Application ថ្មីរបស់ក្រសួងអប់រំ យុវជន និងកីឡា ដែលសហការជាមួយនិងសហភាពសហព័ន្ធកម្ពុជា បង្កើតនូវ MoEYS E-Learning App គឺជាកម្មវិធីស្វ័យសិក្សា ដែលផ្តល់ជូនដល់សិស្សានុសិស្ស គ្រប់កម្រិតក្នុងថ្នាក់មធ្យមសិក្សា ហើយចំពោះApp នេះបានដាក់ដំណើរការជាផ្លូវការ តាំងពីថ្ងៃទី ៧ ខែឧសភា ឆ្នាំ២០២១។
ក្រសួងអប់រំ យុវជន និងកីឡា បានចាត់ទុកAppថ្មីមួយនេះ ជាឧបករណ៍ជំរុញបន្ថែមការសិក្សា អប់រំ ពីចម្ងាយសម្រាប់សិស្សគ្រប់កម្រិតនៅក្នុងបរិបទជំងឺកូវីដ១៩។
លោក រស់ សុវាចា អ្នកនាំពាក្យក្រសួងអប់រំ យុវជន និងកីឡា បានថ្លែងថា ៖«ក្រសួងអប់រំ យុវជន និងកីឡា យល់ច្បាស់ពីស្ថានការដែលកំពុងតែកើតឡើងក្នុងពិភពលោក ក៏ដូចជាកម្ពុជាដែលជាស្ថានការមួយដ៏លំបាក ជាពិសេសអ្នកសិក្សា បុគ្គលិកអប់រំ គ្រប់លំដាប់ថ្នាក់កំពុងតែប្រឈមមុខដោះស្រាយស្ថានការកូវីដ១៩។ ដើម្បីឆ្លើយតបនឹងការងារនេះ ក្រសួងអប់រំ យុវជន និងកីឡា បន្តកិច្ចសហការជាមួយដៃគូរពាក់ព័ន្ធនៅក្នុងការងារនេះ ហើយក្រសួងបន្តសហការជាមួយសហភាពសហព័ន្ធយុវជនកម្ពុជា។ ក្រសួងបានប្រកាសជាផ្លូវការដាក់ឱ្យប្រើប្រាស់នូវកម្មវិធី ស្វ័យសិក្សាពីចម្ងាយ ជាកម្មវិធីអនុញ្ញាត្តឱ្យសិស្សរៀនអនឡាញ នៅក្នុងទូរស័ព្ទដៃឆ្លាតវៃរបស់គាត់»។
អ្នកនាំពាក្យក្រសួងអប់រំ យុវជន និងកីឡា បន្ថែមថា ក្នុងកាលៈទេសៈលំបាកនេះ ក្រសួងអប់រំ យុជន និងកីឡា បន្តជំរុញបន្ថែមដល់សិស្សានុសិស្សគ្រប់កម្រិតសិក្សា ចាប់ពីថ្នាក់ទីមួយ ដល់ទី១២ បន្តសិក្សារៀនសូត្របន្ថែម នៅកន្លែងដែលមានសុវត្ថិភាព និងបន្តរៀនតាមគ្រប់មធ្យោបាយដែលក្រសួងអប់រំ យុវជន និងកីឡា បានដាក់ចេញកន្លងមក ដើម្បីទាំងអស់គ្នាឆ្លងផុតស្ថានការលំបាកនេះ។
លិខិតរបស់លោក ហង់ជួន ណារ៉ុន រដ្ឋមន្ដ្រីក្រសួងអប់រំនៅថ្ងៃទី ៥ ខែឧសភា ជម្រាបជូនប្រធានមន្ទីរអប់រំរាជធានី ខេត្ដ ស្ដីពីការដាក់ឲ្យដំណើរការជាផ្លូវការនូវកម្មវិធីស្វ័យសិក្សា MoEYS E-Learning App បានឱ្យដឹងថា ការបង្កើតកម្មវិធីស្វ័យសិក្សានេះឡើង ក៏ដើម្បីឱ្យកម្មវិធីសិក្សារបស់កម្ពុជា ដើរទាន់បរិបទឧស្សាហកម្ម ៤.០ និងឆ្លើយតបទៅនឹងវិបត្តិនៃជំងឺកូវីដ១៩ ដែលកំពុងរីករាលដាលនៅក្នុងប្រទេសកម្ពុជា និងសកលលោក។
លោករដ្ឋមន្ដ្រីបានថ្លែងថា៖ «ខ្ញុំសូមជម្រាបជូនលោក លោកស្រី ប្រធាន ជ្រាបថា ក្រសួងអប់រំ យុវជន និងកីឡា បានសហការជាមួយសហភាពសហព័ន្ធយុវជនកម្ពុជា ផលិតកម្មវិធីទូរស័ព្ទដៃឆ្លាតវៃមានឈ្មោះថា កម្មវិធីស្វ័យសិក្សា MoEYS E-Learning។ កម្មវិធីស្វ័យសិក្សានេះត្រូវបានបង្កើតឡើងស្របតាមចក្ខុវិស័យរបស់ក្រសួងអប់រំ និងបរិបទឧស្សាហកម្ម ៤.០ ក៏ដូចជាការឆ្លើយតបទៅនឹងវិបត្តិនៃជំងឺកូវីដ១៩ ដែលកំពុងរីករាលដាលនៅក្នុងប្រទេសកម្ពុជា និងសកលលោក»។
បើតាមសេចក្ដីជូនដំណឹងរបស់ក្រសួងអប់រំ កម្មវិធីស្វ័យសិក្សាតាមប្រព័ន្ធអេឡិចត្រូនិកនេះមានវីដេអូសិក្សាពីថ្នាក់ទី ១ ដល់ ថ្នាក់ទី ១២ សៀវភៅសិក្សាអេឡិចត្រូនិក ដូចជា សៀវភៅសិក្សាគោល សៀវភៅកំណែអំណានទូទៅ ចំណេះដឹងសកល រឿងនិទាន កម្មវិធីតេស្តសមត្ថភាពសិស្ស និងទំព័រព័ត៌មានអប់រំ។
ក្រសួងអប់រំ ដាក់ដំណើរការកម្មវិធីនេះឱ្យប្រើប្រាស់ជាផ្លូវការចាប់ពីថ្ងៃទី ៧ ខែឧសភា ឆ្នាំ ២០២១ ដែលសិស្សានុសិស្ស អ្នកអាណាព្យាបាលសិស្ស គ្រូបង្រៀន និងសាធារណជនទូទៅអាចទាញយកកម្មវិធីស្វ័យសិក្សានេះនៅលើ Play Store App Store និង App Gallery ឬ តាមរយៈតំណ http://onelink.to/moeysapp ដើម្បីយកមកប្រើប្រាស់។
កម្មវិធីសិក្សាពីចម្ងាយថ្មីនេះ ជាការជំរុញការសិក្សារបស់សិស្សានុសិស្សពីចម្ងាយក្នុងបរិបទនៃជំងឺកូវីដ១៩។ តាមរយៈAppថ្មីនេះ សិស្សានុសិស្សអាចចូលទៅដោនឡូតបាន។ សិស្សានុសិស្សរបស់យើងអាចធ្វើការស្វ័យសិក្សាពីចម្ងាយតាមរយៈApp ថ្មីនេះគឺជាស្នាដៃ បង្កើតឡើងដោយខ្មែរ ហើយបច្ចេកវិទ្យាដែលតំឡើងថ្មីនេះ គឺជាបច្ចេកវិទ្យាចុងក្រោយ។ រចនាបថនៃApp ថ្មីនេះ ធ្វើឡើងតាមរបៀបរចនាបថខ្មែរ និងងាយស្រួលក្នុងការចូលទៅមើល សិក្សា រៀនសូត្រទៅតាម មាតិការនីមួយៗដែលបានរៀប៕
Daily Program
