ប្អូនៗយុវវ័យ! សូមកុំយកអំពើហិង្សាជាដំណោះស្រាយ

ប្អូនៗយុវវ័យ កំហឹងនរណាក៏មានប៉ុន្តែសូមកុំអោយកំហឹងដែលប្អូនៗមាន ប្រែក្លាយទៅជា អំ​ពើហិង្សាលើអ្នកដទៃ ពីព្រោះថា ប្រសិនបើប្អូនៗខឹង ហើយទប់កំហឹងមិនបានបញ្ចេញសកម្ម ភាពហិង្សាលើអ្នកដទៃ ប្អូនៗនឹងប្រពឹត្តអំពីឧក្រិដ្ឋ ដែលច្បាប់មិនអាចអត់ឱនឲ្យបានឡើយ។

ប្អូនៗជាទីស្រលាញ់ សង្គមរបស់យើងទៅថ្ងៃអនាគតសង្ឃឹមថា ប្អូនៗនឹងក្លាយជាអ្នកបន្តវេន ដូច្នេះ​សូមរៀនអត់ធ្នត់ រៀនករុណា រៀនស្រលាញ់ និងរៀនអធ្យាស្រ័យ។ នរណាក៏ចេញខឹង នរណាក៏ចេះស្អប់ នរណាក៏ចេះស្រលាញ់ ប៉ុន្តែការខឹងក្តី ស្អប់ក្តី ស្រលាញ់ក្តីគឺគួរតែមាន ព្រំដែន ហើយយើងទាំង​អស់គ្នា​ត្រូ​វតែរៀនទប់ឫរម្ងាប់អារម្មណ៍។

ការខឹង ការស្អប់ ការស្រលាញ់គឺជាសិទ្ធិរបស់យើងម្នាក់ៗ ប៉ុន្តែប្រសិនបើបញ្ហានេះវាវិវត្តទៅ ជាសកម្មភាព ប្រសិនបើដៃគូគេយល់ស្រប និងស្រុះស្រូលជាមួយយើងវាមិនជាបញ្ហាទេ ប៉ុន្តែនៅ​ពេលដែល​​យើងសំដែ​ងអារម្មណ៍ទៅ ហើយគេប្រតិកម្ម ហើយយើងបែជាប្រតិកម្មទៅ​វិញលើសពីព្រំដែននៃសិទ្ធិ ពោលគឺប៉ះពា​ល់ដល់​សិទ្ធិអ្នកដ៏ទៃយើងនឹងមានពិរុទ្ធភាព។ នេះ​គឺជា​ច្បាប់ឫជាក្រិត្យក្រមសង្គមដើ​ម្បីដាក់កំណ​ត់ព្រំដែន​នៃការខឹង ការស្អប់ ការស្រលាញ់​របស់យើង បើមិនដូច្នេះសង្គមយើងនឹងអនាធិបតី។

ប្អូនៗបានឃើញទេ អ្វីដែលកើតឡើងនៅខេត្តតាកែវ ដែលក្រុមយុវជនមួយក្រុមកាប់យុវជន ម្នាក់ស្លាប់ដោ​យដាច់ករនេះ គឺជាផលនៃអ្វីដែលយើងខ្ញុំបានលើកឡើងខាងលើ។ ហើយសកម្មភាពមួយទៀត ដែ​លពា​ក់ព័​ន្ធនឹង​ក្រុមយុវជន៦ នាក់ជិះម៉ូតូដេញកាប់យុវជនពីរនាក់នៅ ក្រុងសិរីសោភ័ណ ខេត្តបន្ទាយមានជ័​យកាល​ពីយប់ថ្ងៃទី ១៥ ខែមីនា ឆ្នាំ២០២៣ នៅចំណុចផ្លូវលេខ៦ស្ថិតក្នុងភូមិកំពង់ស្វាយ សង្កាត់កំពង់ស្វាយ ក៏ជាឧទាហរណ៍មួយករណីទៀត ដែលបញ្ជាក់ប្រាប់ប្អូនៗថា នេះគឺជាសកម្មភាពខុ​សដែលគួរតែ​ជៀ​សវាង។  នៅក្នុងករណីនេះ ប្អូនដែលជាក្រុមជនដៃដល់គឺត្រូវបានសមត្ថកិច្ចចាប់បានពីរនាក់ហើយ ដើម្បីយកមក ផ្តន្ទាទោសតាមច្បាប់ ដោយឡែកបក្សពួក៤ នាក់ផ្សេងទៀតគឺសមត្ថកិច្ចកំពុងតែស្រាវជ្រាវ ចាប់ខ្លួន។

ឃើញករណីទាំងនេះប្អូនៗថា វាចំណេញឫសម្រាប់សកម្មភាពដែលបំផ្លាញខ្លួនឯងបែបនេះ។ ទាំង​អស់​គ្នាគឺជាជនជាតិតែមួយ មិនគួរយកបញ្ហាគំនុំធ្វើជាមូលហេតុទេ ។ ទោះខឹងទោះស្អប់ ទាំងអស់គ្នានៅតែ​ជាជ​នរួម​ជាតិ ដូច្នេះគួរតែចេះអធ្យាស្រ័យ ចេះយោគយល់។ ទោះលើស​លោះ ឬខុសអ្វីក្តីគួរ​តែព្យាយាម​សម្រួ​​លអារម្មណ៍សម្រួលផ្លូវចិត្ត ទប់កំហឹង និង បញ្ចុះកំំដៅនៃ កំហឹងហើយបង្វិលវាទៅជា​ការនិ​យាយការជជែករកមូលហេតុ និងផលដោយសន្តិវិធីវិញ៕