អ៊ុតស្វាឬMonkeypox មកដល់សិង្ហបុរីហើយ ប៉ុន្តែប្រជាជាតិអាស៊ីអាគ្នេយ៍ផ្សេងទៀតហាក់មិនទាន់មានទេ!

ក្រសួង​សុខាភិបាលសិង្ហបុរី​បាន​បញ្ជាក់​ពី​ករណី​នាំ​ចូល​មួយករណី​នៃ​ជំងឺអ៊ុតស្វា ដែលអ្នកជំនាញ ការសុខភាពបរទេសមួយចំនួនកំពុងតែព្រួយបារម្ភ​ ហើយករណីនេះអាចជាករណីនៃជំងឺ ដែលគេកំពុងបារម្ភថ្មីនៅក្នុងតំបន់អាស៊ីអគ្នេយ៍។

សារព័ត៌មានឆាណែលញូវអេស៊ៀបានឲ្យដឹងថា អ្នកជំងឺ​ជា​ជនជាតិ​អង់គ្លេស អាយុ​៤២​ឆ្នាំ ធ្វើការ​ជា​អ្នកប​ម្រើ​​លើ​យន្តហោះ​។ បុរសនោះស្ថិតនៅក្នុងប្រទេសសិង្ហបុរីចន្លោះពីថ្ងៃទី ១៥ ដល់ថ្ងៃទី ១៧ ខែមិថុនា ហើ​យម្តងទៀតនៅថ្ងៃទី ១៩ ខែមិថុនា ខណៈដែលគាត់បានហោះចូល និងចេញពីសិង្ហបុរី ជាបន្តបន្ទាប់។ អ្នកជំងឺ​បាន​ធ្វើ​តេស្ត​វិជ្ជមាន​និងរកឃើញជំងឺអុតស្វា​នៅ​ថ្ងៃ​ទី ២០ ខែ​មិថុនា។

ប្រភពដដែលបានបញ្ជាក់ថា បច្ចុប្បន្ន​គាត់​កំពុង​សម្រាក​ព្យាបាល​នៅ​មជ្ឈមណ្ឌល​ជាតិ​សម្រាប់​ជំងឺ​ឆ្លង នៅក្នុងប្រទេសនេះ ហើយ​ស្ថានភាព​គាត់​មាន​ស្ថិរភាព។ បុរសរូបនោះចាប់ផ្តើមឈឺក្បាលនៅថ្ងៃទី ១៤ ខែមិថុនា និងគ្រុនក្តៅ ២ ថ្ងៃក្រោយមក។  រោគសញ្ញាទាំងនេះបានដោះ​ស្រាយជាបន្តបន្ទាប់ ហើយគា​ត់បានកើតកន្ទួលលើស្បែកនៅថ្ងៃទី ១៩ ខែមិថុនា។ បុរសរូបនោះត្រូវបានកំណត់អត្តសញ្ញាណក្រោយពីបានស្វែងរកជំនួយខាងវេជ្ជសាស្ត្រតាមរយៈការពិគ្រោះយោបល់តាមទូរស័ព្ទនៅយប់ថ្ងៃទី ១៩ ខែមិថុនា ហើ​យ​ត្រូវបានបញ្ជូនទៅ ​មជ្ឈមណ្ឌល​ជាតិ​សម្រាប់​ជំងឺ​ឆ្លង នៅថ្ងៃទី ២០ ខែមិថុនា ដើម្បីធ្វើការវាយតម្លៃបន្ថែម។

តាមការសិក្សាស្រាវជ្រាវ ជំងឺអុតស្វានេះ គឺជាជំងឺដែលបង្កដោយមេរោគឈ្មោះថា Monkeypox ហើយវាមានប្រភពនៅអាហ្វ្រិក ប៉ុន្តែថ្មីៗកន្លងទៅវាបានឆ្លងរីករាលដាលប្រមាណជា ជាង ១០០០ ករណី នៅក្នុងប្រទេស ២៩។  អ្នកជំងឺដែលឆ្លងមេរោគ ជាធម្មតាមានគ្រុនក្តៅ ឈឺក្បាល ឈឺសាច់ដុំ ឈឺខ្នង ហើមកូ​នកណ្តុរ ញាក់ សន្លឹម និងកន្ទួលលើស្បែក។

ជំងឺនេះភាគច្រើនជាសះស្បើយក្នុងរយៈពេលពី ២ ទៅ ៣ សប្តាហ៍តែ ក្នុងករណីខ្លះ មេរោគអាចបណ្តាលឱ្យមានផលវិបាកធ្ងន់ធ្ងរ ជាពិសេសកុមារតូចៗ ស្ត្រីមានផ្ទៃពោះ ឬបុគ្គលដែលមានភាពស៊ាំនឹងមេរោគ។ ជំងឺនេះឆ្លង តាមការការប៉ះពាល់រាងកាយដោយផ្ទាល់ជាមួយនឹងឈាម សារធាតុរាវក្នុងខ្លួន ឬដំបៅពីបុ​គ្គលដែលមានមេរោគ ឬវត្ថុធាតុកខ្វក់។ រយៈពេលនៃការកើតជំងឺនេះគឺ ពី៥ ទៅ ២១ ថ្ងៃ។

សរុបមកវិញ ទោះបីជាវាមិនគ្រោះថ្នាក់ធ្ងន់ធ្ងរដូចជាមេរោគកូវីដ ១៩ កន្លងមក ក៏ពិតមែន ប៉ុន្តែ​យើងក៏ត្រូវតែប្រុងប្រយ័ត្នឲ្យបានខ្ពស់ដែរ ជាពិសេស អ្នកដែលចូលចិត្តធ្វើដំណើរច្រើន។ ចូររក្សាការប្រុងប្រយ័ត្ន និងអ​នុវត្តការរក្សាអនាម័យផ្ទាល់ខ្លួនប្រកបដោយស្តង់ដារខ្ពស់ រួមទាំងការលាងដៃឱ្យបានញឹកញាប់។ ចៀសវា​ងការប៉ះពាល់ដោយផ្ទាល់ជាមួយដំបៅរបស់មនុស្សដែលសង្ស័យ សំភារៈប្រើប្រាស់របស់ពួកគេ ជៀសវាងការប៉ះពាល់ឬទទួលទានសត្វព្រៃដែលអាចផ្ទុកមេរោគ ដោយប្រការណាមួយ៕

Add new comment

1 + 10 =