ប្រច័ណ្ឌគឺជារងើកភ្លើងនៃអំពើហិង្សានៅក្នុងគ្រួសារ

ប្រច័ណ្ឌពាក្យនេះធម្មតាទេ ប៉ុន្តែនៅក្នុងសង្គមជាពិសេសនៅកម្ពុជា វាគឺជារងើកភ្លើងមួយនៃ អំពើហិង្សានៅក្នុងគ្រួសារ ហើយករណីខ្លះបានវិវត្តន៍រហូតក្លាយជារឿងឧក្រិដ្ឋកម្មថែមទៀតផង ។

សូមប្រយ័ត្ននិងលើកកំពស់ការរិះគិតដើម្បីកុំអោយប្រច័ណ្ទនេះវាវិវត្តន៍ទៅជាបញ្ហានេះបើមិនដូច្នេះទេសង្គមគ្រួសារនឹងមានវិបត្តិ ករណីដូចជាហេតុការណ៍មួយដែលបានកើតមានឡើងនៅ​ក្នុងភូមិ​វត្ត សង្កាត់​ប៉ៃលិន ក្រុងប៉ៃលិន ខេត្ត​ប៉ៃលិន កាលពីពេលថ្មីៗកន្លងទៅ ។

ដោយសារតែភ្លៀងប្រច័ណ្ឌដែលបានកើតមានឡើងនៅក្នុងគ្រួសារតាំងពីយូរយារ មកហើយ ក្តីប្រច័ណ្ឌនេះ បានករកើតទៅជារឿងអំពើហិង្សានៅក្នុងគ្រួសាររាប់ឆ្នាំរហូតដល់ កាលពី​វេលា​ម៉ោង​ប្រហែល​៣​និង​៣០​នាទី​ឈាន​ចូល​ព្រឹក​​ថ្ងៃ​ទី​៥ ខែកញ្ញា ឆ្នាំ​២០២៣ ក៏បានកើតទៅជា រឿងក្តីឃាតកម្មដោយភរិយាសម្លាប់ប្តីខ្លួនឯងនឹង​កាំបិតប៉័ងតោ​កាប់​ប្រហារ​ប្តីស្លាប់​នៅ​លើ​គ្រែ​ ។​

ក្រោយកើតរឿងរ៉ាវនេះឡើងភ្លាម ស្រ្តីជាឃាតករក៏បានទៅសារភាពប្រាប់សមត្ថកិច្ច ហើយគេដឹងថា មុន​ពេល​ឈាន​ដល់​ការ​សម្លាប់​​​បុរស​វ័យ​ចំណាស់ជា​ប្តី​​ខាងលើ​​នេះ គឺ​ទាំង​២​នាក់​ប្តី​ប្រ​ព​ន្ធ តែងតែ​ឈ្លោះ​ទាស់ទែង​ប្រកែក​គ្នា​ជា​រឿយ​ៗ ពោល​គឺ​ចាប់​តាំង​តែ​កូន​នៅ​តូច​ៗ​​ម្លេះ ដោយ​អ្ន​ក​ភូមិ​គិត​ថា វា​ជា​រឿង​ធម្មតា ព្រោះ​គ្រាន់តែ​ឈ្លោះ​រួច​ក៍​ត្រូវ​គ្នា​វិញ តាម​ទម្លាប់​របស់​ពួក​គាត់​។

តែមិនដូចការគិតឡើយស្រ្តីបានទ្រាំទ្រលែងបានរហូតដាច់ចិត្តសម្លាប់ប្តីខ្លួនឯងដ៏រន្ធត់រហូតដល់គ្មាននរណាអាចនឹងស្មានដល់ ។ 

ករណីនេះមិនមែនជាករណីដំបូងដែលក្តីប្រច័ណ្ឌបានវិវន្តទៅជារឿងក្តីឃាតកម្ម ។ កន្លងមក នៅក្នុងសង្គមកម្ពុជាយើង ពេលខ្លះប្តីប្រច័ណ្ឌប្រពន្ធខ្លាំងក៏កាប់សម្លាប់ប្រពន្ធ ហើយ ពេលខ្លះ ក៏ប្រពន្ធសម្លាប់ប្តីដូចករណីខាងលើ ដូច្នេះហើយបានជាយើងខ្ញុំសូមយកករណីទាំងនេះ ជាសក្ខីភាពដើម្បីចែករំលែកថា ក្តីប្រច័ណ្ឌបែបនេះគឺគ្រោះថ្នាក់ខ្លាំងណាស់ ។

ជាការពិតក្តីប្រច័ណ្ឌគឺកើតមកដោយសារតែក្តីស្រលាញ់ ប៉ុន្តែដោយសារតែវាងប់ងុលជ្រុល ពេកវាទៅជាបញ្ហាដែលមិនអាចទទួលយកបាន ។ ហើយនៅពេលដែលក្តីប្រច័ណ្ឌនេះវាកាន់តែធ្ងន់ធ្ងរវានឹងក្លាយទៅជារឿងឧក្រិដ្ឋកម្ម បែបនេះ ។

នរណាក៏មានក្តីស្រលាញ់ ក្តីប្រច័ណ្ឌប៉ុន្តែសូមកុំងប់ងុល។ ការដែលយើងសម្រេចចិត្តរួបរស់ជីវភាពជាស្វាមីនិងភរិយានឹងគ្នា គឺត្រូវតែគោរពអោយតម្លៃស្មោះត្រង់នឹងគ្នា ហើយនៅក្នុង ករណីប្រច័ណ្ឌ ខ្លាំងហើយទ្រាំមិ​នបាន សូមកាត់ចិត្តហើយចែកផ្លូវគ្នាដោយសន្តិវិធី ប៉ុន្តែទោះបីជាយ៉ាងណាក៏ដោយដើម្បីរក្សាចំណងសុភ​មង្គលអោយគង់វង្ស ការគោរពអោយតម្លៃ ជួយគ្នា ស្តាប់គ្នាអត់ឱន ចំណងនៃជីវិតគួរនឹងថែរក្សារហូតដល់អាវសាន្ត៕