហាត់យោធារបស់ប្រទេសដទៃៗ ទៀតនៅក្នុងដែនទឹកតែមួយ។
កាលពីថ្ងៃសៅរ៍ ប្រទេសហ្វីលីពីន សហរដ្ឋអាម៉េរិក ជប៉ុន និងអូស្រ្តាលី បានប្រកាសអំពីការរៀបចំរួមគ្នាកាលពីថ្ងៃអាទិត្យនូវលំហាត់នាវា និងយន្តហោះ នៅក្នុងតំបន់សេដ្ឋកិច្ចផ្តាច់មុខរបស់ហ្វីលីពីន។
ប្រទេសទាំងបួន បានបញ្ជាក់ថា នេះនឹងបង្ហាញការសច្ចារួមគ្នារបស់ក្រុមសម្ព័ន្ធមិត្ត ដើម្បីពង្រឹងកិច្ចសហប្រតិបត្តិការតំបន់ និងអន្តរជាតិ ដើម្បីជាគុណប្រយោជន៍ដល់តំបន់ឥណ្ឌូប៉ាស៊ីហ្វីកមួយ ដែលសេរី និងបើកចំហ”។
កិច្ចប្រជុំកំពូលរវាងប្រធានាធិបតីអាម៉េរិក លោកចូ បាយឌិន សមភាគីហ្វីលីពីន លោកហ្វ៊ែរឌីណង់ ម៉ាកូស និងនាយករដ្ឋមន្រ្តីជប៉ុន លោកហ្វ៊ូមីញ៉ូ គីស្ហ៊ីដា ត្រូវបានត្រៀមធ្វើនៅថ្ងៃទី១១ ខែមេសា នៅសេតវិមាន សហរដ្ឋអាម៉េរិក។
លំហាត់យោធាជើងទឹក និងកិច្ចប្រជុំកំពូលចូលមកអន្តរាគមន៍បន្ទាប់ពីមានការប៉ះទង្គិចជាច្រើនដងរវាងនាវាចិន និងហ្វីលីពីន នៅជិតប្រជុំកោះតាមបណ្តោយប្រទេសហ្វីលីពីននាប៉ុន្មានខែចុងក្រោយនេះ។
កាលពីសប្តាហ៍មុន ទាហានហ្វីលីពីន ៣នាក់ បានរងរបួស នៅខណៈនៃការប៉ះទង្គិច ជាមួយនឹងកងការពារឆ្នេរចិន ដែលបានរាំងខ្ទប់ និងធ្វើឲ្យខូចខាតនាវារបស់ពួកគេ ដោយមានជំនួយពីកាណុងកាំភ្លើងបាញ់ទឹកជាច្រើននៅតាមបណ្តកោះប៉ប្រះទឹកដែលមានជម្លោះ ឬហៅថា ប្រជុំកោះ Second Thomas។
ប្រទេសចិនមើលឃើញជាមួយនឹងក្តីបារម្ភនូវការពង្រឹងទំនាក់ទំនងយោធារវាងសហរដ្ឋអាម៉េរិក និងហ្វីលីពីន។ មហាយក្សអាស៊ីមើលឃើញថា នេះគឺជារបៀបប្រឆាំងនឹងការទាមទារទឹកដីរបស់ខ្លួននៅក្នុងតំបន់។
ប៉ុន្មានឆ្នាំចុងក្រោយនេះ ប្រទេសចិន បានកសាងកោះសិប្បនិមិត្តនៅសមុទ្រចិន ដែលចិនដាក់យោធាដើម្បីពង្រឹងទីតាំងឈជើង។
ចំណែកមន្រ្តីជាន់ខ្ពស់របស់អាម៉េរិក បានបញ្ជាក់ជាច្រើនសាថា មានការតាំងចិត្តមិនងាករ៉េរបស់សហរដ្ឋអាម៉េរិកដើម្បីការពារហ្វីលីពីននៅសមុទ្រចិនខាងត្បូង ក្នុងករណីមានការវាយប្រហារ។
Daily Program
